Biblia Todo Logo
Bìoball air-loidhne

- Sanasan -

1 Korintus 15 - En Taar Weru a nunuwu' é Tontemboan


Si Kristus tinou sumawel

1 Poo-poow, intarépé' casalé'ku en tuma'néi sumawel ai camu en Abar Kaaruien andumoro' i Yesus Kristus si aicuakuo indior ai camu. En Abar Kaaruien itu tinerimao miow wo akar intarépé' pakatimboiané' miow.

2 Sa kamu tumimboi mauli-ulit a si Abar Kaaruien si aicuakuo itu, kamu linowiro i Amang Kasuruan. Taan sa kamu ra'ica matimboi mauli-ulit asi Abar Kaaruien itu, em paémanen iow ra'ica wana torona.

3 Aicuakuo ai camu en abar si kumataré-taré, abar sé tinerimaku in esa, sapaoka si Kristus matéo wosama' eng kamesé-meséaanta tu'busen-Na, tanu si aipatic ang Kitap Le'nas.

4 An tutuw i Kristus imatéo Sia aicubur wo asi endo katelu Sia tinou sumawel i Amang Kasuruan. En itu, tanu si aipatic ang Kitap Le'nas.

5 Icuaku ka'i ai camu sapaoka si Kristus ka'i mapaturu'o in owak-Na a si Petrus wo ka'i a sé sangapulu' rua murit-Na.

6 Kumawus in itu Sia mangé ka'i mapaturu' in owak-Na a sé lima ngaatus lébé poo-poow maéman. Wo kinakelian asé tou itu menonoué' akar intarépé' wo sé piraan ai séra imatéo.

7 Kumawus in itu ka'i, Sia mangé mapaturu' a si Yakobus wo mangé ka'i mapaturu' a sé im pakasa é ruru'du'an.

8 Wo ang kasomoianna si Kristus mai mapaturu' a yaku. Yaku anio' mamuali ruru'du'an-Na kaputé i toyaang itumou ra'ipé' an orasna.

9 Ampa'paan an uner é ruru'du'an, yakuo si ruru'du'an ipawawa-wawa'. Yaku ra'ica patus patuulen ruru'du'an, ampa'paan yakuo si indior mengaokoi sé jamaat i Amang Kasuruan.

10 Taan ampa'paan in upus si aitambér i Amang Kasuruan, yaku ro'na mamuali ruru'du'an tanu intarépé'. Wo en upus si aitambér i Amang Kasuruan itu uli-ulit awéan wuéna. Sé tinawoiku lumébé mai asé im pakasa é ruru'du'an. En itu ra'ica ampa'paan ing kaketeranku in esa, taan ampa'paano in upus aitambér i Amang Kasuruan mewali-wali wo yaku.

11 Anaé, asi séike' owo en tinerimaan iow in Abar Kaaruien andumoro' i Yesus Kristus itu, a yaku kuma'pa asé ruru'du'an walina owo, en itu ra'ica sapa-sapa. Em penting en Abar Kaaruien itu aicuao ami ai camu wo ampa'paan in itu kamu maéman.


Sé tou maéman matéo tantu touen sumawel

12 Ipakua ami a sé tou sapaoka si Kristus tinouo sumawel am papaté. Taan kéitu réén awéan piraan tou ai camu makua sapaoka sé tou imatéo ra'io ka'i touen sumawel?

13 Sa sé tou imatéo ra'io ka'i touen sumawel i Amang Kasuruan, tantu si Kristus ka'i ra'io tinou sumawel.

14 Wo sa si Kristus ra'ica tinou sumawel, tantu en abar andumoro' i Kristus sé ipakua ami a sé tou ra'ica wana torona, taniitu ka'i em paémanen iow a si Kristus ra'ica wana en torona.

15 Wo in taniitu, tantu kami mééo kasairian si ra'ica wutul andumoro' si Amang Kasuruan. Ampa'paan ipakua ami a sé tou sapaoka si Kristus tinou sumawel i Amang Kasuruan. Sa wutul sé tou imatéo ra'io touen sumawel, tantu si Kristus ra'io tinou sumawel.

16 Ampa'paan sa wutul sé tou imatéo ra'io tinou sumawel, tantu si Kristus ka'i ra'ica tinou sumawel.

17 Wo sa si Kristus ra'ica tinou sumawel, ra'ica wana torona em paémanen iow ai Sia wo kamu menonoué' ang kamesé-meséaan.

18 Wo sa si Kristus ra'ica tinou sumawel, tantu sé tou maémano a si Kristus sé imatéo, ra'ica malowir.

19 Sa em paarapenta a si Kristus makarke' a si katouanta ang kayo'baan anio', kitao sé tou sumoé-soé asé pakasa in tou asi cayo'baan anio'.

