2 Korintus 1 - En Taar Weru a nunuwu' é Tontemboan

En siri'

¹ En surat anio' a yaku owo, Paulus si mamuali ruru'du'an i Yesus Kristus kumiit ing kasalé'an i Amang Kasuruan. En surat anio' aipaticku mewali-wali wo si Timotius poowta an esa paémanen. En surat anio' aicirim ami a sé jamaat i Amang Kasuruan ang Korintus, wo ka'i a sé tou le'nas an Akhaya.

² Pekiupusen ami a si Amang Kasuruan Amangta wo a si Apo' Yesus Kristus en tumambérai in upus wo ing kaeluran ang katouan iow.

Si Paulus kumua i makapulu'sama' a si Amang Kasuruan

³ Mayoo kita rumayo si Amang Kasuruan, Amang i Apo'ta Yesus Kristus. Sia itu Amang si wuta ing kaupusan wo Siao si Amang Kasuruan si mengibo-ibor icita.

⁴ Sia mengaibor icami am pakasa ing kawenduan ami. Sia maibor taniitu wosama' kami ro'na mibor sé tou walina an sapake' eng kawenduan éra, ang karapi im paiboran si tinerima ami asi Amang Kasuruan.

⁵ Keliano eng kawenduan sé pinendam ami mai tanu ing kawenduan si pinendamai i Kristus. Wo ampa'paano i Kristus kami makéré im pangiboran sé kumeli-keli.

⁶ Sa kami makéré ing kawenduan, en itu e méé pangiboran wo ing kalowiran ai camu. Wo sa kami iboren, en itu iboran ai camu ka'i, akar kamu makatalesen sumaru ing kawenduan-kawenduan sé meputé im pinendam ami mai.

⁷ Kamu uli-ulit percayan ami, ampa'paan kailekan ami sapaoka kamu mendamo mai ing kawenduan tanu im pinendam ami mai, anaé kamu tantu makéré oka pangiboran kaputé im pangiboran si sinangkum ami.

⁸ Poo-poow, icasalé' ami wosama' kailekan iow andumoro' ing kawenduan si pinendamo ami an Asia Teké'. Eng kawenduan si winuléng ami itu uter keli ilumébéo asi kinawooan ami, akar kami ra'io wana arapan i menonou.

⁹ Kami uli-ulit makapendam tanuoka im pinonéso in ukumen patén. Taan en itu mamuali wosama' kami ra'ica asalo mercaya in owak ami in esa, taan kasake' maéman a si Amang Kasuruan si tumou sumawel sé tou imatéo.

¹⁰ Siao en lumowir icami asi papaté si kaindéén itu. Wo Siao ka'i en lumowir icami asi endo maai sa, ampa'paan ai Siake' em paarapan ami.

¹¹ Pekiupusen ami ai camu atasanai in sombayang wosama' si Amang Kasuruan tumawang icami. Wo in taniitu sowaten i Amang Kasuruan en somba-sombayang akar keli en tou kumua makapulu'sama' a si Amang Kasuruan ampa'paan ing kamang sé tinerima ami wo ampa'paan in sombayang é tou keli.

Si Paulus ra'ica imamuali mangé ang Korintus

¹² Kami marayo, sapaoka eng katouan ami asi cayo'baan anio', linangkoio ami ang karapi in lekep en até wo rondor en até. Kami menonou tanu siitu wuntulke' im paesaan wo icamu. Siituo eng kasairian in até weresi ami. Niéma' ami en itu, ra'ica ang karapi ing kapinteran é tou, taan ang karapi in upus aitambér i Amang Kasuruan.

¹³ Icua ami tanu siitu ampa'paan si aipatic' ami ai camu asaloke' andumoro' sé ro'na kabacaan wo kaangéan iow. Yaku maarap sa woo ro'na pakasa en anio' kaangéan oka miow im butul.

¹⁴ Intarépé', mandé kamu ra'ipé' talos makailek andumoro' icami, taan an tutuw i Apo' Yesus maai sumawel, kamu tirayo oka ampa'paan kami taniitu ka'i kami tirayo oka ampa'paan icamu.

¹⁵ Ampa'paan im paémanen ituo, asi kataré aku imawasao maangé ing karua ai camu wosama' kéréan iow en upus tatambér makarua lumepet.

¹⁶ En ulitna yaku mawasa maangé woo ai camu am bawayaanku an sangkum i Makedonia, wo an tutuwku maré- ngo mai, tumuli oka ai camu, wosama' kamu ro'na sumémbong a yaku lumala'us im bawayaan maangé an Yudea.

¹⁷ Taan mawalinake' em pawasanku itu, mandé ka'i in taniitu, en itu ra'ica tumuru' sapaoka em pendirianku ra'ica uli-ulit. Tutuw aku imawasa-wasa in itu, yaku ra'ica kumiit ing kasalé'anku in esa, tanu sé tou makua “én” kumawus itu kumua “ra'ica”.

¹⁸ Sa aku jumanji ang karapi i ngaran i Amang Kasuruan si le'tek, en janjiku ai camu itu ra'ica maru-rua wasa.

¹⁹ Ampa'paan si Yesus Kristus, Toyaang i Amang Kasuruan, ra'ica icumua “én” kekawus in itu “ra'ica”. Si Kristus ituo si ayabar i Silas, Timotius wo yaku ai camu. An untep i Kristus asaloke' awéan “én”.

²⁰ Ampa'paan pakasa en janji i Amang Kasuruan, linekepo i Apo' Yesus. Ampa'paan in ituo icuata, “Ulit” a si Amang Kasuruan ampa'paan i Yesus Kristus. Wo icami méma' taniitu wosama' si Amang Kasuruan iparayo wo pasiriin.

²¹ Si Amang Kasuruano in esa iméma' icami wo icamu keter meesa ang karapi i Kristus. Siao en sumisir icita,

²² wo isumégél icita tanu tuus anu-Na. Wo Siao e méé mai si Roh Le'nas an atéta tanu titimboian sapaoka iwéé-Na oka pakasa sé aijanji-Na ai cita.

²³ Si Amang Kasuruan en sairiku ampa'paan kailekan-Na en atéku. Yaku ra'ica mamuali maai ang Korintus, ampa'paan ra'ica kiimku mendu in até miow.

²⁴ Kami ra'ica ilumesé' icamu sapa sé musti émanen iow. Taan kami asalo tumawoi mewali-wali wo icamu wosama' kamu makaaru-arui. Émaan ami taniitu ampa'paan em paémanen iow ketero.