1 Yohanes 4 - En Taar Weru a nunuwu' é Tontemboan

E Roh i Amang Kasuruan wo e roh i kaséké' i Kristus

¹ Poo-poow sé icaupusku, ra'ica toro percayan iow sé im pakasa in tou sé mangaku sa séra awéan Roh i Amang Kasuruan. Taan aweso taré ujin owo mio' séra wosama' ro'na kakailekan sa e Roh ai séra itu uli-ulit asi Amang Kasuruan owo. Ampa'paan kelian nabi ra'ica wutul imapaturu'o wo isumeraro ang kayo'baan anio'.

² Uluren tana'i wosama' ro'na kakailekanta sapaoka e Roh itu Roh i Amang Kasuruan kuma'pa ra'ica: Si tou mangaku sa si Yesus Kristus maai ang kayo'baan mamuali tou, si tou itu makaanu i Roh asi Amang Kasuruan owo.

³ Taan si tou ra'ica mangaku andumoro' si Yesus, sia ra'ica makaanu i Roh asi Amang Kasuruan owo. E roh asi tou itu roh i kaséké' i Kristus. Tantu liningao miow sapaoka e roh itu maai oka wo intarépé' sia ang kayo'baano anio'.

⁴ Toya-toyaangku, kamu itu asi Amang Kasuruan owo. Kamu icumalao sé nabi ra'ica wutul itu, ampa'paan e Roh ai camu itu eng kawasana en lébé wangko' mai wo si roh asi cayo'baan anio'.

⁵ Sé nabi ra'ica wutul itu ang kayo'baan owo, ampa'paan ituo em pakua éra asaloke' andumoro' ing kayo'baan. Wo sé tou menonou ang kayo'baan sé ra'ica makatuus si Casuruan asaloke' mengalinga iséra.

⁶ Kami anio' asi Amang Kasuruan owo. Si tou makatuus si Amang Kasuruan, sia itu mengalinga cami. Taan en tou si ra'ica asi Amang Kasuruan owo, sia ra'ica mengalinga icami. Wo in taniitu ra'ica toro ipeputéta si Roh mawéé in sususuien wutul wo si roh mengasusui in sélé'kow.

En upus i Amang Kasuruan iméma' sé tou meupusan

⁷ Poo-poow sé icaupusku, mayo kita meupu-upusan, ampa'paan en upus itu asi Amang Kasuruan owo. Wo si séike' e meupu-upusan, sia itu asi Amang Kasuruan owo wo katuusan-Na.

⁸ Taan si séi si ra'ica mengaupus, sia ra'ica makatuus si Amang Kasuruan ampa'paan si Amang Kasuruan ituo e makaanu in upus.

⁹ Tana'i en upus aituru' i Amang Kasuruan ai cita: Ayutus-Nao si Toyaang-Na in esa ang kayo'baan anio', wosama' a si Toyaang-Na ituo kita makéré ing katouan.

¹⁰ Si anioo en upus itu: Ra'ica icita si ririor imaupus si Amang Kasuruan, taan Siao si ririor mengaupus icita. Ampa'paan ituo ayutus-Na mai si Toyaang-Na wosama' eng kamesé-meséaanta kaampungan ampa'paan i Toyaang-Na itu.

¹¹ Poo-poow icaupusku, sa tanu siituo en upus i Amang Kasuruan ai cita, kita ka'i musti meupu-upusan angé.

¹² Ra'ica wana tou mandé esake' en sumangkumo isumeré si Amang Kasuruan. Taan sa kita meupu-upusan, si Amang Kasuruan meesa wo icita wo en upus-Na lekep ang katouanta.

¹³ Aiwééo i Amang Kasuruan e Roh-Na ai cita, wo in taniitu kakailekantao eng katouanta meesa wo si Amang Kasuruan wo Sia ka'i meesa wo icita.

¹⁴ Wo sinéréo ami in esa wo sinairi ami sa si Amang imutuso si Toyaang-Na mai lumowir ing kayo'baan anio'.

¹⁵ Si séi e mangaku sa si Yesus itu Toyaang i Amang Kasuruan, si Amang Kasuruan kasake' meesa wo isia wo sia ka'i esa wo si Amang Kasuruan.

¹⁶ Kita makatuuso wo mercayao in upus i Amang Kasuruan ai cita. Si Amang Kasuruan itu e makaanu in upus. Si séi si mengaupus sé tou walina, sia itu imeesa wo si Amang Kasuruan, wo si Amang Kasuruan ka'i meesa wo sia.

¹⁷ Wo in taniitu en upus itu malekep ang katouanta, wosama' kita ra'ica maindé' meta'up si Amang Kasuruan asi endo in akimen. Kita ra'ica oka maindé', ampa'paan eng katouanta ang kayo'baan anio' puté wo eng katouan i Apo' Yesus.

¹⁸ Sa kita awéan upus, kita ra'ica wana eng kaindé'an, ampa'paan en upus si lekep itu kuma'pu ing kaindé'an. Sé tou makapendam in indé', ampa'paan sia maanggap in owakna patus in ukumen. Anaé, si tou maindé' tanu siitu ra'ipé' mendam in upus i Amang Kasuruan si lekep itu.

¹⁹ Kita mengaupus ampa'paan si Amang Kasuruan irumioro mengaupus cita.

²⁰ Sa awéan tou kumua, “Yaku mengaupus si Amang Kasuruan,” taan icasuutna si poowna, sia itu tumowoo. Ampa'paan si séike' si ra'ica mengaupus si poow pakasérénna, tantu ra'ica kawisa sia mengaupus si Amang Kasuruan si ra'ica kaséréanna.

²¹ Wo si anioo em perénta si tinerimatao a si Amang Kasuruan: Si séike' e mengaupus si Amang Kasuruan, sia ka'i musti mengaupus sé poo-poowna.