1 Korintus 4 - En Taar Weru a nunuwu' é Tontemboan

Kami anio' ruru'du'an en sumelewir si Kristus

¹ Poo-poow, anggapeno mai kami tou sé matawoi maselewirke' a si Kristus, sé tinokéan makua in abar andumoro' im pawasa-wasan i Amang Kasuruan en lumowir sé tou. Em pawasa-wa- san itu ra'ipé' kailekan é tou walina.

² Si kumataré-taré en tuntuten ai cita sé mengaselewir, kita musti le'tek a si tuang si méé in tawoien.

³ Taan aku ra'ica mamuali soal, sa aku akimen iow kuma'pa akimen é tou walina andumoro' im pakaselewirku. Yaku in esa ra'ica manilai im pakaselewirku.

⁴ Pawerotenku, aku ra'ica wana kaséaan sapa-sapa, taan en itu ra'ica mamuali tuus sapaoka aku wutu-wutul ra'ica meséa. Si Apo' Yesuske' in esa en tumantu mai yaku meséa' kuma'pa ra'ica.

⁵ Ampa'paan in tuo tioo kamu mario-rior en tumantu si esa tou meséa' kuma'pa ra'ica, sa ra'ipé' an témpona. Entoon akar si Apo' Yesus maai sumawel. Sia oka e muka' im pakasa sé pakaenep é tou ang kariréimbengan wo Sia oka ka'i en tumuru' pakasa em pawasa-wasan é tou an até. Asi témpo itu oka ka'i si Amang Kasuruan méé mai i rarayo a sé tou asi esa wo si esa sé patus tumerima i rarayo.

⁶ Poo-poowku sé maéman! Yaku matic andumoro'ku wo si Apolos torona ing kalooran iow. Paarapen ami, kamu ro'na suméré icami in dua tanu paandéan wo ro'na oka kaajaran iow sapa eng kaangéan é nunuwuun ang Kitap Le'nas anio', “Émaano sapa si aipatic ang Kitap Le'nas, tioo mengaéma' andumoro' sé walina sé pinéro ang Kitap Le'nas.” Wo in taniitu ra'ica wana ai camu en tumirayo si kikiiten iow wo mengawawa' si kikiiten walina.

⁷ Si séi réén iméma' icamu lumébémai wo sé tou walina? Awéan réén sé mamualio anu miow wo ra'ica asi Amang Kasuruan owo? Pakasa sé anu miow itu asi Amang Kasuruan owo, sa taniitu kéitu réén kamu marayo-rayo in owak tanuoka kéndo' sé mamualio anu miow itu ra'ica aiwéé i Amang Kasuruan?

⁸ Paweroten iow kamu tanuoka sé makaanuo im pakasa ing kamang sé paperlun iow asi Amang Kasuruan. Paweroten iow kamu tanuoka sé imasiya'o am paémanen. Paweroten iow ka'i kamu mamualio kolano, taan kami ra'ica. Lébé loor woo sa kamu wutu-wutul mamualio kolano akar kami ro'na kumiit maperénta ang karapi miow.

⁹ Iciit yaku, kami sé ruru'du'an i Yesus, niéma'o i Amang Kasuruan mamuali tou ra'ica pengasiriin, kami tanuoka tou sé pinusé'o in ukumen patén an dior é tou keli wo pakasérén é tou ang kayo'baan wo sé malaékat.

¹⁰ Ampa'paan kami makua andumoro' i Kristus, paweroten é tou ing kayo'baan tanu tou bodok, taan kamu tirayo sapaoka kamu itu tou pinter ampa'paan maéman a si Kristus. Kami ka'i paweroten é tou ing kayo'baan tanu tou ra'ica keter em paémanen taan kamu marayo in owak sapaoka kamu ketero em paémanen. Kami pengawawa' é tou ing kayo'baan taan kamu iparayo-rayo é tou keli.

¹¹ Wo akar intarépé' kami maarem wo maré'om wo eng karai ami waya oka si pekakaraien an owak. Kami paokoien é tou wo ra'ica wana em paento'an.

¹² Kami matawoi ang karapi ing keter ami in esa torona ing katouan ami. Sa awéan tou mangawa'ba' icami, pekiupusen ami a si Amang Kasuruan eng kumamangai séra. Sa awéan tou maokoi icami, sarun ami ang karapi in talesen wo ra'ica suliin ami.

¹³ Sa awéan tou manuwu' in léwo' andumoro' icami, suliin ami séra i nunuwu' mengaarui. Akar intarépé' sé tou ing kayo'baan anio' maanggapé' icami tanuoka i noo wuruk sé ra'ica wana torona.

¹⁴ Aipaticku en anio' ai camu, taan ra'ica kiimku mapalawi' icamu. Aipaticku en anio' asaloke' sumina'u ai camu ampa'paan kamu caupusku, tanu toya-toyaangku in esa.

¹⁵ Yaku anio' tanu amang iow, ampa'paan yakuo eng kataré-taré mai sumusui in Abar Kaaruien andumoro' i Yesus Kristus ai camu. Mandé ka'i mariwu-riwuo eng kakeli sé masusui ai camu andumoro' i Kristus, si amang iow wayake' in esa.

¹⁶ Ampa'paan in ituo pangilekenku ai camu wosama' kamu menonou kumiit tanu ing katouanku.

¹⁷ Ampa'paan in ituo yutusku mangé si Timotius ai camu ampa'paan sia itu niéma'kuo tanu toyaangku in esa wo icaupusku, sia ka'i le'tek a si Casuruan. Mangéna oka ita'néi sumawel ai camu andumoro' tambisa eng katouanku makiit a si Kristus Yesus. Eng katouanku itu ipenusu-nusuikuo a sé jamaat am pakasa in tampa.

¹⁸ Awéan piraan tou ai camu an jamaat Korintus imatirayoo ampa'paan paweroten éra aku ra'io maai sumawel ai camu.

¹⁹ Taan sa icasalé' i Casuruan, aku makala'us oka mai ai camu. Sa yaku mayo ai camu, yaku ra'ica mai mangéré sapa sé ipakua é tou tirayo itu taan pangérénku oka sa séra awéan kawasa asi Casuruan owo kuma'pa ra'ica.

²⁰ Ampa'paan si tou i Amang Kasuruan, kakailekan oka é tou walina ra'ica asé nunuwuun i tou itu, taan asi kawasa i Amang Kasuruan asi tou itu.

²¹ Anaé, si wisa en sisiren iow? Yaku mai sumusui ai camu maké in sambok? Kuma'pa aku mai ai camu ang karapi ing kaupusan wo ang karapi ing ko'kos en até?