Filipi 1 - En Taar Weru a nunuwu' é Tontemboan

En siri'

¹ En surat anio' a yaku owo Paulus wo si Timotius ata-ata i Kristus Yesus. Icirimku en surat anio' a sé pakasa in tou le'nas sé meesao wo si Yesus Kristus an Filipi, icauntep sé tou mengatilik sé jamaat wo sé maselewir an jamaat.

² Isombayang ami wosama' en upus aitambér wo eng kaeluran asi Amang Kasuruan Amangta wo asi Apo' Yesus Kristus mewali-wali wo icamu.

En sombayang i Paulus

³ Susurku in tuma'néi icamu, pengakuaku mangé i makapulu'sama' a si Amang Kasuruanku.

⁴ Wo susurku in sumombayang torona icamu im baya, ipasombayangku ang karapi in arui en até.

⁵ Pengakuaku i makapulu'sama' a si Amang Kasuruan, ampa'paan tumo'tolke' mai asi endo kataré kamu luminga in Abar Kaaruien in andumoro' i Yesus Kristus akar intarépé', kamu tumawango in tawoienku mengakua in Abar Kaaruien.

⁶ Si Amang Kasuruan in esao en tumo'tol in tawoien loor itu an uner iow, anaé wutu-wutul percayanku ilala'us-Na oka en tawoien anio' akar asi endo i Kristus Yesus maai sumawel.

⁷ Mémang patuso aku méé i makapulu'sama' in taniitu andumoro' icamu im baya, ampa'paan icamu im baya an atékuo. Wo ka'i kamu imamualio kara-karapi an tawoien si aitambérai i Amang Kasuruan a yaku. Kamu ra'ica mento' matawang yaku, mandé ka'i yaku am bui kuma'pa an tutuwku mengakua im pembélaan e méé tuus a sé tou sé ra'ica mapercaya in Abar itu, sapaoka en Abar Kaaruien si pakuaku itu wutul.

⁸ Kailekan i Amang Kasuruan sapaoka kamu im baya lelonku keli wo icaupusku tanu si Kristus Yesus mengaupus icamu.

⁹ Wo si anioo en sombayangku, wosama' en upus iow a si Amang Kasuruan wo sé kakélé tou makaawes, wo makaawes ka'i eng kakailekan wutul andumoro' si wisa si wutul wo si wisa si ra'ica wutul,

¹⁰ akar ro'na sisiren iow si loor. Wo in taniitu, akar asi endo i Kristus maai sumawel eng katouan iow weresi wo ra'ica wana kaséaan.

¹¹ Isombayangku ka'i wosama' pengéma-ngémaan iow sé nianggap wutul i Amang Kasuruan ampa'paan si Yesus Kristus imatawoi ang katouan iow. Wo in taniitu si Amang Kasuruan oka si parayo wo pasiriin.

Eng Kasairian i Paulus an untep im bui

¹² Poo-poow, icasalé'ku kailekan iow sapaoka aku ayuntep am bui anio', méma'ke' taré makaawes sé tou iluminga in Abar Kaaruien wo maéman a si Kristus.

¹³ Ampa'paan intarépé' pakasa é suraro sé matéir an istana i Kaisar wo sé tou walina makaileko sapaoka aku binui ampa'paan i Kristus.

¹⁴ Wo ka'i ampa'paano aku binui, makakelio taré sé poo-poowta maéman am bia'i makaketer em paémanen a si Apo' Yesus akar séra ra'io wana eng kaindé'anai mengakua in Taar i Casuruan.

¹⁵ Mandé ka'i awéan tou sé mengakua andumoro' i Kristus ampa'paan menii-niim ing kasuutan wo ampa'paan meindo-indoan roma', taan awéan tou walina mengakua andumoro' i Kristus ang karapi im pawasan loor.

