2 Korintus 9 - En Taar Weru a nunuwu' é Tontemboan

En doit tatawang a sé tou lengéi an Yerusalem

¹ En ulitna ra'io sangali ipaticku ai camu andumoro' in doit tatawang en tumawang sé tou le'nas lengéi an Yerusalem.

² Ampa'paan kailekankuo kamu masalé' mengatawang, wo kamu aitirayokuo a sé jamaat a Makedonia. Ipakuaku ai séra sapaoka kamu an sangkum in Akhaya tu'tulo méé in doit tatawang tumo'tolke' mai asi ta'un ilumangkoi. Wo eng kaincayaan iow imuwaso in até é kinakelian ai séra e mekiit méé roit tatawang.

³ Intarépé' yutusku si Titus wo sé rua poow itu mangé ai camu, ampa'paan kamu aitirayoo ami ai séra anaé ra'ica kiim ami e rarayo itu mara'i-ra'ike'. Anaé, lébé loor sa kamu tumu'tulo, tanu si aicuao ami ai séra sapaoka kamu wutu-wutul tu'tulo méé in doit tatawang.

⁴ Ampa'paan sa awéan tou a Makedonia kumiit ang karapiku maai ai camu sa, wo sérén éra sapaoka kamu ra'ipé' tu'tul, kami e malawi'. Ampa'paan aicua amio ai séra sapaoka kamu wutu-wutul percayan ami. Wo kamu ka'i in esa e malawi'.

⁵ Ampa'paan in ituo pawerotenku perlu mutus angé telu poow rumior angé a yaku. Tawangen oka éra kamu en tumu'tul in doit tatawang si aijanjio miow, wosama en doit tatawang itu tinu'tulo an tutuw ami imayo. Wo in taniitu, en doit tatawang iow itu wutu-wutul mamuali wéwéé ang karapi lekep en até wo ra'ica pinalesé'.

Mééo mio' ang karapi arui en até

⁶ Wéanio' rékén en anio': Si tou imuras in lulumbo wayake' im pira, tantu en upuunna wayake' im pira. Taan si tou imuras in lulumbo kumeli-keli, tantu en upuunna kumeli-keli.

⁷ Sa woo ro'na si esa wo si esa tou musti musé' an até e mengawéé. Tioo manesel mengawéé kuma'pa ampa'paan pinelesé'. Ampa'paan si Amang Kasuruan mengaupus sé tou sé mengawéé ang karapi in arui en até.

⁸ Si Amang Kasuruan makawoo tumambérai ing kamang kumeli-keli ai camu, akar sé paperlun iow am baya-waya imaaweso. Wo in taniitu lébé kawooan iow méma' im pakasa sé loor.

⁹ Ang Kitap Le'nas aipatic in tana'i andumoro' i Amang Kasuruan, “Sia e mengawéténg wo mengawéé a sé tou lengéi, sé niéma'-Na itu wutul wo awéan melala'us akar ing kauré-uré.”

¹⁰ Si Amang Kasuruan en tumu'tul in lulumbo torona i menganguma wo tumu'tul ing kakanen eng kanenta. Taniitu ka'i tu'tulen-Na wo émaan-Na oka makeli en lulumbo miow, wosama' kamu tatap mengéma-ngéma' im butul.

¹¹ Wo in taniitu émaan-Na oka kamu masiya' am baya-waya akar kamu meméé-méé ang karapi in lekep en até. Wo sé peméé-méé miow méma' oka keli en tou an Yerusalem kumua i makapulu'sama' a si Amang Kasuruan an tutuw ami maali mangé si aiwéé miow itu ai séra.

¹² Ampa'paan en tatawang si aiwéé miow anio' ra'ica asalo mawes sé imaina' asé tou le'nas, taan méma' oka keli en tou kumua i makapulu'sama' a si Amang Kasuruan.

¹³ Wo asi kasamaan in até sé aituru' miow itu, kelian oka en tou an Yerusalem rumayo si Amang Kasuruan ampa'paan séra isumeréo icamu wutu-wutul menonou makiit wutul in Abar Kaaruien andumoro' i Yesus Kristus. Wo ka'i séra rumayo si Amang Kasuruan ampa'paan kamu wutul lekep en até mawéé in tatawang ai séra wo a sé pakasa in tou walina.

¹⁴ Wo kamu isombayang wo lelon oka éra, ampa'paan séra isuméré in upus aitambér i Amang Kasuruan si lumepe- lepet ai camu.

¹⁵ Mayoo kita kumua i makapulu'sama' a si Amang Kasuruan ampa'paan ra'io icakua en aiwéé-Na itu.