Efesus 2 - En Taar Weru a nunuwu' é Tontemboan

Kita winéan ing katouan weru ampa'paan in upus aitambér i Amang Kasuruan

¹ Indior an tutuw iow ra'ipé' maéman, kamu ayandé tanuoka sé tou imatéo, ampa'paan mengaéma' ing kamesé-meséaan wo masundur im perénta-perénta i Amang Kasuruan.

² An tutuw itu kamu mengakiité' ing kanaramen ing kayo'baan anio', wo mengakiit si kikiiten é sétang si cumawasa an langit. Siao e roh si matawoi intarépé' an untep in até é tou sé ra'ica le'tek a si Amang Kasuruan.

³ En ulitna indior icita im baya ka'i meputé wo sé tou ra'ica le'tek itu, ampa'paan kita makiité' ing kasalé'an in owak sé ra'ica wutul, asalo maarui in owak wo asalo memero-merot in léwo'. Kita anio' sé tou patus ukumen i Amang Kasuruan kaputé é tou walina.

⁴ Taan taloso wangko' eng kaupusan i Amang Kasuruan! Kita icaupus-Na keli,

⁵ akar kita touen-Na sumawel mewali-wali wo si Kristus, mandé ka'i an tutuw itu kita ayandé tanuoka matéo ampa'paan ing kamesé-meséaanta. Siituo en upus aitambér i Amang Kasuruan en lumowir icamu.

⁶ Wo ampa'paan kita meesao wo si Kristus Yesus, kita tinou sumawel i Amang Kasuruan wo ailukut-Na an tampa pasiri-siriin mewali-wali wo si Kristus e merénta ang kerapi-Na an sorga.

⁷ Niéma' i Amang Kasuruan pakasa en itu wosama' asi témpo maai sa, ituru'-Na oka eng kawangko' in upus-Na si mawuta-wuta kiit ing kasamaan-Na ai cita sé meesao ang karapi i Kristus Yesus.

⁸ Ampa'paan kamu linowir in upus aitambér i Amang Kasuruan an tutuw iow maéman. Eng kalowiran itu asalo aitambér i Amang Kasuruan, ra'ica wuéna im pakasa sé loor sé pinengaéma' miow.

⁹ Eng kalowiran itu ra'ica wuéna in tinawoi miow, anaé ra'ica wana esaan tou ka'i e ro'na tumirayo in owakna in esa.

¹⁰ Ampa'paan si Amang Kasuruan in esa si iméma' icita mamuali tou weru an tutuwta maéman a si Kristus Yesus wo meesa wo Sia. Kita niéma'-Na tou weru wosama' émaanta sapa-sapake' sé loor sé aitantu-Nao tumo'tolke' mai indior wosama' émaanta waya sé loor.

Kita meesa ampa'paan i Kristus

¹¹ Poo-poow, ta'néieno mangé tambisa eng katouan iow indior. Ketouke' mai icamu tou ra'ica Yahudi, anaé icamu patuulen é tou Yahudi “tou ra'ica sinunat”, ampa'paan patuulen éra en owak éra “tou sinunat”. Sé tou sinunat itu mengatirayo ampa'paan séra mengakiit in atoran sunat, mandé ka'i en itu asalo tuus an owak éra si niéma' ing kama in tou.

¹² An tutuw itu kamu ra'ipé' maéman a si Kristus. Kamu ra'ipé' aicauntep a sé tou sé sinisir i Amang Kasuruan wo ra'ica tumerima pakasa sé aijanji-Na a sé tou-Na Israel. Wo kamu menonou ang kayo'baan anio' ra'ica wana em paarapen wo ka'i ra'ica makatuus si Amang Kasuruan.

¹³ Mandé ka'i kamu indior tayango asi Amang Kasuruan, taan intarépé' rumuruo ang karapi-Na ampa'paan in enda' i Kristus.

¹⁴ Ampa'paan kita niéma'o i Kristus menonou ang kaeluran, icita sé tou Yahudi wo sé tou ra'ica Yahudi pineesa-Nao wo tinongkar-Nao e ri'dir mésel si icumawu' ampa'paan ing kaperéndéran.

¹⁵ Ampa'paan eng kepaté-Na tanu tou, en atoran-atoran wo em perénta-perénta an ukum Torat binatal-Nao wosama' sé tou Yahudi wo sé tou ra'ica Yahudi mamuali esa bangsa weru, si meesa ang karapi-Na. Tanu siituo si Kristus iméma' ing kaeluran.

¹⁶ Wo ampa'paano ing kepaté i Yesus Kristus ang kayu salip, sé tou Yahudi wo sé tou ra'ica Yahudi pineesa-Na mamuali esa owak wo niéma'-Na meeluran wo si Amang Kasuruan, ang karapi ing kuma'pu ing kaperéndéran éra.

¹⁷ Sia mai ang kayo'baan eng kumua in abar kaeluran a sé tou ra'ica Yahudi sé indior tayangé' wo si Amang Kasuruan wo sé tou Yahudi sé tawi wo Sia.

¹⁸ Ampa'paano i Yesus Kristus, kita im baya tou Yahudi kuma'pa tou ra'ica Yahudi ro'na rumuru a si Amang Kasuruan, Amangta ang karapi in tatawang i Roh Le'nas si esa-esa.

¹⁹ Wo in taniitu, kamu sé tou ra'ica Yahudi ra'io ka'i tanu sé tou imanangkéi, taan intarépé' kamu imamualio tou le'nas wo ayuntepo am pamalé-Na.

²⁰ Icamu ayandé tanuoka im bangunan winangun am bawo im batu si aitulir é ruru'du'an wo sé nabi. Wo si Kristus Yesus ituo em batu kumataré-taré si tumombol pakasa im bangunan.

²¹ Ampa'paan i Kristus Yesus pakasa em bangunan itu mewali-wali niunsun wo imawangker akar mamuali walé le'nas i Amang Kasuruan si paento'an-Na.

²² Ampa'paan i Kristus, kamu sé tou ra'ica Yahudi ka'i winangun mewali-wali wo sé tou Yahudi mamuali paento'an i Amang Kasuruan. Am bitu Sia mento' tanu Roh.