1 Korintus 3 - En Taar Weru a nunuwu' é Tontemboan

Sé maselewir si Amang Kasuruan

¹ Poo-poowku, an tutuwku mewali-wali wo icamu, yaku maroma' ra'ica meputé an tutuwku maroma' a sé tou eng katouanna kinawasao i Roh i Amang Kasuruan. En ulitna aku maroma' ai camu meputé wo aku maroma' a sé tou menonou makiité' ing kasalé'an ing kayo'baan, ampa'paan em paémanen iow a si Kristus meputépé' wo si toyaang teké' susupé' em paelepen.

² Indior kamu pawéanku susu ra'ica kakanen keté, ampa'paan kamu ra'ipé' makawoo tumerima in itu. Wo akar intarépé' ka'i kamu ra'ipé' makawoo tumerima ing kakanen keté itu,

³ ampa'paan akar intarépé' kamu makiité' im pakawerot ing kayo'baan. Icuaku in taniitu, ampa'paan an uner iow awéané' sé kokanat wo meindo-indoan roma'. En itu mamuali tuus sapaoka kamu makiité' im pakawerot ing kayo'baan wo menonou asalo makiit ing kasalé'an in tou.

⁴ Aicuaku tanu siitu, ampa'paan an uner iow awéan sé makua, “Yaku makiit si Paulus,” wo sé walina ka'i makua, “Yaku makiit si Apolos.” En itu itumuru'o sapaoka kamu tou sé makiité' im pakawerot ing kayo'baan?

⁵ Sa kumiit icamu, si séi réén si Apolos itu? Wo si séi réén si Paulus itu? Kami in dua asalo tou maselewir a si Amang Kasuruan. Kami sé makawalio icamu e maéman a si Kristus wo kami si esa wo si esa asalo maéma' in tawoien si airu'du' i Amang Kasuruan ai cami.

⁶ Yaku Paulus musew in lulumbo, si Apolos inumaam, taan si Amang Kasuruan in esa e méma' mai in tinanem itu tumou.

⁷ Anaé, ra'ica penting si tou musew kuma'pa si tou numaam, taan em penting am bia'i si Amang Kasuruan si méma' mai in tinanem itu tumou.

⁸ Si tou musew wo si numaam, em paawo- awon éra meputé. Séra wéan oka i Amang Kasuruan laasa kumiit in tinawoi éra esa wo si esa.

⁹ Ampa'paan kami in dua sé matawoi mewali-wali wo si Amang Kasuruan wo kamu tanuoka in uma i Amang Kasuruan wo ka'i tanuoka im balé-Na.

¹⁰ Si Amang Kasuruan tumambéro mai in upus-Na a yaku akar aku si tou e makailek wutul im bangunan tumuliro im pandasi enté', wo sé tou walina mawangun am bawo im pandasi itu. Taan si esa wo si esa tou musti méé rékén sumama-sama' tumambisa sia mangun am bawo im pandasi patuuran itu.

¹¹ Ampa'paan em patuuran si aitulir itu Siao si Yesus Kristus. Wo ra'ica wana mandé esake' tou e ro'na tumulir im patuuran walina.

¹² Awéan tou mangun am bawo im patuuran itu, maké mas, perak, kuma'pa watu permata wo awéan ka'i tou mangun am bawo im patuuran itu maké ing kayu, rukut, kuma'pa raami.

¹³ En tawoien é tou si esa wo si esa kaséréan oka an tutuw i Kristus maai sumawel. Ampa'paan asi endo itu, api oka e méma' in tinawoi é tou si esa wo si esa kaséré-séréan. En api oka e muji wo en tumuru' sé tinawoi éra itu loor kuma'pa ra'ica.

¹⁴ Sa en tinawoi i esa tou makatang tunun in api, sia makéré oka laasa.

¹⁵ Taan sa en tinawoina matunu, sia marugi oka. Mandé ka'i in taniitu, sia in esa malowir, taan en owakna tanuoka si tou icaséip kumesot an api.

¹⁶ Ra'ipé' réén kailekan iow sapaoka kamu itu tanu Walé i Amang Kasuruan wo e Roh i Amang Kasuruan makaento' ai camu?

¹⁷ Sa awéan tou luméwo' im Balé i Amang Kasuruan, sia léwoon-Na oka. Ampa'paan em Balé i Amang Kasuruan le'nas wo icamuo em Balé i Amang Kasuruan.

Tioo mengawerot in owak iow awéan kapinteran

¹⁸ Sa kamu mengawerot in owak iow awéan kapinteran, kamu imuwako in owak iow in esa, ampa'paan eng kapinteran papakén iow itu asalo makiit im pakawerot é tou ang kayo'baan wo eng kapinteran ituo e modok icamu. Aweso taré kamu ra'ica mapaké ing kapinteran makiit im pakawerot ing kayo'baan wosama' an dior i Amang Kasuruan kamu uli-ulit awéan kapinteran.

¹⁹ Ampa'paan sé paweroten é tou ang kayo'baan kapinteran, en itu paweroten bodok i Amang Kasuruan. Ang Kitap Le'nas aipatic in tana'i, “Awéan sé tou paweroten ing kayo'baan pinter, taan pinaké i Amang Kasuruan eng kapinteran éra itu eng kumala iséra.”

²⁰ Awéan ka'i ang Kitap Le'nas aipatic in tana'i, “Kailekan i Casuruan sapaoka sé paweroten é tou awéan kapinteran, em pakawerot éra itu ra'ica wana torona.”

²¹ Ampa'paano in itu, tioo kamu marayo-rayo si kikiiten iow. Ampa'paan em baya-waya cauntep ka'i sé kikiiten iow, aiwéé i Amang Kasuruan torona ing kalooran iow.

²² Yaku si Paulus, si Apolos wo si Petrus aiwéé i Amang Kasuruan ai camu. Aiwéé-Na ka'i ai camu eng kayo'baan, eng katouan wo em papaté, si endo anio' wo ka'i si endo maai sa, pakasa en itu torona miow.

²³ Taan kamu anu i Kristus wo si Kristus anu i Amang Kasuruan.