1 Timotius 6 - En Taar Weru a nunuwu' é Tontemboan

En sina'u a sé ata sé maéman a si Yesus

¹ Awéan sé ata maémano a si Yesus, séra itu musti mengasiri' si tuang éra. Wo in taniitu, sé tou sé ra'ica maéman a si Yesus ra'ica wana alasan e mojat i ngaran i Amang Kasuruan wo ka'i in sususuienta.

^2a Wo sé ata e makatuang maémano a si Yesus, séra ra'ica toro maepes im beren a si tuang éra ampa'paan séra wo si tuang éra puté-puté maéman a si Yesus. Taan taré musti selewiran éra mangé in sama' si tuang éra itu lumébémai ing kanaramen. Ampa'paan si tuang éra ka'i puté-puté maéman a si Yesus, ampa'paan in itu séra musti mengaupus si tuang éra.

En sususuien meséa' wo sé tou longi' in doit

^2b Timotius! Musti isusui wo sina'umu pakasa en anio' a sé jamaat.

³ Si séi masusui in sususuien walina wo maanggap in sususuien wutul i Apo'ta Yesus Kristus suméa', wo ka'i ra'ica makiit in sususuienta mengaapo',

⁴ isiao si tou tirayo taan ra'ica makailek in sapa-sapa. Em pakawerotna ra'ica wutul ampa'paan asalo maéré-éré alasan ang karapi i meindo-indoan roma'. Ampa'paan sa meindo-indoan roma' tanu siitu, méma'ke' taré sé tou menii-niim ing kasuutan, meréndéran, mengawuruk i ngaran é tou, mengawerot in léwo' a sé tou walina,

⁵ meindo-indoan roma', mawasa-wasa sé ra'ica loor wo ra'io makailek in sususuien wutul. Pawerotenna sa sia mengaapo' a si Amang Kasuruan, sia ro'na masiya'.

⁶ En ulitna sa sé tou uli-ulit mengaapo' a si Amang Kasuruan wo ka'i makapendam in arui asi sapake' in anuna, sia makéréo kamang wangko'.

⁷ An tutuwta itumou ang kayo'baan anio', kita ra'ica maali mai sapa-sapa. Taniitu ka'i sa kita matéo, kita ka'i ra'ica kawisa maali sapa-sapa.

⁸ Ampa'paan ituo, sa eng karai wo eng kakanen ai cita aweso, sapake' sé ai citao itu en ulitna musti méma' icita mendam in arui.

⁹ Taan sé tou sé masalé' masiya', séra itu sé taporak katawéran méma' ing kaléwo'an ampa'paan séra kinawasao ing kasalé'an in owak. Eng kasalé'an in owak éra itu ra'ica wana torona wo méma'ke' taré séra mawendu. Eng kasiwakanna sé tou masalé' masiya', séra katawéran méma' ing kaléwo-léwo'an. Anaé, niéma'o éra in esa en owak icawangkur, en itu puté séra kinata'kongano.

¹⁰ Icuaku in taniitu ampa'paan, sa sé tou longi' in doit, am bituo en tino'tolan ing kaléwo-léwo'an. Séra ka'i ra'io masalé' kumiit in sususuien i Yesus ampa'paan séra rumaméji masiya'. Wo eng kasiwakanna séra makéré keli kawenduan e méma' in até éra sumakit.

Eng katouan wutul é tou maéman

¹¹ Taan ko é Timotius, ico tou i Amang Kasuruan, tumayango mangé ko asé pakasa ing kaléwo-léwo'an. Rumaméjio mangé ko kumiit sé anio': tioo mengarapit, mengaapo' mangé makiit ing kasalé'an-Na, le'tek maéman a si Yesus, mengaupus sé kakélé tou, talesen mengasaru ing kasusaan wo ko'kos en até.

¹² Ico tinowao i Amang Kasuruan e makéré ing katouan akar ing kauré-uré wo an tutuw itu ko mangaku i mauli-ulit an dior é tou keli sapaoka ko maéman a si Yesus Kristus. Ampa'paano in itu musti timboienmu sumama-sama' eng katouan akar ing kauré-uré si kinéréanmuo itu, tanu sé tou mekowa' rumaméji makéré im piala.

¹³ Intarépé', an dior i Amang Kasuruan si méé mai waya ing katouan wo ka'i an dior i Yesus Kristus si cumua ing kasairian loor an dior i Pontius Pilatus, pangilekenku ai co,

¹⁴ wosama' kiitenmu wutu-wutul pakasa em perénta si aicuaku anio', ra'ica toro icélongmu. Anaé ko ra'ica wana kaséaan akar si Apo' Yesus Kristus maai sumawel.

¹⁵ Si Amang Kasuruano in esa en tumantu kawisa si Yesus maai sumawel. Ampa'paan wayake' si Amang Kasuruan e makakawasa em patus iparayo-rayo é tou. Siao si Colano am pakasa é kolano wo Kasuruan am pakasa é kasuruan.

¹⁶ Siao ka'i si ra'ica kakawasaan im papaté. Sia menonou ang kasendotan wo sé tou ra'ica toro sumusut asi sendot itu. Wo ra'ipé' wana tou si sumangkumo suméré Sia. Siake' si patus siriin. Pakasa eng kawasa ai Sia akar ing kauré-uré. Ulit.

Em popokéi a sé tou siya'

¹⁷ Pokéianmu mangé sé tou siya' ang kayo'baan anio' wosama' séra tioo mengatirayo wo tioo menonou mamangén ang kasiyaan. Ampa'paan eng kasiyaan ing kayo'baan anio' ra'ica akar ing kauré-uré, si endo anio' awéan woondo maka'puo. Aweso taré séra itu menonou mamangén a si Amang Kasuruan, si méé mai im baya-waya sé paperlunta wosama' ro'na kaipianta waya en itu.

¹⁸ Ipokéi angé a sé tou siya' wosama' séra maéma' sé loor. Séra musti masalé' mengatambér, masalé' mengawéténg ing kasiyaan éra a sé tou walina.

¹⁹ Sa séra méma' in taniitu, séra awéano esa patuuran keter an sorga, wo in taniitu ampa'paano im patuuran itu, séra ro'na makéré ing katouan si makakii-kiit mewali-wali wo si Casuruan sa.

En taar i Paulus

²⁰ Timotius, musti téiranmu sumama-sama' waya sé aitoké i Casuruan ai co. Ra'ica toro kumiit memaa-maar sé ra'ica wana torona sé ra'- ica masiri' si Amang Kasuruan, wo ka'i tioo kumiit meindo-indoan roma' in andumoro' sé pakua é tou “kapinteran”, en ulitna siitu ra'ica kapinteran taan asalo meindo-indoan roma' andumoro' i nunuwu'.

²¹ Awéan piraan tou makiit in sususuien sé pakua éra “kapinteran”, ampa'paan ituo séra ra'io maéman ka'i a si Yesus. Pangilekenku a si Amang Kasuruan wosama' Sia tumambérai ing kamang ai camu.