1 Korintus 5 - En Taar Weru a nunuwu' é Tontemboan

En andumoro' é jamaat sé mengaéma' ing kaléwo'an

¹ Poo-poow, awéan sé tou mai cumua a yaku sapaoka awéan tou an jamaat iow manaramo mengaéma' in cabul. Si tuama itu mengacabul ang karapi i penanaan i amangna karua. Sédangkan taré si tou ra'ica maéman a si Amang Kasuruan ra'- ica mengaéma' tanu siitu.

² Mandé ka'i an uner iow awéan tou maéma' ing kameséaan tanu siitu taan kamu tirayopé'. Si patus ai icamu, kamu musti masusa en até wo si tou maéma' ing kaléwo'an itu musti icesot iow an jamaat.

³ Mandé ka'i aku mentayangan wo icamu taan en atéku ang karapi miow. Yaku ka'i mééo ukuman a si tou si méma'o ing kaléwo'- an itu, tanuoka kéndo' aku an uner iow.

⁴ An tutuw iow mali'u-li'- us ang karapi i ngaran i Apo' Yesus, anggapeno mio' aku an unero miow wo eng kawasa i Yesus Apo'ta ang karapi miow am bitu.

⁵ Isarakano miow si tou itu ang kakawasaan i kikiiten é sétang. Wo in taniitu pendamenna oka eng kawenduan akar sia mape'dis wo em peri léwo'na maka'pu. Anaé, e mu'kurna ro'na malowir asi endo si Casuruan mai makim waya sé tou.

⁶ Mandé ka'i awéan tou maéma' ing kamesé-meséaan an jamaat iow taan kamu marayopé' in owak. En itu ra'ica patus. Tantu kailekano miow si andéan anio': E ragi sangatekic ro'na méma' pakasa in adonan roti ruméis. Eng kaangéanna tana'i: mandé ka'i esake' tou an uner iow méma' ing kaléwo'an, sia itu ro'na tumawér pakasa in tou maéman walina akar kumiit méma' ing kaléwo'an.

⁷ Ampa'paan in ituo itiya'o mio' si ragi uré itu, si ragi ing kamesé-meséaan iow, wosama' kamu mamuali tanuoka in adonan weru, ampa'paan kamu ulit tanuoka in adonan ra'ica rinagian. Ampa'paan si Kristus, si ana' i domba Paska pinaté tanu raragésan en tumu'bus ing kameséaanta.

⁸ Anaé, itiya'o mio' si ragi uré. Si ragi ituo eng kamesé-meséaan wo eng kaléwo'an iow. Wo mayoo kita méma' ing kasalé-salé'an im Paska ang karapi i roti si ra'ica rinagian en tumuru' cita lekep en até wo menonou wutul an dior i Casuruan.

⁹ Asi suratku indior, aipatickuo ai camu wosama' kamu tioo mengakarapi wo sé tou cabul.

¹⁰ An tutuw itu, aku ra'ica rumu'du' icamu tumayang asé im pakasa é tou cabul ang kayo'baan anio', sé tou rakus, sé tou mengauwak kuma'pa asé tou maapo' a sé opo-opo'. Ampa'paan sé tou tanu siitu am bisa-wisa awéan. Sa taniitu, kamu musti kumesot asi cayo'baan anio'.

¹¹ Em paangé-angénku, tioo mengakarapi wo sé tou sé mengakua sapaoka sia itu poowta an esa paémanen taan em pengaémaanna cabul, rakus, mengaapo' a sé opo-opo', mengawuruk i ngaran é tou walina, lalangun kuma'pa mengauwak. Kumanke' mako mewali-wali wo sia ra'ica toro.

¹² En ulitna ra'ica tawoienku mengaakim sé tou sé ra'ica makatuus si Amang Kasuruan. Taan sa sé tou an jamaat mengaéma' ing kaséaan, kamu in esao e makim iséra.

¹³ Si Amang Kasuruan in esao e makim sé tou ra'ica maéman. Aipatic ang Kitap Le'nas tana'i, “Yuséro mangé sé tou mangaéma' in léwo' an uner iow!”