3 Yohanes 1 - En Taar Weru a nunuwu' é Tontemboan

En siri'

¹ En surat anio' a yaku owo penatua an jamaat. En surat anio' aipaticku ai co é poowku Gayus si uli-ulit icaupusku.

² Poowku Gayus si caupusku, isombayangku wosama' ko sama-sama' am baya-waya, puté imu'kurmu loo-loor ka'i.

³ Arui keli aku ampa'paan awéan poow maéman imai méé kasairian a yaku sapaoka ko tatap le'tek a si Amang Kasuruan wo pengaémaanmu ka'i en sususuien wutul itu.

⁴ Sa iciit yaku, ra'ica wana e ro'na méma' in atéku lébé arui aluar yaku luminga sapaoka sé toyaangku menonou makiit in sususuien i Amang Kasuruan.

Si Gayus airayo

⁵ Poowku Gayus si caupusku, ico le'tek mengatawang am baya-waya a sé poo-poow an ésa paémanen sé mengakua in Abar Kaaruien andumoro' i Yesus Kristus, mandé ka'i séra ra'ipé' katuusanmu.

⁶ Sé poo-poow itu imaréngo mai sumawel wo aicuao éra a sé jamaat am bia'i andumoro' in upusmu. Lébé loor ka'i sa tawa- ngenmu séra lumala'us im bawayaan éra ang karapi imengaéma' ing kasalé'an i Amang Kasuruan.

⁷ Ampa'paan am bawayaan éra e mengakua in andumoro' i Yesus Kristus, séra ra'ica tumerima sapa-sapa asé tou owo sé ra'ica makatuus si Casuruan.

⁸ Anaé, séra musti teriman wo tawangenta, wosama' kita ro'na mamuali kara-karapi an tawoien en sumusui in sususuien wutul i Amang Kasuruan.

Si Diotrefes wo si Demetrius

⁹ Yaku imatico in surat kolek a sé jamaat, taan si Diotrefes si masalé' mamuali kikiiten an jamaat, sia ra'ica kiim luminga yaku.

¹⁰ Ampa'paan in itu, sa aku maai sa, icuaku oka waya sé niéma'na, ampa'paan ipasisilna sé léwo' wo sé ra'ica wutul andumoro' ami. Wo pakasa en itu ra'ipé' ka'i awes ai sia. An tutuw é poo-poow esa paémanen mai, ra'ica kiimna tumerima iséra. Ra'ica siituke', papéronenna ka'i sé tou sé masalé' mengaterima sé poo-poow esa paémanen itu. Wo ra'io wééna sé tou mengaterima itu e mewali-wali meesa an jamaat.

¹¹ Poowku Gayus si icaupusku. Tioo ko mengaandé andumoro' sapa si léwo', taan mengaandé mangé sapa si loor. Si séi e mengaéma' in loor, sia itu asi Amang Kasuruan owo. Taan si séi e mengaéma' in léwo', sia ra'ipé' makatuus si Amang Kasuruan.

¹² Wo pakasa in tou rumayo si Demetrius. Wo sia patus irayo ampa'paan eng katouanna makiit in sususuien wutul. Iparayo ami ka'i sia wo kailekan iow sapaoka e rarayoan ami andumoro' sia itu wutul.

Eng kumusi' in surat

¹³ Keliané' woo en icuaku ai co é Gayus, taan ra'ica kiimku ipatic an surat anio.

¹⁴ Paarapenku ra'io uré ka'i aku meta'up wo ico wo kita ro'na mepaar mewali-wali.

¹⁵ Pekiupusenku a si Amang Kasuruan wosama' émaan-Na mai en atému elur! Wo sé karapimu am bia'i ka'i cumirimai in siri'. Wo icua ka'i mangé en siri'ku a sé kara-karapita a mangé mbitu asi esa wo si esa.