1 Petrus 2 - En Taar Weru a nunuwu' é Tontemboan

Si Yesus patuuran é tou maéman

¹ Ampa'paan in ituo kamu ra'io toro mengéma-ngéma' pakasa ing kaléwo'an, pakasa sé mengauwak, pakasa sé punek, menii-niim ing kasuutan wo mengaléwo' i ngaran é tou walina.

² Aweso taré kamu mamualio tanuoka si toyaang si makatoué' wo meré'o-ré'om en sumusu asi inangna, kamu ka'i musti meré'o-ré'- om melep si wutu-wutul susu si nunuwu' i Amang Kasuruan. Ang karapi kamu imelep in itu em paémanen iow a si Amang Kasuruan makawangkoo akar kamu malowir,

³ sa wutu-wutul kamu in esa sumangkumo tambisa eng kalooran i Casuruan.

⁴ Siituo kamu mayo a si Yesus. Sia ayandé tanu watu i menonou ampa'paan sé tou ro'na émaan-Na menonou. Sia ayandé tanu watu si aitiya' é tou, taan an dior i Amang Kasuruan sia sinisir wo siniri' tanu watu sosor em bééna.

⁵ Kamu ka'i tanu im batu menonou itu. Ampa'paan in ituo iwééo mio' en owak iow pakén i Amang Kasuruan e mamuali paento'an-Na. Wo in taniitu kamu imamualio imam-imam le'nas e rumagés ing katouan iow a si Amang Kasuruan. Wo e raragés aiwéé miow itu tinerima-Na ampa'paano sé niéma' i Yesus Kristus ai cita im baya.

⁶ Ampa'paan ang Kitap Le'nas aipatic in tana'i, “Wéan rékén sumama-sama'! Sinisir-Kuo esa watu sosor keli em bééna. Em batu itu aitulir-Kuo mamuali watu patuuran kataré-taré an Yerusalem. Wo si séi e maéman ai Sia, ra'ica kawisa ipapalawi'.”

⁷ Si Yesus Kristus uli-ulit sosor em bééna torona é tou maéman ai Sia. Taan sé tou ra'ica maéman, tantu icawangkur, tanu si aipatic ang Kitap Le'nas tana'i, “Watu aitiya' é bas, imamualio watu patuuran si kumataré-taré.”

⁸ Wo awéan ka'i en aipatic, “Si watu itu mamuali watu pasangkilan akar icawangkur.” Eng kaangéanna séra casangkil asi watu itu akar cawangkur ampa'paan séra ra'ica maéman wo ra'ica makiit in Taar i Amang Kasuruan, tanu siituo en aitantu mai i Amang Kasuruan ai séra.

⁹ Taan kamu anio' bangsa sé sinisiro i Amang Kasuruan, imam sé maselewir a si Amang Kasuruan si Colanota, bangsa sé line'nas-Nao wo ka'i mamuali anu-Na. Kamu im baya imamuali tanu siitu wosama' ro'na ipakua-kua miow a sé tou andumoro' sé kakaya'kaan sé niéma'o i Amang Kasuruan. Siao en tumowa icamu kumesot ang kariréimbengan wo muntep asi sendot-Na wangko'.

¹⁰ Indior kamu ra'ica tou i Amang Kasuruan, taan intarépé' kamu imamualio tou-Na. Wo indior kamu ra'ipé' itumerima ing kaupusan i Amang Kasuruan taan intarépé' kamu tumerimao ing kaupusan-Na.

Em peri é tou maéman musti loor

¹¹ Poo-poow sé icaupusku, icamu anio' sakéi wo imanangkéi ang kayo'baan anio'. Anaé, sina'uenku kamu wosama' tumayang angé asé kasalé-salé'an in owak sé ra'ica loor sé mapetokol an até weresi miow.

