1 Korintus 6 - En Taar Weru a nunuwu' é Tontemboan

Sé tou maéman musti makawoo murus ing kaperéndéran

¹ Poo-poowku, sa an uner iow awéan kaperéndéran, kéitu réén kamu brani mangé mapaurus ing kaperéndéran iow a si akim si ra'ica maéman a si Amang Kasuruan? Kéitu réén eng kaperéndéran itu ra'ica ipapaurus iow a sé tou le'nas?

² Ra'ipé' réén kailekan iow sapaoka sé tou ang kayo'baan anio' akimen oka é tou le'nas? Anaé, sa pakasa sé ang kayo'baan anio' icamu oka e makim sa, kéitu réén intarépé' ra'ica kawooan iow e murus ing kaperéndéran sé ra'ica penting?

³ Ra'ipé' réén kailekan iow sapaoka icitao e makim sé malaékat sa? Sa cita e makim oka sé malaékat, kéitu réén eng kaperéndéran ang katouanta susur in endo ra'ica kaurusanta?

⁴ Anaé, sa awéan kaperéndéran an uner iow tou maéman, kamu in esa e murus ing kaperéndéran itu, ra'ica toro paalin iow a si akim si ra'ica esa paémanen si tou ra'ica pasiriin an jamaat.

⁵ Awéan esa em buéienku ai camu e méma' icamu malawi': Ra'ica réén wana tou mandé esake' ai camu si awéan kapinteran e ro'na murus ing kaperéndéran é poo-poowna esa paémanen?

⁶ Taan kamu é tou maéman, an tutuw awéan kaperéndéran ai camu, ra'ica niurus iow in esa eng kaperéndéran itu taan taré aipapaurus iow am pengadilan a si akim si ra'ica esa paémanen.

⁷ Awéanke' kaperéndéran an uner iow tou maéman, en itu tumuru' icamu meséa'o. Sa awéan tou e méma' ra'ica adil ai camu, aweso taré iwayao mio' sia méma' in taniitu kuma'pa icamu e marugi.

⁸ Taan kamu in esa marapitke', kamu irumugio sé tou walina ang karapi mengauwak iséra. Wo en itu niéma' miow a sé poo-poow iow esa paémanen!

⁹ Ra'ipé' réén kailekan iow sapaoka sé tou mengaéma' sé ra'ica wutul séra ra'ica mamuali tou i Amang Kasuruan ang Kakolanoan-Na? Ampa'paan in itu tioo kamu kauwakan. Sé tou cabul, maapo' a sé opo-opo', sé tou mabersina wo si ra'ica penanaanna, mengacabul wo sé kakélé tuama,

¹⁰ sé tou rombit, sé tou rakus, sé tou lalangun, sé tou mengawuruk i ngaran é tou walina wo sé tou mengauwak, sé tou tanu siitu ra'ica mamuali tou i Amang Kasuruan ang Kakolanoan-Na.

¹¹ Indior awéan piraan tou an uner iow makaperi tanu siitu ka'i. Taan intarépé' eng kamesé-meséaan iow wineresio i Amang Kasuruan. Kamu niéma'-Nao le'nas wo nianggap-Nao wutul an dior-Na ampa'paan kamu maémano a si Apo' Yesus Kristus wo ka'i ampa'paan ing kawasa i Roh i Amang Kasuruanta.

Pakéno en owak iow e rumayo wo sumiri' si Amang Kasuruan

¹² Awéan tou an uner iow makua, “Sapa-sapake' ro'na émaanku.” Taan sa aku, ra'ica pakasa sé pengaémaan é tou awéan torona. Anaé, mandé ka'i aku ro'na méma' in sapake' mangé, taan ra'ica kiimku en owakku kawasan in sapake' mangé itu.

¹³ Awéan ka'i makua, “Eng kakanen torona im poot wo em poot torona ing kakanen,” rua-rua itu terin oka i Amang Kasuruan. Si aicua miow itu wutul. Taan mandé ka'i en owak é tou terin oka, ra'ica toro pakén iow en owak e méma' in cabul. Taan pakéno en owakta asaloke' in sumelewir a si Amang Kasuruan, ampa'paan en owakta piniara-Na.

¹⁴ En owak i Apo' Yesus tinou sumawel i Amang Kasuruan. Tanu siituo ka'i en owakta, touen oka sumawel ka'i i Amang Kasuruan maké ing kawasa-Na.

¹⁵ Ra'ipé' réén kailekan iow sapaoka en owak iow anggota in owak i Kristus? Ro'na réén en owakta si mamualio anggota in owak i Kristus wo indon mamuali anggota in owak i wéwéné sundal? Tantu ra'ica toro.

¹⁶ Si musti kailekan iow sapaoka si tou tumekelo ang karapi i wéwéné sundal, sia itu mamualio esa owak wo si wéwéné itu. Ampa'paan ang Kitap Le'nas aipatic in tana'i, “Sé rua tou itu mamualio esa.”

¹⁷ Taan sa si tou meesao ang karapi i Apo' Yesus, e roh i tou itu mamualio esa ang karapi i Roh-Na.

¹⁸ Tumayango mangé i mengéma-ngema' in cabul! Eng kamesé-meséaan walina sé pengaémaan é tou, ra'ica wana eng kasiwakan an owakna. Taan si tou mengaéma' in cabul, sia méma'o ing kamesé-meséaan si awéan eng kasiwakan an owakna in esa.

¹⁹ Musti kailekan iow sapaoka en owak iow itu paento'an i Roh Le'nas. E Roh Le'nas itu aiwéé i Amang Kasuruan mento' ai camu. En owak iow ra'ica anu miow in esa taan anu i Amang Kasuruan.

²⁰ Ampa'paan kamu tinelesano i Amang Kasuruan ang kerapi in sosor em bééna siituo en enda' i Kristus. Ampa'paan ituo pakéno sumama-sama' en owak iow e rumayo wo sumiri' si Amang Kasuruan.