2 Korintus 8 - En Taar Weru a nunuwu' é Tontemboan

En doit ipatawang é tou maéman a si Kristus

¹ Poo-poow, icasalé' ami kailekan iow andumoro' tambisa en upus aitambér i Amang Kasuruan a sé jamaat a Makedonia.

² Séra pinangepé'ano ing kawenduan-kawenduan uter. Taan an uner ing kawenduan itu, eng kaaruian in até éra mengawe-ngawes wo séra méé roit ipatawang a sé tou walina ang karapi in lekep en até. Mandé ka'i séra lengéi keli, en até éra siya' mengawéé.

³ Yaku ro'na méé ing kasairian ai camu sapaoka séra imééo kumiit ing kawooan éra, en ulitna ilumébéo mai asi kinawooan éra. Wo séra mawéé ang karapi in lekep en até.

⁴ Séra meki-kiupus ai cami sa woo ro'na séra kumiit méé ipatawang a sé tou le'nas an Yerusalem, ampa'paan en itu kamang ai séra.

⁵ Si aiwéé éra itu lumébé-lébéo mai asi pinaarap ami. Iwéé era en owak éra kataré-taré a si Amang Kasuruan, kumawus in itu sarakan éra en owak éra ai cami. Séra iméma' tanu siitu kumiit ing kasalé'an i Amang Kasuruan.

⁶ Ampa'paan in ituo, linesé' ami si Titus mangé ai camu wo lumekep in sumuun in doit ipatawang anio'. Ampa'paan siao eng kataré tumo'tol in tawoien anio' an uner iow.

⁷ Kamu siya' am baya-waya: siya' am paémanen, siya' a roroma', siya' ang kakailekan, siya' am pakasa in tawoien, wo siya' ang kaupusan iow ai cami. Ampa'paan in itu, lébé loor ka'i kamu siya' andumoro' i mengawéé ipatawang a sé tou walina.

⁸ Sé ipakuaku andumoro' in doit ipatawang itu, ra'ica esa perénta ai camu. Taan en icasalé'ku kakailekan iow tambisa eng kaincayaan é tou walina en tumawang sé kakéléna, akar kamu ka'i kumiit tumawang iséra. Wo in taniitu icasalé'ku suméré sapaoka kamu uli-ulit mengaupus sé tou walina.

⁹ Ampa'paan kailekano miow en upus aitambér i Apo'ta Yesus Kristus ai camu: Mandé ka'i Sia siya', taan torona ing kapentingan iow, niéma'-Na en owak-Na malengéi, wosama' kamu masiya'.

¹⁰ Kiit im bewerotku, an témponao lekepen iow sapa sé niéma'o miow tumo'tol asi ta'un lumangkoi. Ampa'paan icamuo eng kataré-taré merot wo tumo'tol in tawoien mengawéé roit ipatawang.

¹¹ Wo intarépé' ilala'uso em pengaémaan iow kiit ing kawooan iow. Kamu maincaya' an tutuw kamu mawasa sumuun roit ipatawang, anaé intarépé' maincaya'o mangé en lumekep in sumuun in doit ipatawang itu.

¹² Sa kita mawéé ang karapi in lekep en até, teriman oka i Amang Kasuruan sapa sé aiwééta kiit ing kawooanta. Ampa'paan si Amang Kasuruan ra'ica kawisa mako tumuntut ai cita e méé si ra'ica kawooanta.

¹³ Yaku ra'ica mawasa mawes im pamuléngén iow wosama' em pamuléngén é tou walina maporak, taan icasalé'ku, kita mewali-wali tumawang im paperlun é tou walina kiit ing kawooan i esa wo si esa, wosama' puté em pamuléngén.

¹⁴ Anaé, aweso taré eng kalébéan iow intarépé', ro'na mawes en tumawang ing kakurangan éra an Yerusalem. Wosama' ka'i asi témpona sa, sapa eng kalébéan ai séra, ro'na mawes en tumawang ing kakurangan iow. Wo in taniitu puté em pamuléngan.

¹⁵ Pakasa in itu tanu sé aipatic ang Kitap Le'nas: “Si tou sumuun keli, ra'ica wana eng kalébéan. Wo si tou sumuun pira, ra'ica wana eng kainaan.”

Si Titus wo sé rua poow ayutus angé ang Korintus

¹⁶ Icua ami makapulu'sama' a si Amang Kasuruan, ampa'paan an até i Titus winéan-Nao mai ing kasalé'an wangko' en tumawang icamu, an até i Titus meputé wo si an até ami.

¹⁷ Niénan i Titus em pinangilek ami e mangé ai camu, taan ra'ipé' pinangilek ami sia mangé, sia in esa awéano eng kasalé'an wangko' e maangé tumawang icamu.

¹⁸ E maangé ra'ica si Tituske' in esa, yutus ami ka'i si esa poowta maéman mewali-wali wo sia maangé ai camu. Si poowta itu parayo-rayo am pakasa in jamaat ampa'paan en tawoienna makua in Abar Kaaruien andumoro' i Yesus Kristus.

¹⁹ Wo ra'ica siituke', si poowta itu ka'i aituru'o é jamaat eng kumarapi icami an tutuw ami maali in doit ipatawang an Yerusalem. Kami maarap en doit ipatawang itu e mamuali rarayo wo in sisiri' a si Amang Kasuruan wo ka'i mamuali tuus sapaoka kami uli-ulit masalé' tumawang.

²⁰ Kami mareti-reti wosama' ra'ica wana tou e méé ing kaséaan ai cami an tutuw ami murus in doit keli anio'.

²¹ Ampa'paan casalé' ami e méma' im butul, ra'ica an diorke' i Amang Kasuruan taan an dior é tou ka'i.

²² Mewali-wali wo si Titus wo si esa poow, yutus ami ka'i si esa poow walina mangé mewali-wali wo iséra. Si poow itu pinenguri-ngurio niuji, wo kinaséréano ami sapaoka sia masalé' sumémbong. Wo intarépé', sia lébé masalé' sumémbong icamu, ampa'paan sia uli-ulit mercaya icamu.

²³ Si Titus karapiku matawoi en sumémbong ai camu. Wo sé rua poow itu, sé mangé ang karapina, séra sé tou ayutus é jamaat wo sé marayo wo masiri' si Kristus ang karapi im pakaselewir éra.

²⁴ Ampa'paan in itu, ituru'o mio' en upus iow ai séra an tutuw séra maangé ai camu. Wo in taniitu pakasa sé jamaat am bia'i luminga oka in upus iow wo kailekan éra oka kéitu kami tatap marayo-rayo icamu ai séra.