¹⁶ Sé tou mawasa in loor itu mengakua andumoro' i Kristus ampa'paan in upus a sé tou walina. Kailekan éra aku binui ampa'paan mengakua in Abar Kaaruien andumoro' i Yesus Kristus a sé tou sé mengasundur in Abar Kaaruien itu wo méé tuus sapaoka en Abar Kaaruien itu wutul.

¹⁷ Taan sé tou menganganat wo meindoan roma', séra mengakua andumoro' i Kristus ampa'paan mawasa in léwo'. Wo paweroten éra ang karapi i méma' in taniitu, en atéku lébé masusa am bui.

¹⁸ Taan ra'ica sapa-sapa! Ampa'paan mandé ka'i tambisa, en Abar Kaaruien aicuao éra a sé tou. Pakua éra en Abar itu ang karapi im pawasan ra'ica loor kuma'pa im pawasan i lekep en até, em penting keli si Kristus ipakuao a sé tou. Siituo e méma' in atéku arui. Wo ka'i yaku kasake' arui,

¹⁹ ampa'paan kailekanku sapaoka maai oka en témpona aku icesot am bui, ampa'paano im penomba-nombayang iow wo ka'i en tatawang i Roh i Yesus Kristus a yaku.

²⁰ En icasalé'ku wo em paarapenku wosama' aku ra'- ica papalawi' mengaéma' in tawoien si aiwéé i Amang Kasuruan. Wo em butulna en casalé'ku sapaoka intarépé' aku kasake' ra'ica maindé' mengakua andumoro' i Kristus kaputé indior. Anaé aku menonou kuma'pa maté ra'ica sapa-sapa, em penting keli si Kristus em parayo wo pasiriin am pakasa sé pengaémaanku.

²¹ Ampa'paan sa kiit yaku, ang katouan anio' menonouke' torona i Kristus. Wo sa aku maté, siituo eng kauntungan ampa'paan aku menonou oka ang karapi i Kristus.

²² Taan sa aku musti menonou ang kayo'baan anio', raméjinku en tumawoi e méé wuéna asi tawoienku maselewir a si Kristus. Anaé, ra'io kailekanku si wisa e musti sisirenku.

²³ Ra'io kasisiranku asé rua sisiran itu. Yaku masalé' keli tumela'u ing kayo'baan anio' wo mangé mento' mewali-wali wo si Kristus, ampa'paan en itu si lumébé loorai.

²⁴ Taan aweso taré aku tatap mento' ang kayo'baan anio' ampa'paan aku paperluné' miow.

²⁵ Percayanku kamu maperlupé' yaku, anaé aku tatapke' mento' ang kayo'baan anio' mewali-wali wo icamu im baya wosama' kamu makaketer wo makaarui am paémanen a si Kristus.

²⁶ Wo in taniitu, sa aku maai sumawel an uner iow, eng katirayoan iow a si Kristus Yesus mengawe-ngawes ampa'paan yaku.

²⁷ Anaé, em penting keli kamu musti menonou kumiit in sapa sé aisusui an Abar Kaaruien andumoro' i Kristus. Wo in taniitu, aku maai meta'up wo icamu kuma'pa ra'ica, kailekanku oka sapaoka kamu enté' makatulung an esa wasa wo rumaméji mewali-wali an esa até torona im paémanen ampa'paan makiit in Abar Kaaruien.

²⁸ Kamu ra'ica toro maindé' a sé tou sé mengasundur icamu. Sa kamu ra'ica maindé', kailekan éra oka sapaoka sérao sé ukumen patén wo icamuo sé lowiren oka i Amang Kasuruan.

²⁹ Ampa'paan kamu tinambérano mai ing kamang i Amang Kasuruan ra'ica asaloke' maéman a si Kristus taan ka'i imawendu ampa'paan maéman ai Sia.

³⁰ Wo eng kawenduan sé ang karoro'an im pamendamen iow meputé wo ing kawenduan si pinendamkuo mai, tanu sé sinéréo miow a yaku indior. Wo liningao miow in esa ka'i sapaoka aku mawendupé' akar intarépé'.