¹² Em peri miow musti loor an dior é tou sé ra'ica makatuus si Amang Kasuruan. Mandé ka'i patudun éra kamu tou léwo', sérén éra oka sé pengaémaan iow loor wo in taniitu séra rumayo wo sumiri' oka si Amang Kasuruan, an tutuw maai en endo-Na sa.

Male'te-le'tek a sé pemerénta sé makatimboi ing kawasa

¹³ Kamu sé makiit si Casuruan musti male'te-le'tek angé a sé maperénta si makatimboi ing kawasa. Male'te-le'tek angé a si colano si makatimboi ing kakawasaan rumangka-rangka',

¹⁴ akar a sé tou sé winéan i colano kawasa en tumimboi ing kakawasaan. Séra ituo sé winéan tawoien e mukum sé tou sé maéma' in léwo', wo sumiri' si tou sé maéma' in loor.

¹⁵ Ampa'paan icasalé' i Amang Kasuruan kamu méma' sé loor, wosama' si tou ra'ica wana eng kailekan andumoro' ing kasalé'an-Na, sia ra'io ka'i memaa-maar sé ra'ica wutul andumoro' icamu.

¹⁶ Kamu anio' tou sé ra'io pakakawasan ing kamesé-meséaan ampa'paan kamu aiwekaro i Amang Kasuruan ang kakawasaan ing kamesé-meséaan, taan tioo pepaké-pakén eng kaloasan itu en tumutuw ing kaléwo-léwo'an iow. Taan menonouo mio' kamu tanuoka ata-Na.

¹⁷ Pengasiriin angé sé pakasa in tou wo mengaupuso mangé sé poo-poow iow an esa paémanen. Maindé'o mangé a si Amang Kasuruan wo pengasiriin angé si colano miow.

Eng kawenduan sinangkum i Yesus tanu paandéan

¹⁸ Éi camu ata-ata! Kamu musti male'te-le'tek angé ang karapi wuta in siri' a sé tuangmu wo tawoieno mangé sapa sé airu'du'na. Émaano mangé en itu ra'icake' a si tuang sama' wo ko'kos en até taan ka'i a si tuang si luméwo-léwo'.

¹⁹ Sa awéan ai camu meta'up ing kawenduan mandé kamu ra'ica wana kaséaan wo talesen sumaru in itu wo ampa'paan ka'i kailekan iow en itu kasalé'an i Amang Kasuruan, kamu tambéran oka mai ing kamang i Amang Kasuruan.

²⁰ Taan sa kamu mawendu ampa'paan mengaéma' ing kamesé-meséaan, sapa eng kalébéana? Taan taré sa kamu talesen muléng ing kawenduan ampa'paano mengaéma' in loor, tantu kamu tambéran oka mai ing kamang i Amang Kasuruan.

²¹ Ampa'paan in ituo, kamu tinowao i Amang Kasuruan e méma' in loor mandé' ka'i kamu meta'up ing kawenduan. Si Apo' Yesus imendamo ing kawenduan torona miow wo imééo im paandéan ai camu wosama' kiiten iow tanu si niéma'-Na.

²² Sia ra'ica mengaéma' ing kamesé-meséaan wo ra'ica tampenguwaken.

²³ An tutuw Sia ipawa'ba' é tou, ra'ica kiim-Na sumuli' imawa'ba' iséra. An tutuw Sia pengaokoien, ra'- ica kiim-Na in sumundur. Taan Sia isumarakanke' in owak-Na a si Amang Kasuruan, si Akim si ra'ica marapit.

²⁴ Sia in esa imuléngo ing kamesé-meséaanta an owak-Na, an tutuw-Na imaté ang kayu salip. Wo in taniitu kita icawekar asi kawasa ing kamesé-meséaan, wo menonou e méma' ing kasalé'an i Amang Kasuruan. Sé péla-péla'-Na ituo e iméma' icita masama'.

²⁵ Ampa'paan kamu indior tanuoka sé domba icasélé'kowo, taan intarépé' kamu imaréngo mai asi gembala si matéir i mu'kur iow.