2 Petrus 2 - En Taar Weru a nunuwu' é Tontemboan

Mareti-reti andumoro' in sususuien é guru ra'ica wutul

¹ Indior, an uner é tou i Amang Kasuruan, imapaturu'o sé nabi ra'ica wutul. Tanu siituo ka'i an uner iow, mapaturu' oka mai ka'i sé guru ra'ica wutul. Em paangé-angén éra en sumusui in sususuien mengasélé'kow si mengawali sé tou am papaté. Sé guru ra'ica wutul itu mengakélong si Apo' Yesus si Makakawasa si tumu'buso ing kamesé-meséaan éra. Ampa'paano in itu, séra makala'us oka patén.

² Wo kelian sé tou kumiit oka ing katouan é guru ra'ica wutul itu sé makiit ing kasalé'an in owak sé ra'ica loor. Wo ampa'paano sé pinengaéma' éra itu, kelian tou mojat oka in sususuien wutul i Amang Kasuruan.

³ Ampa'paan sé guru ra'ica wutul itu longi' in doit, séra masisil in sisisilen sé niéma' éra in esa torona muwak icamu. Ampa'paano sé niéma' éra itu, en ukuman éra uréo keli aitu'tulo i Amang Kasuruan wo em papaté éra ra'io ipauré-uré.

⁴ Sé malaékat indior sé mengaéma' ing kamesé-meséaan ra'ica ampungan i Amang Kasuruan, taan iténdél-Na séra an api si ra'ica mape'de-pe'del akar ing kauré-uré. Séra yuntep ang kepal rarem wo riréimbeng en se'sek am bitu akar asi endo Sia mai makim pakasa in tou.

⁵ Taniitu ka'i sé tou indior an jaman i Nuh, sé ra'- ica makiit ing kasalé'an i Amang Kasuruan, séra niukum-Na ang karapi in sonop wangko'. Wo sé tou linowir-Na wayake' si Nuh ang karapi é pitu tou, ampa'paan sia makua in sususuien wutul i Amang Kasuruan wosama' sé tou musti menonou kumiit ing kasalé'an i Amang Kasuruan.

⁶ Tanu siitu ka'i si Amang Kasuruan imukum sé tou sé ra'ica makiit ing kasalé'an-Na ang kota Sodom wo Gomora. Eng kota éra niukum-Na in api, akar séra im baya makatunu-tunu. Niéma'-Na taniitu wosama' séra mamuali tata'néi a sé tou sa, sé ra'ica makiit ing kasalé'an-Na.

⁷ Taan si Lot linowir i Amang Kasuruan, ampa'paan sia tou si mengaéma' im butul an dior-Na. En até i Lot ra'ica mento' mawendu ampa'paan im paémaan é tou sé ra'ica makailek in ukum wo asalo makiit ing kasalé'an in owak sé ra'ica loor.

⁸ Si Lot tou maéma' im butul itu makaento' an uner éra wo susur in endo penéré-nérénna wo em pelinga-linganna asaloke' sé léwo', siituo en aténa uli-ulit mawendu.

⁹ Anaé, ro'na kailekanta sapaoka si Amang Kasuruan tumawang sé tou sé masiri' Sia an tutuw séra am pangepé'an, wo sume'sek sé tou léwo' in ukumen asi endo Sia mai makim pakasa in tou.

¹⁰ Wo eng kataré-taré akimen-Na, sé tou sé asalo makiit ing kasalé'an in owak sé ra'ica wutul ampa'paan kasalé'an in esa wo maroros ing kawasa i Amang Kasuruan. Sé guru ra'ica wutul itu ra'ica wana eng kaindé'an wo tirayo akar séra ra'ica maindé' maroros pakasa sé menonou an sorga sé iparayo wo pasiriin.

¹¹ Sédangkan sé malaékat, mandé eng kaketer éra wo eng kawasa éra ilumébé mai wo sé guru ra'ica wutul itu, séra ra'ica brani tumudu mapaké i nunuwu' maojat a sé pakasa sé menonou sé iparayo-rayo wo pasiri-siriin an sorga an dior i Amang Kasuruan.

