2 Korintus 11 - En Taar Weru a nunuwu' é Tontemboan

Si Paulus wo sé ruru'du'an ra'ica wutul

¹ Yaku masalé' rumayo toyo' in owakku mandé en itu tanuoka im paémaan é tou bodok, anaé pekiupusenku ai camu wosama' lumesen toyo' luminga sé icuaku. Ulit kamu taloso talesen a yaku!

² Kamu icae'bowku tanuoka si Amang Kasuruan manganat icamu. Kamu tanuoka si esa mangala'un si ra'ipé' sumangkum ako tumekel ang karapi i tuama, si aijanjikuo icawéng wo si esa tuama, siao si Kristus.

³ Taan en caindé'ku em bewerot iow kauwakan akar ra'io ka'i wutu-wutul le'tek a si Kristus, kaputé i Hawa indior ka'i kinatawéran i ula' ampa'paano im pakauwak i ula' itu.

⁴ Ampa'paan kamu pakasérén talesenke' tumerima si esa tou mai wo masusui ai camu andumoro' in sususuien si ra'ica meputé wo sé ipasusui ami andumoro' i Yesus. Wo kamu ka'i tumerima i roh si ra'ica meputé wo i Roh Le'nas kuma'pa Abar Kaaruien si wutu-wutul ra'ica meputé wo in abar kaaruien si sumangkumo tinerima miow ai cami.

⁵ Yaku uli-ulit ra'ica mendam lébé wawa' wo sé ruru'du'- an wangko' itu.

⁶ Mandé ka'i aku ra'ica pinter maroma', taan andumoro' ing kakailekan yaku ra'ica tou bodok. Aituru'o ami en itu ai camu am pakasa in témpo wo am baya-waya.

⁷ An tutuwku makua in Abar Kaaruien i Amang Kasuruan ai camu, yaku ra'ica imangilek ongkos ai camu mandé waya'ke' im pira. Wo in taniitu iwawa'ku en owakku e rumangka' icamu. Meséa' réén sé niéma'ku itu? Tantu ra'ica!

⁸ An tutuwku mengaselewir ai camu, yaku mengakéré roit asé jamaat an sangkum walina. Ro'na icua sapaoka rinombitkuo en doit é jamaat walina itu en sumelewir ai camu.

⁹ Wo an tutuwku lengéi an uner iow, ra'ipé' kawisa mako aku sumusa mandé esake' tou ai camu. Pakasa sé paperlunku tinu'tul é poo-poow an esa paémanen sé imai a Makedonia owo. Tinéiranku sumama-sama' en owakku wosama' aku ra'ica mamuali pamuléngen iow an sapa-sapaanke', wo émaanku oka melala'us tanu siitu.

¹⁰ En darayoku itu ra'ica toro kalaan é séike' mangé an Akhaya, ampa'paan en sususuien wutul i Kristus an untepo in atéku.

¹¹ Kéitu réén icuaku in taniitu? Ra'ica réén icaupusku kamu? Kailekan i Amang Kasuruan kamu icaupusku.

¹² Sapa em pinengaéma'ku intarépé' si ra'ica tumerima in tatawang ai camu pengéma-ngémaanku oka. Wo in taniitu sé ruru'du'an wangko' itu ra'io toro ka'i rumayo in owak wo kumua em pengaémaan éra meputé wo sé niéma' ami.

¹³ Ampa'paan sé tou tanu siitu, sérao sé ruru'du'an ra'ica wutul. Séra matawoi mauwak ang karapi i mengaéma' in owak tanuoka woo ruru'du'an i Kristus.

¹⁴ Kamu ra'ica sangali mangaya'ka' andumoro' in itu. Ampa'paan si kikiiten é sétang mengaéma' in owak tanuoka woo si malaékat in sendot!

¹⁵ Anaé, tioo ka'i kamu mangaya'ka' sa sé mengaselewir asi kikiiten é sétang mengaéma' in owak tanuoka woo sé mengaselewir im butul. Eng kasiwakana séra tumerima in susuli' sé patus teriman éra kiit si pinengaéma' éra.

Si Paulus méé tuus sa sia wutul ruru'du'an i Yesus

¹⁶ Icuaku sumawel: Tioo awéan tou mawerot yaku anio' tou bodok. Taan sa wutul awéan tou mawerot yaku tanu siitu, iwayao mai aku tou bodok anio' tumirayo toyo'.

