Efesus 4 - En Taar Weru a nunuwu' é Tontemboan

Em paesaan é jamaat wo eng kamang sé membam-balinaan

¹ Yaku Paulus si binui ampa'paan maselewir si Casuruan, sina'- uenku kamu sé tinowao i Amang Kasuruan wosama' kamu menonou kumiit in totowa itu.

² Anaé, menonouo mangé ang karapi ing ko'kos en até, sama' en até a sé pakasa é tou wo talesen. Ituru'o mio' en upus iow ang karapi i mentan-tawangan si esa wo sé walina.

³ Rumaméjio mangé ang karapi i mauli-ulit menonou meesa wo meeluran ang karapi é tou walina, ampa'paan kamu niéma' i Roh Le'nas i meesa wo iséra.

⁴ Kita sé maémano a si Kristus imamualio esa owak wo makaanu esa Roh, wo ka'i makaanu esa paarapen. Em paarapen itu aiwéé i Amang Kasuruan an tutuwta tinowa-Na e maéman.

⁵ Kita ka'i makaanu esa Kasuruan, esa em paémanen, esa em baptisan,

⁶ wo esa Amang Kasuruan. Siao si Amang é pakasa in tou maéman. Wo Siao si maperénta waya sé tou, wo si matawoi mewali-wali wo sé tou maéman, wo mento' an até éra.

⁷ Mandé ka'i kita meesao, taan kita si esa wo si esa tinambérano mai membam-balinaan eng kamang kiit sapa si casalé' i Kristus.

⁸ Ampa'paan in itu ang Kitap Le'nas aipatic in tana'i, “An tutuw Sia sumosor angé asi tampa rumangka-rangka', wali-Na mangé sé kaséké' sé kinala-Na wo a sé tou-Na wéan-Na wéwéé.”

⁹ Anaé, sa aicua, “Sia sumosor angé asi tampa rumangka-rangka',” tantu Sia isumangkumo tumumpa mai asi tampa si rumare-rarem ang kayo'baan.

¹⁰ Sia si tumumpao mai ang kayo'baan itu, Siao ka'i si sumosoro mangé an tampa si lébé rangka' mai am pakasa in langit, wosama' em baya-waya sé ang kayo'baan wo sé an sorga ang kakawasaan-Na.

¹¹ Wo Siao en tumambérai ing kamang a sé tou. Awéan tou sé aitantu-Na mamuali ruru'du'an, mamuali nabi, mamuali tou mengakua in Abar Kaaruien andumoro' i Yesus Kristus, mamuali gembala é jamaat wo ka'i guru.

¹² Sé kamang itu aiwéé i Kristus wosama' sé tou le'nas makawoo mengaéma' in tawoien torona i Amang Kasuruan, wo tanu in owak i Kristus, kita ro'na makaketer am paémanen,

¹³ akar kita im baya maesa am paémanen wo makatuus si Toyaang i Amang Kasuruan. Wo an in taniitu, em paémanenta makawangkoo wo menguré-nguré kita mamuali oka kaputé i Kristus.

¹⁴ Wo in taniitu, kita ra'io ka'i kaputé é toyaang sé taporakké' pauwaken wo ipawali-walipé' i membam-balinaan sususuien é tou sé ra'ica wutul. Séra mengasélé'kow sé tou ang karapi in sususuien sé mengauwak.

¹⁵ Taan kita ra'ica tanu siitu. Timboienta sumama-sama' en sususuien wutul asi Amang Kasuruan wo meupu-upusan, akar kita makawangko' am baya-waya kaputé i Kristus. Siao si capalata.

¹⁶ Siao en tumu'tul im pakasa sé an owak akar imetu'tul sama' wo meesa, ampa'paan pakasa sé an owak itu awéan ubungan i esa wo si esa. Wo an tutuw i esa wo si esa anggota an owak matawoi ang karapi i mauli-ulit, pakasa sé an owak itu tumou oka wo mewali-wali mangun in owak ang karapi i meupu-upusan.

Eng katouan weru

¹⁷ Ampa'paan in itu, icuaku wo ita'néiku mangé ai camu ang karapi ing kawasa si aiwéé i Casuruan: Kamu ra'io toro menonou kaputé é tou sé ra'ica makatuus si Amang Kasuruan, sé asalo mawerot andumoro' sé ra'ica wana en torona.

¹⁸ Em bewerot éra imariréimbengo, wo séra menonou tayang wo si Amang Kasuruan, ampa'paan séra bodok wo en até éra keté.

¹⁹ Séra ra'io mengalawi', akar pengakiitan éra pakasa sé kasalé'an in owak sé ra'ica wutul wo ra'ica masuut mengaéma' sé karican oka mai.

²⁰ Taan en sususuien andumoro' i Kristus si liningao miow, ra'ica masusui menonou tanu siitu!

²¹ Ampa'paan en sususuien andumoro' i Kristus sé liningao miow itu, sususuien wutul. Wo en sususuien wutul itu kaséré-séréan an owak-Na.

²² Ampa'paan in ituo tela'uo mio' em peri ing katouan uré. Eng katouan uré tanu siitu ra'ica loor, ampa'paan makiitke' ing kasalé'an in owak sé ra'ica wutul si mengasélé'kow icamu wo luméwo' ing katouan iow.

²³ Musti tela'u miow em peri ing katouan uré tanu siitu, wosama' en até wo em bewerot iow maweru,

²⁴ wo menonouo mangé mamuali tou weru, si niéma' iciit im peri i Amang Kasuruan si wutul wo le'nas.

²⁵ Ampa'paan kamu mamualio tou weru, ra'io toro ka'i mengatowo. Makuao mangé im butul asi esa wo sé walina, ampa'paan kita im baya puté-puté anggota in owak i Kristus.

²⁶ Sa kamu mae'bow, tioo mengaéma' ing kamesé-meséaan. Tioo eng kae'bowan itu yéma' miow akar i muntep si yéndo,

²⁷ wo tioo pengawéan témpo a si kikiiten é sétang en tumawér icamu.

²⁸ Si tou si sumangkumo rumombit, yentoo mio' marombit. Aweso taré sia rumaméji tumawoi sapake' sé loor ang karapi ing kamana in esa, wosama' sia makaanu in sapa-sapake' si ro'na iwéténg a sé tou lengéi.

²⁹ Tioo awéan nunuwu' sé ra'ica loor kumesot am ba'ba' miow. Taan manuwu'o mangé i nunuwu' sé loor eng kumeter in até é tou walina an tutuw im paperlun éra. E nunuwu' tanu siitu méé oka ing kamang a sé tou sé mengalinga in itu.

³⁰ Tioo pengaémaan iow si Roh Le'nas i Amang Kasuruan itu masusa. Ampa'paan si Roh Le'nas itu mamuali tuus sapaoka icamu itu anu i Amang Kasuruan akar asi endo Sia maai sumawel en lumowir icamu.

³¹ Itela'uo mio' eng kasuutan, kae'bowan akar ing karangoan, kae'bowan, meindo-indoan roma', mengawuruk i ngaran é tou, taniitu ka'i mai pakasa sé léwo'.

³² Taan aweso taré kamu loor en até, meupu-upusan, membém-béan angé ing kaampungan, kaputé i Amang Kasuruan mengawéé ing kaampungan ai camu sé maémano a si Kristus.