1 Yohanes 1 - En Taar Weru a nunuwu' é Tontemboan

En Taar si mengawéé ing katouan

¹ En surat anio' andumoro' in Taar si mengawéé ing katouan. En Taar anio' awéano asi kataré-taré si liningao wo sinéréo ami in esa. Wo tinimboiano ami ka'i ing kama ami in esa.

² En Taar si mengawéé ing katouan itu mewali-wali wo si Amang an sorga. Sia imayo wo sinéréo ami. Ampa'paan in itu aisairi ami wo icua ami ai camu andumoro' ing katouan akar ing kauré-uré.

³ Intarépé' icua ami ai camu sapa sé sinéréo wo liningao ami ai Sia. Wo in taniitu kamu ro'na menonou meesa wo icami. Wo kita im baya ka'i menonou meesa wo si Amang wo si Toyaang-Na Yesus Kristus.

⁴ Pakasa en anio' aipatic ami wosama' en atéta wutu-wutul arui.

Si Amang Kasuruan itu sendot

⁵ Si anioo en abar sé liningao ami asi Toyaang-Na wo icua ami ai camu, tana'i: Si Amang Kasuruan itu sendot, wo ai Sia itu uli- ulit ra'ica wana kariréimbengan.

⁶ Sa icuata sapaoka kita menonou meesao wo Sia taan eng katouanta ang kariréimbenganné', kita itumowoo wo ra'ica mengaéma' in sususuien wutul.

⁷ Taan sa kita menonou an sendot meputé ka'i wo Sia an sendot, tantu kita menonou imeesa wo sé tou walina. Wo pakasa eng kamesé-meséaanta wu'asan oka in enda' i Yesus Toyaang-Na.

⁸ Sa icuata sapaoka kita ra'ica wana kamesé-meséaan, kita imuwako in owakta in esa wo en sususuien wutul ra'ica an atéta.

⁹ Taan sa pangakunta eng kamesé-meséaanta ai Sia, tantu kita ampungan-Na. Sia wutu-wutul le'tek an janji-Na wo ra'ica marapit, ampa'paan in ituo ampungan-Na oka eng kamesé-meséaanta wo le'nasen-Na oka kita asé kaléwo-léwo'an sé niéma'ta.

¹⁰ Sa icuata sapaoka kita ra'ica kawisa mako méma' ing kamesé-meséaan, en itu meputéo icuata Sia itu kotowo wo en Taar-Na ra'ica an atéta.