2 Korintus 5 - En Taar Weru a nunuwu' é Tontemboan

Sé tou maéman makéré oka owak weru

¹ Kailekan ami sa en ténda paento'anta, siituo en owakta, ang kayo'baan anio' tongkaren wo icita sinadiaano i Amang Kasuruan esa walé an sorga. Em balé itu ra'ica niéma' ing kama in tou, wo tumang akar ing kauré-uré.

² An tutuw icita makaento' asi ténda anio', icita mangimbulu wo icasalé'ta keli e mangé mento am balé an sorga.

³ Si walé ituo en owakta weru. Sa icita makéré owak weru, eng kaangéanna icita mekarai, icita ra'ica imetangkol.

⁴ Ang kauréta maento' an ténda asi kayo'baan anio', icita mangimbulu ampa'paan uter em pamuléngenta. En itu ra'ica ampa'paan icasalé'ta mekar in owakta asi kayo'baan anio', taan ampa'paan icasalé'ta maké in owak si an sorga owo wosama' en owakta si ro'na maté anio' sawelan mamuali owak menonou akar ing kauré-uré.

⁵ Si Amang Kasuruan in esao en tumu'tul icita en tumerima in owak weru itu. Siao e méé i Roh Le'nas ai cita tanu in titimboian e makéré in owak weru.

⁶ Ampa'paano in itu en até ami kasake' talesen. Kailekan ami eng kauré ami imaento'pé' asi owak anio', em balé ento'an ami mewali-wali wo si Amang Kasuruan tayang wo icami.

⁷ Icami menonou kumiit im paémanen ami a si Kristus, ra'ica kumiit sapa si kinaséréan ami,

⁸ ampa'paan in ituo en até ami talesen. Icami lébé masalé' icawekar asi owak ami anio' wo mento' ang karapi i Amang Kasuruan.

⁹ Ampa'paano in itu raméjin ami mauli-ulit marui in até-Na, an tutuw ami maento' an untep i owak ang kayo'baan anio' kuma'pa an tutuw ami maento' ang karapi-Na an sorga.

¹⁰ Ampa'paano icita im baya uli-ulit sumaru oka an dior i Kristus in akimen wo iesa wo esa tou makéré oka in susuli' kumiit sapa sé pinengaéma'na ang kauré menonou asi kayo'baan anio', loor kuma'pa léwo'.

Si Kristus iméma' icita meeluran wo si Amang Kasuruan

¹¹ Kailekan ami sapa eng kaangéan i maindé' a si Amang Kasuruan, ampa'paan in iituo raméjin ami méé ing kapercayaan a sé tou andumoro' in owak ami. Kailekan wutul i Amang Kasuruan sé an untep in até ami. Wo paarapenku kakailekan iow en até ami.

¹² En anio' icami ra'ica rumaméji marayo-rayo in owak ami ai camu. Taan en icasalé' ami asalo iméé témpo ai camu e rumayo icami wosama' kailekan iow en sumowat sé tou sé asalo imarayo in owak andumoro' sé pakasérén, ra'ica sé an untep in até.

¹³ Sa icami kaséréan tanu tou nganga', en itu ra'ica sapa-sapa. Ampa'paan icami mamuali taniitu en sumelewir si Amang Kasuruan. Wo sa icami kaséréan tanu tou ra'ica nganga', itu torona ing kalooran iow.

¹⁴ Niéma' ami waya en itu ampa'paan en upus i Kristus en icumawasa icami. Wo kailekan ami sa si esa tou maté torona im pakasa é tou, eng kaangéan in itu pakasa in tou imatéo.

¹⁵ Si Kristus imaté torona im pakasa é tou wosama' séra menonou, ra'io ka'i menonou torona in owakna in esa, taan torona si Kristus si imatéo wo tinou sumawel torona éra.

¹⁶ Ampa'paan ituo, icami ra'io ka'i numilai sé tou makiit im pakanilai é tou. Indior icami in esa numilai si Kristus makiit im pakanilai é tou, taan intarépé' ra'io ka'i tanu siitu.

¹⁷ Anaé, si séike' si maesao wo si Kristus, sia wutu-wutul mamualio tou weru. Em peri ing katouan uré ra'io wana ka'i. Pakasa eng katouanna imaweruo waya.

¹⁸ Pakasa in itu tatawoi i Amang Kasuruan. Émaan-Na icita meeluran wo Sia ampa'paano i Kristus. Wo si Amang Kasuruan iméé in tawoien ai cita e makawali waya sé tou meeluran wo Sia.

¹⁹ Si anioo en abar si ipakua ami: Si Amang Kasuruan iméma' sé tou ang kayo'baan meeluran wo Sia ampa'paan si Kristus si maté ang kayu salip. Niéma'-Na en itu ang karapi ra'ica mena'né-na'néi ing kamesé-meséaan éra. Wo yutus-Na kami eng kumua in abar ing kaeluran anio' a sé tou walina.

²⁰ Anaé, icamio sé a yutus i Kristus. Sa kami sumina'u icamu, en itu meputéo si Amang Kasuruan sumina'u. Wo ang karapi i ngaran i Kristus, uli-ulit pekiupusen ami, wosama' icamu meeluran wo si Amang Kasuruan.

²¹ Si Kristus ra'ica wana kamesé-meséaan, taan niéma' i Amang Kasuruan si Kristus e muléng ing kamesé-meséaanta, wosama' icita mamuali tou wutul an dior i Amang Kasuruan ampa'paan i Kristus.