¹⁷ Ipatirayo-tirayoku sapa sé niéma'ku, wo sapa si aicuaku itu ra'ica airu'du' i Casuruan taan si aicuaku itu tanu ing kanaramen si pengakua i tou bodok e matirayo in owak in esa.

¹⁸ Ulit keli en tou marayo-rayo in owak éra makiit ing kasalé'an ing kayo'baan, wo icasalé'ku ka'i tumirayo in owak.

¹⁹ Ampa'paan kamu talesen masaru sé tou bodok, kamu tumalosoo taré eng kapinter!

²⁰ Ipakawayake' miow sé tou sé mengaata icamu, sé mengaindo pakasa in anu miow, sé mengaindo ing kauntungan ai camu, sé mendam irumangka' mai wo icamu, wo sé ra'ica mindé' mengasepé' in amo miow.

²¹ Mandé kai malawi', musti icuaku sapaoka kami maindé'ke' mengaéma' tanu sé pengaémaan éra. Taan sa sé tou walina ra'ica maindé' marayo in owak éra, mandé ka'i kalingaan tanuoka im pakaroma' é tou bodok, yaku ka'i ra'ica maindé' rumayo in owak.

²² Ipakua éra sapaoka séra tou Ibrani. Yaku ka'i tou Ibrani! Ipakua éra ka'i séra tou Israel. Yaku ka'i tou Israel! Ipakua éra ka'i sapaoka iséra taranak i Abraham. Taniitu ka'i aku taranak i Abraham!

²³ Wo ipakua éra sapaoka séra sé tou maselewir si Kristus. Yaku maroma' tanuoka tou nganga', yaku mengaselewir asi Kristus ilumébé mai ai séra. Yaku matawoi ilumébé mai wo ing kare'dem éra, makakeli-keli ipauntep am bui, makakeli-keli pengaokoien, wo makakeli-keli matawio imaté.

²⁴ Makalimao aku pinaokoi é tou Yahudi pengasamboken wo susur aku in samboken, makatelu ngapulu' siow eng kakelina.

²⁵ Makateluo aku pinangkur im beka', makasa aku winangkil im batu wo makatelu sumangkum mai eng kapal misio kumandas, wo makasa aku ipawolé-woléi an uner in ta'sic sangando wo sangawengi.

²⁶ Am bawayaanku makakeli-keli mengakawali ang kawangkuran, tanu mai icawangkur an doyongan sumonop, pengakasua' asé marampok, ipengawangkur é touku Yahudi wo ka'i sé tou ra'ica Yahudi, icawangkur ang kota, icawangkur an tana' kapayasan, icawangkur an uner in ta'sic, wo ka'i pengawangkur é tou sé makua sapaoka séra poo-poowta esa am paémanen a si Kristus mandé en ulitna séra ra'ica maéman.

²⁷ Yaku ra'ica mento' menawo-nawoi akar i makepé, yaku makakeli-keli ra'io matekel, ra'io makan, ra'ica maelep, makakeli-keli ka'i ra'io wana kakanen, kautingan ampa'paan eng karai ra'ica maawes.

²⁸ Wo aluar asé im pakasa itu, susur in endo aku mendam im pamuléngen in até mawerot ing kaadaan é pakasa in jamaat.

²⁹ Sa linganku awéan tou an jamaat ra'ica keter, yaku ka'i makapendam ra'ica keter. Sa linganku awéan tou icasangkil ang kamesé-meséaan, en atéku tanuoka makateri-teri ampa'paan im bendu.

³⁰ Sa aku musti tumirayo in owakku in esa, yaku asalo mengatirayo sé andumoro' sé ra'ica keter an owakku.

³¹ Si Amang Kasuruan, Amang i Apo' Yesus, kailekan-Na aku ra'ica matowo. Irayoo mangé si Amang Kasuruan akar ing kauré-uré.

³² An tutuwku ang kota Damsyik, si gubernur si niangkai i colano Aretas masalé' tumangka' yaku wo irumu'du' sé suraro en tuméir im papalen ing kota itu.

³³ Taan aku ayuntep é kara-karapiku an esa karanjang wo itumpa kiit an jandéla asi ri'dir mésel ing kota itu. Wo in taniitu aku ra'ica kinatangkaan i gubernur itu.