1 Timotius 2 - En Taar Weru a nunuwu' é Tontemboan

En sina'u tambisa masombayang a si Amang Kasuruan

¹ Kataré-taré sina'uenku kamu mekiupus angé an sombayang wo ipasombayang angé ka'i sé tou walina wo mengawéé mangé i makapulu'sama' a si Amang Kasuruan torona é pakasa in tou,

² torona é kolano wo sé kikiiten wangko' wosama' kita ro'na menonou ang kaeluran wo ang kaaruian. Wo wuta ing kale'tekan wo in siri' a si Casuruan, siituo si patus émaan é tou maéman.

³ Siituo en loor wo maarui in até-Na, si Lumolowirta,

⁴ wo icasalé'-Na ka'i wosama' pakasa in tou malowir wo makailek in sususuien wutul.

⁵ Si Amang Kasuruan wayake' in esa, wo ka'i wayake' in esa e makawali sé tou a si Amang Kasuruan, Siao si Kristus Yesus.

⁶ Sia isumarakano in owak-Na en tumu'bus im pakasa ing kamesé-meséaan é tou. Siituo eng kasairian i Amang Kasuruan si mamuali tuus asi oras si aitantu-Nao.

⁷ Siituo imangémai aku sinisir i Amang Kasuruan mamuali ruru'du'an-Na e mangé a sé tou ra'ica Yahudi eng kumua in abar andumoro' im paémanen wutul. Pakasa sé aicuaku anio' ulit! Yaku ra'ica matowo.

En andumoro im peri é tuama wo sé wéwéné am paapo'an an jamaat

⁸ Ampa'paano in itu, icasalé'ku wosama' am bisa-wisake' sé tuama mengasombayang angé ang karapi in até weresi a si Casuruan, ra'ica ang karapi in e'bow wo meindoan roma'.

⁹ Taniitu ka'i wo sé wéwéné, mengakarai angé sé patus am beren é tou, masoma-soma mangé wo tioo tirayo, tioo maéma' im buuk megioo, makasondol i mas kuma'pa mutiara, kuma'pa mekarai ing karai sosor ulit em bééna.

¹⁰ Taan aweso taré sé wéwéné itu mengapasung in owak éra ang karapi mengaéma' sé loor sé patus pengaémaan é wéwéné sé mangaku maapo' a si Amang Kasuruan.

¹¹ Aweso taré sé wéwéné makapeneso mio' wo le'tek makalinga in sususuien in Taar i Casuruan.

¹² Ra'ica iwééku sé wéwéné masusui wo ra'ica iwééku ka'i séra merénta sé tuama, aweso taré séra makapeneso mio'.

¹³ Ampa'paan si kataré-taré niéma' i Amang Kasuruan si Adam owo, kumawus in itu émaan-Na si Hawa.

¹⁴ Wo ka'i, ra'ica si Adam eng kinauwakan, taan si wéwéné eng kinauwakan i kikiiten é sétang, akar sia sumunduro im perénta i Amang Kasuruan.

¹⁵ Taan si wéwéne itu malowir oka ampa'paan si toyaang aitouna, sa sia uli-ulit maéman a si Casuruan mandé meta'up in okoi wo mengaupus sé tou walina, menonou ang karapi in até weresi an dior i Casuruan wo ka'i em perina ra'ica tirayo.