2 Tesalonika 2 - En Taar Weru a nunuwu' é Tontemboan

Ra'ipé' imai sumawel si Apo' Yesus si tou luméwo-léwo' rumioro mai

¹ Poo-poow, en andumoro' i Apo'ta Yesus Kristus maai sumawel wo andumoro' in li'usen-Na kita mewali-wali wo Sia, pangileken ami ai camu,

² wosama' kamu ra'ica toro taporak mabingo wo ra'io makaaté in sama' sa kamu luminga in abar sapaoka an orasnao si Apo' Yesus maai sumawel. Wo awéan wona' e maanggap sa si Casuruan cumuao ai cami sapaoka Sia imayo sumawel. Kuma'pa awéan wona' ka'i maanggap sapaoka kami in esao eng kumua kuma'pa e matic in abar itu. En ulitna ra'ica.

³ Tioo kamu kauwakan é tou sapake' mangé en lalanna. Ampa'paan an tutuw ra'ipé' mai si Apo' Yesus, tantu mamuali owo sé andumoro' in anio': Keli sé tou maéman mamualio léwo' wo kumélong si Casuruan. Wo awéan si tou luméwo-léwo' mai mapaturu' in owakna, si tou itu aitantuo yuntep ang kayo'baan é tou imatéo.

⁴ Si tou ituo en sumundur si Amang Kasuruan wo mengaangkai in owakna rumangka'mai asé im pakasa é opo-opo' sé paanggapen é tou tanu Kasuruan. Wo ka'i sia lumukut an untep im Balé Le'nas wo an dior é tou icuana sapaoka siao si Amang Kasuruan.

⁵ Kata'néiané' miow en andumoro' in itu? Pakasa en itu sumangkumo ipakua-kuaku an tutuwku imewali-walipé' wo icamu.

⁶ Wo intarépé' kinailekano miow sapa en tumang si tou luméwo-léwo' itu, akar sia mapaturu' oka sa an oras si aitantuo i Amang Kasuruan ai sia.

⁷ Si tou luméwo-léwo' itu mato'tolo matawoi taan maene-enepé' ampa'paan awéané' en itumang. Taan awéan en orasna si menanang sia itu patén.

⁸ An tutuw ituo si tou luméwo-léwo' itu mai mapaturu' in owakna. Taan si tou luméwo-léwo' itu patén oka i Apo' Yesus ang karapi in aseng-Na. Wo an tutuw i Apo' Yesus maai sumawel, teri-terin-Na oka ang karapi in télang an owak-Na.

⁹ Wo si tou luméwo-léwo' itu mapaturu' mai maké ing kawasa i kikiiten é sétang wo sia muwak sé tou ang karapi in tumuru' in tuu-tuus kakaya'kaan sé kalinteren wo kala'meren oka mai.

¹⁰ Sia itu maké i membam- balinaan em pakauwak léwo' sé tou akar i maka'pu. Sé tou itu ang karoro'ano im pepaté-patén ampa'paan séra ra'ica masalé' luminga in sususuien wutul asi Amang Kasuruan owo in andumoro' i Apo' Yesus wo ra'ica kiim lowiren.

¹¹ Ampa'paano in itu émaan i Amang Kasuruan séra casélé'kow akar mapercaya a sé ra'ica wutul.

¹² Niéma' i Amang Kasuruan in taniitu wosama' pakasa sé tou sé ra'ica kiim maéman in abar wutul andumoro' i Apo' Yesus wo masalé'ke' maéma' in léwo', séra itu ukumen.

Eng katale'tekan am paémanen

¹³ Poo-poow sé icaupus i Casuruan! Kami mengua-ngua i makapulu'sama' a si Amang Kasuruan andumoro' icamu, ampa'paan sinisir-Nao kamu asi kataré-taré en lowiren. Wo eng kalowiran itu mamuali ai camu, ampa'paan tatawoi i Roh Le'nas, si lume'nas icamu wo ampa'paan kamu maéman in sususuien wutul i Amang Kasuruan.

¹⁴ Torona ing kalowiran ituo, akar tinowa-Na kamu an tutuw ami makua in Abar Kaaruien andumoro' i Yesus Kristus ai camu. Wo in taniitu kamu ro'na makéré i rarayo wo in sisiri' ang karapi i Yesus Kristus, Apo'ta.

¹⁵ Ampa'paan ito é poo-poow, male'te-le'teko am paémanen wo timboien sumama-sama' en sususuien si aisusuio ami ai camu ang karapi in surat kuma'pa sé nuwu' sé lininga miow ai cami.

¹⁶ Si Apo'ta Yesus Kristus wo si Amang Kasuruan, Amangta mengaupuso mai cita. Aitambér-Nao mai en upus-Na ai cita wosama' ro'na méé ing kaketeran an até akar ing kauré-uré, wo méé mai im paarapen ai cita e makéré oka sé loor.

¹⁷ Pekiupusen ami a si Amang Kasuruan wo a si Yesus Kristus, Apo'ta e méé mai ing kaketeran wo ing kaincayaan an até miow wosama' kawooan iow méma' im pakasa sé loor wo manuwu' in andumoro' sé loor.