20 Taan en ulitna sapaoka si Kristus tinouo sumawel an uner é tou imatéo. Siao eng kumataré-taré tinou sumawel, taniitu ka'i sé tou maéman sé imatéo, touen oka ka'i sumawel.

21 Ampa'paan em papaté sangkumen waya é tou ampa'paan niéma' i esa tou, taniitu ka'i sé tou imatéo touen oka sumawel ampa'paan niéma' i esa tou.

22 Em papaté sangkumen waya é tou ampa'paan awéan paesaan wo si Adam. Taniitu ka'i pakasa in tou touen oka sumawel ampa'paan awéan paesaan wo si Kristus.

23 Taan esa wo si esa touen sumawel kumiit in urutan: kataré si Kristus si tinouo sumawel tanu jaminan ai cita. Wo an tutuw Sia maai sumawel, gilirano é tou-Na en touen.

24 Kumawus in itu eng kayo'baan maka'pu oka. Wo asi témpo itu ka'i pakapaté-patén i Kristus pakasa sé maperénta, pakasa sé makatimboi ing kakawasaan wo ing kaketeran. Wo isarakan-Na oka eng kakawasaan-Na tanu Kolano a si Amang Kasuruan, Amang-Na.

25 Ampa'paan ra'ipé' ang kaka'puan ing kayo'baan, si Kristus musti merénta tanu Kolano akar kalan i Amang Kasuruan pakasa sé kaséké' i Kristus wo iweta'-Na séra am palara ing kécéi i Kristus.

26 Si kaséké' en sosomoi kalan i Kristus, siituo em papaté.

27 Ang Kitap Le'nas aipatic in tana'i, “Em baya-waya kinalao i Amang Kasuruan wosama' pakasa en itu iweta'-Na am palara ing kécéi i Kristus.” Tantu kaséréan oka wutul sapaoka eng kaangéan i nunuwu' “em baya-waya'” en itu ra'ica icauntep si Amang Kasuruan, si méma'o si Kristus icumawasa wo maperénta sé am baya-waya itu.

28 Taan an tutuw i Amang Kasuruan iméma' si Kristus maperénta a sé sapa-sapake', si Kristus tanu Toyaang, en owak-Na musti isarakan ang kakawasaan i Amang Kasuruan, si méma'o in sapa-sapake' itu ang kakawasaan i Kristus. Wo in taniitu si Amang Kasuruan uli-ulit e merénta oka a sé im pakasa.

29 Sa sé tou imatéo ra'io touen sumawel, kéitu réén awéan tou e nibaptis torona é tou imatéo? Torona in sapa émaan éra en itu? Sa woo sé tou imaté uli-ulit ra'io ka'i touen, torona in sapa séra méma' in itu?

30 Susur in jam kami mawali in owak ang kawangkuran e mengakua in Abar Kaaruien. Sa ra'ica wana en touen sumawel am papaté, torona in sapa kami méma' in taniitu?

31 Poo-poowku, susur in éndo aku mensaruan wo im papaté, ampa'paan aku marayo ing katouan iow ampa'paan kamu maémano a si Kristus Yesus Apo'ta.

32 Sa aku kumiitke' mako im bewerot é tou, ra'ica wana eng kalébéanku en sumundur in sé tou masalé' sumera' yaku tanuoka sé binatang léwo' ang kota Efesus. Anaé, sa sé tou imatéo ra'io touen sumawel, aweso taré kita meputé sé ipakua é tou, e makua in tana'i, “Mayo kita mengangan wo mengele-ngelep wo maaru-arui, ampa'paan asi endo woondo kita matéo.”

33 Tioo iwaya sé tou walina muwak icamu. ‘Si tou, mandé makaperi in loor, ro'na maléwo' sa makara-karapi wo sé tou léwo'.’

34 Anaé, mawutu-wutulo mangé mape'dis wo ra'io toro ka'i mengéma-ngéma' ing kamesé-meséaan. Ampa'paan an uner iow awéan sé ra'ipé' makatuus si Amang Kasuruan. Icuaku en anio' wosama' kamu malawi' wo mape'dis.


Sé tou maéman makéré oka owak weru an tutuw touen sumawel

35 Awéan wona' tou ai camu mamuéi in tana'i, “Tumambisa réén sa sé tou imaté touen sumawel? Owak tanu sapa em béé ai séra sa touen sumawel?”

36 Si tou mamuéi itu, tou bodok. Musti kailekanmu in esa: Sa ko musew in lulumbo, en lulumbo itu kataré-taré musti tawunan in tana' tanu tou imaté wo en lulumbo itu tumou.

37 Wo en lulumbo si ayusewmu itu asalo in lulumbonake', tanumai watuna ing gandum kuma'pa watuna walina, ra'ica sé tinanem wangkero.

