1 Tesalonika 5 - En Taar Weru a nunuwu' é Tontemboan

Matéi-téiro mangé ampa'paan si Apo' Yesus tantu maai sumawel

¹ Poo-poow, ra'ica sangali ipatic ami ai camu kawisa en oras i Apo' Yesus maai sumawel.

² Ampa'paan kailekan iow ra'ica wana tou si uli-ulit makailek kawisa en oras i Apo' Yesus maai sumawel. Sia maai tanuoka si rombit an tutuw im bengi.

³ Awéan en orasna sé tou eng kumua in tana'i, “Eng katouanta arui wo elur, ra'ica toro maindé-indé'.” Taan tumarépé'anke'mai séra tenan oka ing kawenduan meputé wo ing kawenduan si pinendam i wéwéné an tutuw i makéré toyaang. Sé tou itu ra'ica wana en icawekar asi kawenduan itu.

⁴ Taan é poo-poow, kamu ra'ica menonou ang kariréimbengan. Ampa'paan in ituo, an oras i Apo' Yesus i maai tanuoka si rombit, kamu ra'ica mangaya'ka'.

⁵ Kamu im baya tou menonou ang kasendotan, meputé wo sé tou menonou an tutuw in endopé'. Kita ra'ica meputé wo sé tou menonou an tutuw im bengi kuma'pa sé tou ang kariréimbengan.

⁶ Ampa'paan in ituo, kita ra'ica toro asalo meneke-nekel meputé wo sé tou walina, taan matéi-téiro mangé wo kawasan angé sumama-sama' en owak.

⁷ Ampa'paan ang kanaramen é tou matekel, mengatekel an tutuw im bengio wo sé tou lalangun, mengalangu an tutuw im bengio.

⁸ Taan kita anio' sé maéman a si Casuruan, musti kumawasa in owak tanu ing katouan é tou in sendot. Kita ka'i musti maéman a si Amang Kasuruan wo meupu-upusan, siituo en tuméir icita aipeputé wo si suraro mengapaké ing karai bési pari'dir in owak. Kita ka'i musti mauli-ulit maarap sapaoka kita lowiren oka i Casuruan, aipeputé wo si suraro makapaké in topi waja en tuméir in do'kosna.

⁹ Ampa'paan kita ra'ica sinisir i Amang Kasuruan in ukumen. Taan sinisir-Na kita e makéré ing kalowiran am paémanenta a si Yesus Kristus Apo'ta.

¹⁰ Sia imatéo torona icita wosama' sa Sia maai sumawel, mandé ka'i an oras itu kita imatéo kuma'pa kita menonoué', kita ro'na menonou mewali-wali wo Sia.

¹¹ Ampa'paan in ituo, mensin-sina'uano mangé kamu wo sé tou walina wo mengkeng-keterano mangé in até an esa paémanen, kaputé im pengaémaan iow akar intarépé'.

Eng katouan é tou makiit si Yesus

¹² Poo-poow, pangileken ami ai camu wosama' pasiriin angé sé tou an uner iow sé matawoi mauli-ulit torona i Casuruan. Séra mengaakin icamu wo masina'u icamu kumiit ing kasalé'an i Casuruan.

¹³ Pengasiriin angé sumama-sama' séra ang karapi ing kaupusan ampa'paano in tawoien éra. Wo kamu ka'i musti menonou angé mensan-samaan wo sé tou walina.

¹⁴ Pangileken ami ka'i ai camu é poo-poow, pengaromaan angé in sama' sé tou ra'ica kiim tumawoi, keteran angé en até é tou toloindé', tawangen angé sé tou patus tawangen wo malese-lesen angé a sé im pakasa é tou.

¹⁵ Wéanio' rékén, oréoka awéan si tou mengasuli' in léwo' a sé tou mengaéma' in léwo'. Taan musti rumaméji mangé kamu mengaéma' in loor a sé kara-karapi miow in esa wo ka'i a sé tou walina.

¹⁶ En até miow musti tatap arui,

¹⁷ wo musti menomba-nombayang.

¹⁸ Sa kamu meta'up ing kawenduan kuma'pa ing kaaruian, musti meméé-méé mangé i makapulu'sama' a si Amang Kasuruan, ampa'paan siitu en casalé'-Na si musti émaan iow sé maémano a si Kristus Yesus.

¹⁹ Tioo pengala-ngalaan iow en tawoien i Roh i Amang Kasuruan.

²⁰ Wo tioo pengaepesen iow im beren e nunuwu' i Casuruan sé aicuao é nabi ai camu.

²¹ Taan ujin iow in sumama-sama' em pakasa in itu. Sa en itu uli-ulit asi Casuruan owo, terimano mangé wo kiiteno mangé i mauli-ulit.

²² Wo tumayang angé kamu asé im pakasa sé léwo'.

En sina'u walina i Paulus wo en siri'na

²³ Pangileken ami a si Amang Kasuruan wosama' émaan-Na eng katouan iow male'nas. Siao ka'i méma' icita menonou ang kaeluran. Pangileken ami ka'i téiran-Na mai en owak, en até wo e mu'kur iow wosama' an tutuw si Apo'ta Yesus Kristus maai sumawel, kamu ra'ica wana kaséaan ampa'paan kamu ra'ica iméma' ing kameséaan sapa-sapa.

²⁴ Si Amang Kasuruano en itumowa icamu. Sia itu le'tek, tantu émaan-Na oka pakasa sé aicua-Nao ai cita.

²⁵ Poo-poow, pangileken ami ai camu isombayang angé kami.

²⁶ Wo icua mangé en siri' ami ang karapi in upus ami a sé tou maéman am bitu.

²⁷ Pangilekenku ai camu ang karapi ing kawasa i Apo' Yesus Kristus, bacan angé en surat anio' a sé poo-poow maéman.

²⁸ Pekiupusen ami a si Yesus Kristus Apo'ta wosama' tumambérai ing kamang ai camu.