2 Tesalonika 3 - En Taar Weru a nunuwu' é Tontemboan

Em pinangilek i Paulus a sé jamaat en sumombayang torona sia

¹ Poo-poow, pangileken ami ai camu isombayang angé kami, wosama' en taar i Casuruan si pakua ami rior icaserar am bisa-wisa wo ro'na iparayo-rayo é tou tanu si mamuali ai camu indior.

² Wo ka'i isombayang angé wosama' kami cawekar asé tou sé mengaéma' ing kalicokoan wo asé tou léwo', ampa'paan ra'ica im pakasa in tou mapercaya in taar i Casuruan itu.

³ Taan si Casuruan itu le'tek. Keteran-Na oka mai en até miow wo téiran-Na oka kamu ang kaléwo-léwo'an.

⁴ Wo percayan ami mauli-ulit a si Casuruan in andumoro' miow, sapaoka kamu ang karoro'ano maéma' in sapa sé aitaaro ami ai camu wo pengéma-ngémaano mangé en itu.

⁵ Pangileken ami a si Casuruan wosama' akinen-Na mai kamu akar en até miow makailek sapaoka si Amang Kasuruan mengaupus icamu wo ka'i si Yesus Kristus mengawéé ing katalesenan ai camu.

Pakasa en tou musti tumawoi

⁶ Poo-poow, peréntan ami kamu maké ing kawasa i Apo' Yesus Kristus, wosama' tumayango mangé kamu asé poo-poow sé ra'ica kiim tumawoi wo sé ra'ica makiit in sususuien si aiwééo ami ai camu.

⁷ Ampa'paan kailekan iow in esa tambisa e musti kumiit ing katouan ami, ampa'paan an tutuw kita mewali-walipé', kami re'dem matawoi.

⁸ Kami ka'i ra'ica kawisa kuman ing kakanen é tou walina wo ra'ica winéran. Taan kami ka'i re'dem ulit matawoi endo wo em bengi wosama' kami ra'ica mamuali pamuléngen iow.

⁹ Émaan ami en itu ra'ica ampa'paan kami ra'ica wana hak en tulungen é jamaat. Taan ra'ica kiim ami e maké in hak itu. Kami re'dem matawoi in taniitu ampa'paan kami masalé' mamuali paandéan wosama' kiiten iow.

¹⁰ An tutuw ami mewali-walipé' wo icamu, aita'néi amio ai camu sa awéan tou ra'ica kiim tumawoi, sia ra'ica toro kuman.

¹¹ Icua ami en anio' ampa'paan liningao ami sapaoka an uner iow awéan sé tou weles, ra'ica kiim tumawoi. Séra itu masalé'ke' marambé-rambét in urusan é tou walina.

¹² Sé tou taniitu, pokéian wo sina'uenta maké i ngaran i Apo' Yesus Kristus, wosama' séra menawo-nawoi ang karapi in elur wo in taniitu séra mangéréo ing kakanen in esa.

¹³ Wo kamu é poo-poow, tioo mengasuut mengéma-ngéma' sapa sé loor.

¹⁴ Sa awéan tou ra'ica kiim kumiit sé aipatic ami an surat anio', kamu musti mareti-reti wo tioo makara-karapi wo si tou itu wosama' sia malawi'.

¹⁵ Taan tioo anggapen iow sia itu kaséké'. Aweso taré' sina'uen angé sia itu tanu poow iow in esa.

En siri' ing kumusi'

¹⁶ Wayake' si Casuruan e ro'na méma' in até é tou elur. Pangileken ami ai Sia wosama' endo wo em bengi émaan-Na en até miow elur am baya-waya. Pangileken ami ai Sia ka'i wosama' mewali-wali wo icamu im baya.

¹⁷ En siri' anio' a yaku owo, Paulus. En siri' anio' aipaticku ing kamaku in esa. Pakasa en surat aipaticku maké in tuus tanu siitu. Siituo en tuusna sapaoka en surat itu wutu-wutul a yaku owo.

¹⁸ Pekiupusenku wosama' si Yesus Kristus, Apo'ta tumambérai in upus-Na ai camu im baya.