38 Taan en lulumbo wéan i Amang Kasuruan esa modél tinanem, iciit ing kasalé'an-Na. Susur in lulumbo wéan i Amang Kasuruan modél in tinanemna.

39 En owak é mahluk-mahluk ra'ica pakasa meputé. En tou makaowak in esa, sé binatang makaowak walina, sé burung ka'i en owakna walina wo sé sera' makaowak walina.

40 Taniitu ka'i sé an langit wo sé ang kayo'baan. Eng kapasungna sé an langit membalinaan wo eng kapasungna sé ang kayo'baan.

41 Si yéndo makaanu im pasungna in esa, si serap makaanu im pasungna si télangna in esa, wo sé sumesendot ka'i makaanu im pasungna si télangna in esa. Wo eng kapasung i esa sumesendot membalinaan wo ing kapasung i sumesendot walina.

42 Taniitu ka'i e mamuali sa a sé tou imatéo an tutuw éra in touen sumawel. En owak si aicubur itu si owak ro'na mawuruk, taan si owak tinou sumawel, owak ra'ica kawisa maléwo'.

43 En owak si aicubur owak ra'ica wana wééna, taan en owak si tinou sumawel, owak parayo-rayo wo pasiri-siriin. En owak si aicubur owak lembi, taan en owak si tinou sumawel owak keter.

44 An tutuw aicubur, en owak itu owak asi cayo'baan owo. Taan an tutuw tinou sumawel, en owak itu owak an sorga owo. Awéan owak ang kayo'baan owo, awéan ka'i owak an sorga owo.

45 Ang Kitap Le'nas cumua in tana'i, “Si tou kataré-taré si Adam mamuali mahluk i menonou,” taan si Adam en sosomoi mamuali Roh si mawéé ing katouan.

46 En owakta intarépé', owak asi cayo'baan owo. Touen oka sumawel i Amang Kasuruan kita, wo kita makéré in owak asi Roh Le'nas owo.

47 Si tou kataré-taré niéma' an tana' owo. Taan si Kristus si tou karua, Sia itu a mangé en sorga owo.

48 Sé tou asi cayo'baan anio' makaowak tanu in owak i Adam si niéma' an tana' owo, taan sé tou muntep an sorga makéré oka owak tanu in owak i Kristus si a mangé en sorga owo.

49 En owakta intarépé' meputé wo in owak i Adam si niéma' an tana' owo. Taan maai oka sa en owakta meputé wo si Kristus si an sorga owo.

50 Poo-poow, em peangé-angénku tana'i: en owakta intarépé' niéma' an enda wo an sama'na owo. Wo en owakta anio' sa, ra'- ica toro muntep ang kayo'baan weru i Amang Kasuruan. En owak si ro'na maté tanu si anio' ra'io ka'i pakénta ampa'paan a mangé mbitu ra'io wana ka'i e maté.

51 Wéé mio' sumama-sama' an dékén! Awéan sé icaenepé' en aicuaku ai camu: ra'ica pakasa icita e maté, taan en owakta im baya mawalina.

52 En itu asalo mi'pit im beren tumarépé'anke'mai mamualio, an tutuw in téngén en terompét sosomoi. An tutuw i luminga in terompét itu, sé tou imatéo touen oka sumawel ang karapi in owak ra'ica ro'na materi, wo kita sé menonoué' roban oka.

53 En owakta si ro'na maté anio' musti sawelan in owak si ra'io ka'i maté, wo si owak si ro'na materi anio' musti sawelan in owak si ra'ica ka'i materi.

54 Wo sa en owakta si ro'na maté sinawelano in owak si ra'io kawisa maté wo en owak asi cayo'baan owo sinawelano in owak si an sorga owo, an tutuw itu lekepen oka en taar si aipatic ang Kitap Le'nas in tana'i, “Eng kawasa im papaté tinerio wo kinalao i Amang Kasuruan.”

55 “Éi papaté, am bisa eng kauntunganmu? Éi papaté, am bisa eng kiki'ci'mu?”

56 Eng kiki'ci' im papaté siituo eng kamesé-meséaan wo eng kawasa ing kamesé-meséaan siituo en ukum Torat.

57 Taan makapulu'sama' a si Amang Kasuruan, ampa'paan niéma'-Na mai kita imuntung sumundur im papaté ampa'paano i Apo'ta, Yesus Kristus.

58 Ampa'paan in ituo é poo-poow sé icaupusku, keteren em paémanen iow wo ra'ica toro marua-rua wasa. Wo mare'de-re'dem an tawoien i Casuruan, ampa'paan kailekano miow sapaoka sé tinawoi iow an dior i Casuruan ra'ica wana si ra'ica wana en torona.

En Taar Weru a nunuwu' é Tontemboan @ LAI 2018

Indonesian Bible Society
Lean sinn:



Sanasan