2 Korintus 12 - En Taar Weru a nunuwu' é Tontemboan

Icua i Paulus sé aipapaturu' ai sia

¹ Yaku musti tumirayo andumoro' in owakku, mandé ka'i en itu ra'ica wana torona. Taan icasalé'ku tumirayo andumoro' sé ipapaturu' i Casuruan a yaku.

² Katuusanku si esa tou maéman a si Kristus, sia tumarépé'anke'mai icaangkai angé asi salé' katelu an sorga sangapulu' epat ngata'un ilumangkoio. Ra'ica kailekanku en owakna wutu-wutul icaangkai angé kuma'pa en itu asalo ipapaturu'an, si Amang Kasuruanke' e makailek.

³ Icuaku ka'i sumawel: kailekanku andumoro' i tou itu, taan ra'- ica kailekanku en owakna wutu-wutul aicaangkai angé kuma'pa asalo esa ipapaturu'an. Wayake' si Amang Kasuruan e makailek.

⁴ Si tou itu tumarépé'anke'mai icaangkai angé an Firdaus wo iluminga inunuwu sé ra'io icakua, wo ra'ica kasisilan é tou.

⁵ Wo si patirayoku andumoro' i tou itu, ra'ica ipatirayoku en owakku. Taan sa aku tumirayo andumoro' in owakku in esa, en tirayoku wayake' andumoro' sé ra'ica keter an owakku.

⁶ Sa woo aku masalé' rumayo in owakku in esa, yaku ra'ica tou bodok, ampa'paan em pakuaku sé wutul. Taan aku tumang in owak wo ra'ica tumirayo sé aipapaturu itu, ampa'paan ra'ica casalé'ku kamu en numilai yaku ilumébé wo in sapa sé sinéréo miow kuma'pa sé liningao miow a yaku.

⁷ Taan wosama' aku ra'ica talos tumirayo ampa'paan pinapaturu'an ing kakaya'kaan itu, anaé an owakku winéan esa tutuné. En itu aiwéé i kikiiten é sétang e méma' aku mawendu wosama' ra'ica tumirayo.

⁸ Makateluo aku mekiupus a si Casuruan wosama' en sakit itu angkaienai a yaku.

⁹ Taan en aisowat i Casuruan a yaku, “En upus aitambér-Ku aweso ai co. Ampa'paan eng kawasa-Ku makaleke-lekep oka sa ko ra'ica keter.” Ampa'paan in itu yaku lébé masalé en tumirayo sé ra'ica keter an owakku. Ampa'paan an tutuw aku ra'ica keter, eng kawasa i Kristus awéan mewali-wali wo yaku.

¹⁰ Ampa'paan in ituo en atéku arui an tutuw aku ra'ica keter. Yaku ka'i arui mandé ipaséro', mawendu, pinaokoi, ang kasusaan ampa'paan makiit asi Kristus. Ampa'paan an tutuw aku ra'ica keter, yaku maketer ampa'paan i Kristus.

Em paindé-indé' i Paulus andumoro' é jamaat ang Korintus

¹¹ Yaku rumayoo in owakku in esa tanuoka sé tou bodok. Taan kamuo sé ilumesé' akar aku méma' tanu siitu. En ulitna icamuo si musti mengarayo yaku tanu siitu. Ampa'paan mandé ka'i aku anio' ipakua é tou ra'ica makailek in sapa-sapa, taan am baya-waya yaku ra'ica kaindoan é ruru'du'an wangko' itu.

¹² An tutuwku mewali-wali wo icamu, sinéréo miow in esa en tuus sapaoka aku anio' ruru'du'an, ampa'paan niéma'kuo sé tuus wo sé kakaya'kaan wo sé pengéma-ngémaan wangko'. Niéma'ku pakasa en itu ang karapi in talesen.

¹³ Paweroten iow réén ra'ipé' awes em pakatawangku ai camu? Pakasa sé niéma'ku ai camu itu meputé sé niéma'ku a sé jamaat walina. Sa aweané' si ra'ipé' niéma'ku ai camu, tantu si esa anio', yaku ra'ipé' kawisa mako irumu'du' icamu tumanggong ing kaperluanku. Sa en itu nianggap iow meséa', ampunganai aku.

¹⁴ Intarépé' aku mawasa-wasao ing kumatelu maai ai camu. Wo ra'ica icasalé'ku sumusa icamu, ampa'paan aku maai mangéré in owak iow, ra'ica mai mangéré ing kasiyaan iow. En ulitna ra'ica sé toyaang e mangaéré roit e mongkos sé matu'ana, taan sé matu'ao e musti mangaéré roit e mongkos sé toyaangna.

¹⁵ Anaé, ang karapi in arui en até icasalé'ku maké im pakasa sé a yaku en isumelewir icamu, lébé-lébé eng katouanku in esa ka'i icasalé'ku iwéé ai camu. Kamu icaupusku keli, kéitu réén makaina'ke' en upus iow a yaku?

¹⁶ Kailekan iow sapaoka aku ra'ica kawisa sumusa icamu an tutuwku mewali-wali wo icamu. Taan awéan tou an uner iow makua sapaoka aku pinter mengasali'si' i nunuwu' wo mengauwak e mindo ing kauntungan ai camu.

¹⁷ Asé tou sé ayutusku ai camu, awéano réén ai séra sé mindo ing kauntungan ai camu?

¹⁸ Airu'du'kuo si Titus mai ai camu, wo rumu'du' si poow esa am paémanen walina mangé mewali-wali wo isia. Mindo réén ing kauntungan si Titus ai camu? Em perina wo em periku meputé wo taniitu ka'i em pakatawoi.

¹⁹ Ang kauré miow maca in surat anio', weroten réén miow sapaoka kami asalo méla in owak an dior iow? Ra'ica tanu siitu! Kailekan i Amang Kasuruan sapaoka pakasa sé ipakua ami itu makiit ing kasalé'an i Kristus. Poo-poow sé icaupusku, sapa sé niéma' ami, en itu e méé ing kaketeran am paémanen iow.

²⁰ Em ipaindé-indé'ku sapaoka an tutuw aku maai ai camu kéréanku kamu ra'ica tanu im pinaarapku, wo kaséréan iow ka'i aku ra'ica tanu si paarapen iow. Ipaindé-indé'ku oréoka awéan sé mengindo-indoan roma', mengkanatan, mengkae'bowan, mengawerotke' in owakna in esa, mengaroros, memaa-maar a sé tou andumoro' sé raica wutul, mengatirayo wo mengalicoko.

²¹ Em paindé-indé'ku an tutuwku maai sa, yaku iwawa' i Amang Kasuruan an dior iow wo aku mawendu ampa'paan kelian sé an uner iow indior sé mengaéma' ing kamesé-meséaan wo ra'ipé' mape'dis mengéma-ngéma' sé karican, mengabersina, wo mengaéma' ing kasalé'an in owak sé ra'ica wutul.