2 Petrus 3 - En Taar Weru a nunuwu' é Tontemboan

Si Apo' Yesus maai sumawel

¹ Poo-poow sé icaupusku, en surat aipaticku anio' ai camu, suratkuo ing karua. Asé rua surat aipaticku itu, aku rumaméji méé tata'néi e muka' im paweroten iow wosama' kamu mengawerot maké i ngaas weresi.

² Icasalé'ku kata'néian iow en taar sé aicuao é nabi le'nas indior wo ka'i mena'né-na'néi em perénta i Apo' Yesus si Lumolowirta, sé aicuao é ruru'du'an-Na ai camu.

³ Kataré-taré si musti kailekan iow tana'i: asé endo-endo matawio kaka'puan ing kayo'baan, mapaturu' oka mai sé tou eng katouan éra pakakawasan ing kasalé'an in owak éra in esa sé ra'ica wutul, séra maai oka suméro' icamu.

⁴ Icua éra oka tana'i, “Aijanji i Kristus sapaoka Sia maai sumawel. Kéitu réén akar intarépé' ra'ipé' mai ako? Sé apo-apo'ta imatéo, taan pakasa sé ang kayo'baan ra'ipé' wana e mawalina, meputépé' tanu asi kataré eng kayo'baan niéma' i Amang Kasuruan.”

⁵ Wo mémang ra'ica kiim éra makailek sapaoka si Amang Kasuruan asaloke' numuwu', en langit makala'us mamuali. Wo Sia ka'i asaloke' numuwu', eng katanaan makala'us mamuali asi rano owo. En dano itu pinaké-Na e méma' eng katanaan.

⁶ Wo si rano ituo ka'i em pinaké-Na en tumeri ing kayo'baan ang karapi in sonop wangko'.

⁷ Taan en langit wo eng kayo'baan intarépé' pakatéirané' i nunuwu'-Na itu, en tunun in api sa. Intarépé' en langit wo eng kayo'baan pakatéirané' akar asi endo sé tou léwo' akimen wo patén-Na.

⁸ Taan é poo-poow sé icaupusku, awéan esa si musti pena'né-na'néien iow sapaoka am beren i Amang Kasuruan sangando meputé in sangariwu ngata'un, kuma'pa sangariwu ngata'un meputé wo en sangando.

⁹ Awéan tou mawerot si Amang Kasuruan mauré-urépé' lumekep in janji-Na sapaoka si Kristus maai sumawel, taan en ulitna Sia talesen mengento-ngento' icamu mape'dis ampa'paan ra'ica icasalé'-Na sa awéan esake' ai camu meta'up im papaté. Taan en icasalé'-Na wosama' pakasa in tou ra'io mengéma-ngéma' ing kamesé-meséaan wo maréng sumawel méma' ing kasalé'an-Na.

¹⁰ Taan kawisa si Apo' Yesus maai sumawel ra'ica wana e makailek ampa'paan Sia maai tanuoka rombit. Wo asi endo itu en langit icatala oka parapiten in erut taténgé keli wo pakasa sé an langit makatunu-tunu oka, taniitu ka'i eng kayo'baan wo pakasa sé an untepna makaka'pu-ka'pu oka.

¹¹ Anaé, sa em pakasa pakateri-terin oka tanu siitu, tumambisa réén kamu musti menonou intarépé'? Tantu musti menonou le'nas wo le'tek a si Amang Kasuruan.

¹² Wo ang karoro'an iow mengento-ngento' in endo itu, musti pengéma-ngémaan iow sé icasalé'-Na wosama' si endo itu maayo mario-rior. Asi endo itu en langit makatunu-tunu wo pakasa sé an langit rumano ampa'paan ing kapaso' in api.

¹³ Taan entoonta en langit weru wo eng kayo'baan weru si aijanji i Amang Kasuruan ai cita. A mangé mbitu, wayake' sé tou maéma' in sususuien wutul i Amang Kasuruan.

¹⁴ Ampa'paan in ituo é poo-poow sé caupusku, ang karoro'an iow maento-ento' im pakasa itu mamuali, kamu musti rumaméji menonou le'nas wo ra'ica wana kaséaan an dior i Amang Kasuruan wo meeluran ang karapi-Na.

¹⁵ Anggapeno mio' eng katalesenan i Casuruanta itu iméé témpo a sé tou e mape'dis wo makéré ing kalowiran. Si Paulus poowta si ipaupu-upus ka'i matico tanu siitu ai camu imaké ing kapinteran a si Amang Kasuruan owo.

¹⁶ Si Paulus matic andumoro' in itu am pakasa in suratna. Wo an surat-suratna itu awéan sé ra'ica kaangéan, akar sé tou sé ra'ica makailek andumoro' in itu wo sé tou ra'ica keter em paémanen a si Amang Kasuruan, séra mengasali'si' im peangé-angén i Paulus itu. Taniitu ka'i andumoro' in Taar i Amang Kasuruan ang kitap-kitap walina, pengasali'si' éra. Sé niéma' éra itu makawali séra am papaté éra in esa.

¹⁷ Taan kamu é poo-poow sé icaupusku, kailekano miow andumoro' sé itu. Ampa'paano in itu, mareti-retio mangé in sususuien é guru ra'ica wutul itu, wosama' kamu ra'ica kumiit in sususuien éra wo kamu ra'ica mekar im paémanen iow.

¹⁸ Taan aweso taré kamu makaawes mendam ing kamang aitambér i Amang Kasuruan, wo makalébéo makatuus si Yesus Kristus, Apo' wo si Lumolowirta. Ai Siake' pakasa e rarayo wo en sisiri' intarépé' akar ing kauré-uré. Ulit.