2 Korintus 10 - En Taar Weru a nunuwu' é Tontemboan

Si Paulus méla in tawoienna

¹ Awéan ai camu makua sapaoka aku toloindé' en tumegor sa ang karapi miow, taan branike' tumegor sa mentayangan wo icamu. Ampa'paan in ituo ita'néiku ai camu ang karapi i ngaran i Kristus si ko'kos en até wo sama' en até,

² wo pangilekenku tioo émaan iow aku repet en tumegor icamu an tutuwku maai ai camu sa. Ampa'paan aku mawasa en tumegor in depet sé tou makua icami asalo menonou mengakiit ing kasalé'an ing kayo'baan.

³ Kami wutu-wutul menonoué' ang kayo'baan, taan kami maraméji ra'ica mengakiit im basa ing kayo'baan.

⁴ Em pakakas paperang sé pengapakén ami ra'ica pakakas paperang asi cayo'baan anio' owo, taan em pakakas paperang asi Amang Kasuruan si makakawasa. Wo ang karapi im pakakas paperang itu tongkaren ami em bénténg-bénténg.

⁵ Tangkisen ami em pawasa-wasan léwo' wo tongkaren ami em bénténg-bénténg ing katirayoan é tou sé mengaéma' séra ra'ica makatuus si Amang Kasuruan. Kawasan ami em bewerot é tou wo maali iséra le'tek a si Kristus.

⁶ Wo sa kamu wutu-wutulo le'tek a si Kristus, kami tu'tul mukum pakasa in tou sé ra'ica le'tek a si Kristus.

⁷ Séréno sapa sé an dior iow. Sa tou maéman sapaoka sia anu i Kristus, sia in esa ka'i musti merot icami anu i Kristus kaputéna.

⁸ Ra'ica malawi' aku sa talosoo matirayo ing kawasa si aiwééo i Amang Kasuruan ai cami. Ampa'paan eng kawasa itu aiwéé i Amang Kasuruan e méé ing kaketeran am paémanen iow, ra'ica in tumeri im paémanen iow.

⁹ Ra'ica kiimku paweroten iow sapaoka kamu pangindé-ngindéénku an surat-suratku.

¹⁰ Ampa'paan awéan e makua “E nunuwu' i Paulus an surat-suratna repet keli wo uter, taan sa sia an unerta em perina ra'ica tanu si an surat wo e nunuwu'na ra'ica wana en torona.”

¹¹ Anaé, wayao mio' sé tou manuwu' tanu siitu makailek in tou sapaoka em pengaémaan ami kasake' meputé tanu si aipatic ami an surat si binaca miow. Sérén oka miow an tutuw ami maai ai camu.

¹² Tantu kami ka'i ra'ica brani ipeputé kuma'pa méma' in owak ami kaputé é tou marayo in owak in esa. En ulitna séra bodok ampa'paan séra mengaukurke' in owak éra mengapaké in ukuran in esa. Pengapeputé éra en owak éra ang karapi in owak in esa.

¹³ Taan kami ra'ica tanu siitu. Ra'ica kiim ami marayo sé ang kesot in tawoien si aiwééo ai cami. Kami asalo mengarayo in tawoien si aitantuo i Amang Kasuruan ai cami. Wo kamu sé tou Korintus icauntepo an tawoien ami.

¹⁴ Ampa'paan icamio en diorai maali mai in Abar Kaaruien andumoro' i Yesus Kristus ai camu. Anaé, sa kami tumirayo in owak ampa'paan icamu, kami ra'ica talos tumirayo tanuoka kéndo' kami ra'ipé' sumangkum ako mai ai camu.

¹⁵ Kami ra'ica mengatirayo in tawoien sé niéma' é tou walina an tampa sé ra'ica aitantu ai cami. Taan paarapen ami sapaoka an tutuw em paémanen iow makaketer, makaawes ka'i kamu marayo icami ampa'paan en tinawoi ami an uner iow an sangkum im patawoian si aitantuo i Amang Kasuruan.

¹⁶ Wo in taniitu, kami ro'na kumua in Abar Kaaruien itu a sé tou ang kesot ing Korintus. Wo kami ra'io sangali tumirayo in owak ampa'paan in tawoien é tou walina sé aitantuo in tawoien éra.

¹⁷ Aipatic ang Kitap Le'nas, “Sa awéan tou sé mengasalé' mengatirayo, aweso taré sia tumirayo sapa sé niéma'o i Casuruan.”

¹⁸ Ampa'paan ra'ica si tou mengatirayo in owakna in esa si wutul am beren i Casuruan, taan si tou ipatirayo-tirayo i Casuruan, siao si wutul am beren-Na.