¹² Taan sé guru ra'ica wutul itu tanuoka sé binatang ra'ica ningaasan, meputé wo sé binatang asalo ayanak en tangkaan wo patén. Séra maroros sapa sé ra'ica kailekan éra, wo ampa'paano ing kaléwo-léwo'an sé niéma' éra ituo, séra in esa ka'i patén oka kaputé é binatang ra'ica papiaran.

¹³ Wo sé guru ra'ica wutul itu makéré oka ing kawenduan tanu pepe'dis asi kaléwo-léwo'an sé niéma' éra. Mandé ka'i endo, icasalé' éra mengaéma' sé andumoro' ing kasalé'an in owak éra in esa sé ra'ica wutul. Séra itu tanuoka noo wo seringa sa séra lumukut kuman mewali-wali wo icamu, ampa'paan em peri éra karican oka mai.

¹⁴ Em beren éra masalé' menéré-néré sé wéwéné akar masalé' mengabersina wo ra'ica mengasuut mengaéma' ing kamesé-meséaan. Wo séra matawér sé tou ra'ipé' talos maéman a si Apo' Yesus wosama' icasélé'kow. En até éra itu manaramo menonou ang kalongi'an. Wo séra ituo sé tou kinutuk.

¹⁵ Séra itumela'uo in lalan karondoran akar séra icasélé'kow. Séra kumiit in lalan winayaan i Bileam toyaang i Beor si masalé' keli materima roit tanu laasa ing kaléwo-léwo'an.

¹⁶ Taan ampa'paano ing kaléwo-léwo'an sé niéma' i Bileam itu, sia icae'bow keli i Amang Kasuruan. Wo émaan i Amang Kasuruan si keledai rumoma' tanuoka im pakaroma' é tou wosama' si nabi itu ra'ica iméma' in léwo'.

¹⁷ Sé guru ra'ica wutul itu, tanuoka im palemboian in dano imaperao kuma'pa tanuoka ing kambung riréimbeng iwalike' in deges repet. Séra itu aitu'tulo i Amang Kasuruan tampa ang kariréimbengan ulit.

¹⁸ Séra menganuwu' mapaké i nunuwu' mengaangkai in owak wo ra'ica wana torona. Wo em pasusui éra ka'i andumoro' ing kasalé'an in owak mabersina en tumawér sumawel sé tou sé ra'ipé' uré icumesot an uner é tou sé mengakiit in sususuien ra'ica wutul itu.

¹⁹ Sé guru ra'ica wutul itu jumanji sapaoka sa kiiten é tou en sususuien éra itu, sé tou itu ra'ica kawasan in atoran-atoran wo ro'na méma' sapake' sé icasalé' éra. Taan sé guru ra'ica wutul itu, séra in esa meputé wo sé ata' ampa'paan séra kinawasa ing kasalé'an in owak si léwo'. Si séi eng kinala i tou icumawasa, sia imamualio ata asi tou icumawasa itu.

²⁰ Sé tou itu isumangkumo makatuus si Yesus Kristus, Apo' wo Lumolowirta, séra icawekaro ang kasalé'an léwo' ing kayo'baan. Taan sa séra maréng sumawel iméma' sé kaléwo'-léwo'an itu, eng kasiwakanna em peri ing katouan éra itu ilumébé léwo' mai asi cataré.

²¹ Aweso taré séra itu ra'ica sumangkum ako makailek in sususuien wutul i Amang Kasuruan, wo taré sumangkumo makailek taan ra'ica kiim makiit im perénta-perénta le'nas si aiwéé i Amang Kasuruan ai séra.

²² Séra itu kaputé wutul in andéan anio' si cumua tana'i: “Si asu kuman sumawel sé aipelua'na wo si wawi linelé'o, mangéke' memilé-miléi sumawel in owakna am pake'bo'an.”