Efesus 5 - En Taar Weru a nunuwu' é Tontemboan

Menonou ang kasendotan i Amang Kasuruan

¹ Anaé, ampa'paan icamu toya-toyaang i Amang Kasuruan si ipaupu-upus-Na, mengaéma'o mangé tanu sé niéma'-Nao.

² Menonouo mangé ang karapi i meupu-upusan, kaputé i Kristus mengaupuso icamu. Sia sumarakano in owak-Na torona icita tanu raragésan si mawou manam torona i Amang Kasuruan.

³ Tioo kamu kawera-werake' in cabul, mengéma-ngéma' sé karican oka mai, kuma'pa masalé-salé'ke' in anu é tou walina. Ipepaarke' ka'i en itu ra'ica toro, ampa'paan ra'ica patus émaan é tou le'nas.

⁴ Tioo ka'i awéan ai camu makua sé nunuwu' kotor, sé nunuwu' ra'ica wana torona kuma'pa sé nunuwu' ra'ica masoma. En itu ra'ica patus pengakua miow. Taan aweso taré kamu mengakuao mangé i makapulu'sama' a si Amang Kasuruan.

⁵ Wéan iow rékén sumama-sama': sé tou mengabersina, sé mengéma-ngéma' sé karican kuma'pa masalé-salé'ke' in anu é tou walina, sé tou longi' am baya-waya si ro'na i peputé wo sé mengaapo' a sé opo-opo'. Sé tou tanu siitu ra'ica kawisa makéré im bagéan ang Kakolanoan i Yesus Kristus wo si Amang Kasuruan.

⁶ Tioo kamu isélé'kow é tou i nunuwu' sé ra'ica wana torona, ampa'paan en itu iméma' ing kae'bowan i Amang Kasuruan a sé tou sé ra'ica le'tek ai Sia.

⁷ Ampa'paan in itu kamu tioo mengakarapi wo sé tou tanu siitu.

⁸ Indior kamu toya-toyaang ing kariréimbengan, taan intarépé' kamu imamualio tou i Casuruan, anaé icamuo sé toyaang in sendot. Ampa'paan in itu menonouo mangé tanu toya-toyaang in sendot,

⁹ ampa'paan sa kamu menonou an sendot em pengaémaan iow asalo andumoro' sé loor, sé ra'ica marapit wo sé wutul.

¹⁰ Wo rumaméjio mangé wosama' kakailekan iow sapa si mengaarui in até i Amang Kasuruan.

¹¹ Tioo mengakiit im pengaémaan é tou sé menonoué' ang kariréimbengan, ampa'paan em pengaémaan éra itu ra'ica wana torona. Aweso taré ituru'o miow a sé tou sapaoka em pengaémaan éra itu suméa'.

¹² Ampa'paan pepaarke' sapa sé ipaene-enep éra itu kalawiin keli.

¹³ Taan sapa-sapake' sé ang kariréimbengan, kaséré-séréan keli sa kinatélangano in sendot, ampa'paan en sendot itu tumuru' im baya-waya.

¹⁴ Ampa'paan in ituo awéan en aipatic in tana'i, “Éi camu sé makatekelé', tumooro, wo tumouo mai sumawel am papaté wo si Kristus tumélang oka mai camu.”

¹⁵ Anaé, sérén sumama-sama' tambisa eng katouan iow. Tioo kamu menonou tanuoka sé tou bodok, taan menonouo mangé tanuoka sé tou pandéi.

¹⁶ Pakéno mangé sumama-sama' en témpo si aiwéé ai camu, ampa'paan asi oras anio' kelio en tou sé mengaéma' ing kaléwo'an.

¹⁷ Ampa'paan in itu tioo mamuali tou bodok, taan rumaméjio mangé makailek sapa si casalé' i Casuruan.

¹⁸ Tioo kamu malangu-langu ampa'paan in elepen pengakalangun e méma' icamu ra'ica makawoo kumawasa in owak. Taan aweso taré en owak iow pakakawasan i Roh i Amang Kasuruan.

¹⁹ Mengkuanano mangé kamu i esa wo sé walina ang karapi i mazmur, kakantaren rarayoan wo kakantaren walina si aiwéé mai i Roh Le'nas. Kumantaro wo aruieno mangé si Casuruan ang karapi in lekep en até.

²⁰ Mengua-nguao mangé i makapulu'sama' am baya-waya a si Amang Kasuruan, Amangta, ang karapi i ngaran i Yesus Kristus Apo'ta.

²¹ Wo ko'kosio' en atému iesa wo sé walina, ampa'paan kamu tou sé mengasiri' si Kristus.

En sina'u a sé mempenanaan

²² Éi wéwéné sé kinawéngo, lume'te-le'teko mangé a si penanaanmu, meputé kamu le'tek a si Casuruan.

²³ Ampa'paan si tuama icumawéngo mamuali kapala i wéwéné kinawéngna, wo puté si Kristus mamuali kapala é jamaat. Siao en lumowir sé jamaat, si mamuali owak-Na.

²⁴ Ampa'paan in itu, tanu in jamaat sé le'tek a si Kristus, taniitu ka'i mai sé wéwéné kinawéngo musti le'tek a si penanaanna am baya-waya.

²⁵ Éi tuama sé icumawéngo, mengaupus angé si penanaanmu, kaputé i Kristus mengaupuso sé jamaat wo irumagés in owak-Na torona éra.

²⁶ Niéma'-Na en itu wosama' Sia lume'nas sé jamaat kekawus éra wineresi-Na in dano wo in Taar,

²⁷ wosama' séra ro'na wéan-Na tampa an dior-Na tanu jamaat sé iparangka-rangka', ra'ica wana kaséaan kuma'pa icumeleso kuma'pa si kaputé in itu. Sé jamaat itu mamuali oka le'nas wo ra'ica wana e ro'na méé kaséaan.

²⁸ Taniitu ka'i sé tuama icumawéngo musti mengaupus angé sé penanaan, meputé séra mengaupus in owak in esa.

²⁹ Ampa'paan ra'ica wana tou masuut in owakna in esa. Taan si esa wo si esa tou miara wo mengaupus in owakna, meputé si Kristus miara wo mengaupus sé jamaat,

³⁰ ampa'paan kita anio' anggota-anggota in owak i Kristus.

³¹ Ampa'paan in itu sé tuama tumela'u oka si amangna wo si inangna, wo meesa ang karapi i penanaanna akar séra in dua maesa.

³² En sususuien andumoro' é mempenanaan anio', eng kaangéanna rarem keli. Em paangé- angénku tumuru' in ubungan i Kristus wo sé jamaat.

³³ Wo mandé ka'i tumambisa sé tuama icumawéngo, si esa wo si esa musti mengaupus angé si penanaanna, meputé sia mengaupus in owakna. Taniitu ka'i sé wéwéné sé kinawéngo musti pengasiriin angé si penanaan.