1 Tesalonika 1 - En Taar Weru a nunuwu' é Tontemboan

En siri'

¹ Siri'ku Paulus wo sé kara-karapiku si Silas wo si Timotius. En surat anio' aicirim ami ai camu jamaat an Tesalonika, sé maéman a si Amang Kasuruan wo a si Apo' Yesus Kristus. Pangileken ami a si Amang Kasuruan wosama' kamu tambéran-Na mai ing kamang wo méma' ing katouan iow elur.

Sé tou maéman an Tesalonika mamuali paandéan é tou walina

² Kami kumua i makapulu'sama' a si Amang Kasuruan ampa'paan icamu im baya, wo kamu ka'i ipasombayang ami.

³ Susur ami sumombayang a si Amang Kasuruan Amangta, pena'né-na'néien ami em pakaselewir iow ampa'paan kamu maéman a si Yesus. Kata'néian ami tambisa kamu maselewir a sé tou walina ampa'paan séra icaupus iow. Kata'néiané' ami mandé ka'i kamu talesen meta'up ing kawenduan, pengaraméjin iow mengaéma' sé loor ampa'paan maara-arapke' a si Yesus Kristus Apo'ta.

⁴ Poo-poow sé icaupus i Amang Kasuruan, kailekan ami sapaoka kamu sinisir-Nao mamuali tou-Na.

⁵ Kailekan ami en itu ampa'paan asi makasa kami mangé ai camu an Tesalonika e mangé kumua in Abar Kaaruien andumoro' i Yesus Kristus. An tutuw itu kami ra'ica asaloke' maké i nunuwu' ami, taan ang karapi ing kawasa i Casuruan wo ang karapi i Roh Le'nas si méma' icamu uli-ulit mercaya in Abar Kaaruien andumoro' i Yesus Kristus itu. Wo sinéréo ka'i miow em peri ami. Anaé, kailekano miow sapaoka en Abar Kaaruien itu wutul.

⁶ Wo kamu mengakiito im peri ami wo im peri i Apo' Yesus. Mandé awéan tou maokoi camu, émaan i Roh Le'nas kamu kasake' tumerima in arui en taar i Casuruan.

⁷ Wo in taniitu kamu mamuali paandéan é tou maéman a si Yesus an sangkum i Makedonia wo an Akhaya.

⁸ Ampa'paan en taar i Casuruan icaseraro tumo'tolo mai ai camu wo akar an sangkum i Makedonia wo ra'ica am bituke' taan imakaro ka'i an sangkum in Akhaya. Wo ra'ica asaloke' andumoro' in taar pengakua miow taan ka'i en abar andumoro' im paémanen iow a si Amang Kasuruan icaseraro am pakasa in tampa. Ampa'paan in ituo kami ra'io wana torona eng kumua in sapa-sapa, ampa'paan pinalingao é tou em paémanen iow.

⁹ Am bisa-wisa sé tou mengasisil tambisa kamu tumerima cami an tutuw ami mangé ai camu. Ipasisil éra ka'i andumoro' tumambisa kamu tumela'u sé opo-opo' wo mape'dis wo mai maapo' a si Amang Kasuruan si menonou wo si ulit.

¹⁰ Pengasisil éra ka'i en andumoro' tambisa kamu mengento-ngento' si Toyaang i Amang Kasuruan maai a mangé en sorga owo. Siao si Yesus, si tinou-Na sumawel am papaté. Si Yesus itu ka'i en lumowir icita sé maéman ai Sia an ukuman i Amang Kasuruan sa.