2 Korintus 6 - En Taar Weru a nunuwu' é Tontemboan

Sé wutu-wutul ata i Amang Kasuruan

¹ Ampa'paan kami matawoi mewali-wali wo si Amang Kasuruan, pekiupusen ami imauli-ulit ai camu wosama' tioo paepesen iow im beren en upus aitambér i Amang Kasuruan si tinerimao miow itu.

² Ampa'paan icua i Amang Kasuruan, “Asi témpo si sinisir-Kuo, ico lininga-Kuo, wo asi endo ing kalowiran, ico tinawang-Kuo.” Ta'néien iow sumama-sama', asi ya'sa anioo en témpo sinisir i Amang Kasuruan itu. Wo asi ya'sa anioo si endo ing kalowiran torona miow.

³ Ra'ica kiim ami en tawoien ami pawéan meséa'. Ampa'paano in itu kami rumaméji ra'ica méé alasan a si séike' e méé kaséaan an tawoien ami.

⁴ Aituru'o ami sapaoka am baya-waya kami ata i Amang Kasuruan. Ampa'paan eng kawenduan, eng kasusaan wo ing kawenduan pinendam amio ang karapi in talesen,

⁵ kami papangkuren, yuntep am bui, pinaémbong éra imokoi. Wo kami ra'ica mento' menawo-nawoi, sumangkum ra'ica itumekel wo ka'i ra'ica icuman.

⁶ Mandé ka'i in taniitu, kami menonou ang karapi in até weresi, makailek sé andumoro' in Taar i Amang Kasuruan, talesen, sama' en até. Em paturu' ami sapaoka kami ata i Amang Kasuruan. Wo kami ka'i mamangén a si tatawang i Roh Le'nas wo mengaupus sé tou ang karapi in lekep en até,

⁷ wo mengakua in sususuien wutul. Ipaturu' ami ka'i eng kawasa i Amang Kasuruan si mewali-wali wo icami ang karapi makatimboi in sususuien wutul tanu makatimboi im pakakas ipaperang patéir in owak ami wo ipasundur sé kaséké'. Pakasa en itu tumuru' sapaoka kami ata-ata i Amang Kasuruan.

⁸ Kami pasiriin, taan ka'i iparoro-roros; kami iparayo, taan ka'i ipawa'ba'-wa'ba'. Mandé ka'i kami mengasusui im butul, taan putudun mengauwak.

⁹ En ulitna kami anio' katuusan é keli tou taan sé walina mawerot ra'ica katuusan éra. Kami misi oka imaté, taan kami menonoué'. Mandé kami niokoi, taan kami ra'ica pinaté.

¹⁰ Mandé en até ami wendu, taan kami mengaru-ngarui. Kami kaséréan lengéi, taan keliano sé tou niéma' ami imasiya'. Kami anio' kaséréan ra'ica makaanu in sapa-sapa, taan en ulitna kami makaanuo im baya-waya.

¹¹ Ei tou Korintus! Aicua amio im butu-wutul ai camu wo ra'ica wana em paene-enep. Pakasa sé an untep in até ami aicua amio.

¹² Kami ra'ica tumutuw in até ai camu, taan icamuo en tumutuw in até ai cami.

¹³ Intarépé', mandéo aku maroma' tanu a sé toyaangku in esa: wukaano mio' en até miow tanu in susuli' ai cami.

En sina'u andumoro' in tatawér é tou sé ra'ica maéman

¹⁴ Tioo mengaesa wo sé tou sé ra'ica maéman a si Kristus; en itu ra'ica patus. Ampa'paan en sususuien wutul ra'ica kawisa meesa wo ing kaléwo'an! Wo ra'ipé' wana mako en sendot meesa wo i riréimbeng.

¹⁵ Si Kristus ra'ica kawisa meesa wo si kikiiten é sétang. Awéan réén em puténa sé tou maéman a si Kristus wo sé tou ra'ica maéman a si Kristus?

¹⁶ Awéan réén em puténa walé i Amang Kasuruan wo im paapo'an é opo-opo'? Kita anio' walé paento'an i Amang Kasuruan si menonou. Si Amang Kasuruan in esa icumua: “Mento' oka Aku an uner éra wo menonou mewali-wali wo iséra. Yaku mamuali oka Amang Kasuruan éra, wo séra mamuali oka tou-Ku.”

¹⁷ Ampa'paan in ituo si Amang Kasuruan ka'i icumua, “Tela'uo mio' sé tou ra'ica makatuus si Amang Kasuruan, wo ipataya-tayango mangé en owakmu ai séra. Ra'ica toro misu' in sapake' sé karican keli, wo kamu teriman-Ku oka.

¹⁸ Wo Aku mamuali oka Amangmu, wo kamu mamuali oka toya-toyaang-Ku, taniituo en aicua i Amang Kasuruan si Makakawasa.”