1 Korintus 14 - En Taar Weru a nunuwu' é Tontemboan

Eng kamang tatambér sé ro'na méé ing kaketeran a sé jamaat

¹ Poo-poow, musti raméjin iow mengaupus a sé tou walina. Musti raméjin iow ka'i makéré ing kamang tatambér asi Roh Le'nas owo, eng kataré-taré kamang tatambér makua in taar i Amang Kasuruan.

² Wo si tou maroma' mapaké i nunuwu' i Roh, sia itu ra'ica maroma' a sé tou taan maroma' a si Amang Kasuruan. Ra'ica wana esa tou ka'i e ro'na makaangé in sapa sé ipakuana, ampa'paan e Roh Le'nas méma' sia ro'na makua en andumoro' si ra'ica kailekan é tou.

³ Taan sa si esa tou awéano kamang tatambér eng kumua in taar i Amang Kasuruan, ipakuana en itu a sé tou e méé ing kaketeran, méé kaincayaan wo sumina'u iséra, wo ka'i mibor iséra.

⁴ Si tou maroma' ang karapi i nunuwu' i Roh, sia itu asalo mawéé kaketeran in owakna in esa. Taan si tou makua in taar i Amang Kasuruan, sia itu mawéé kaketeran a sé jamaat.

⁵ Arui aku sa kamu im baya ro'na manuwu' a nunuwu' i Roh. Taan lébépé' loor ka'i sa kamu ro'na makua i nunuwu' i Amang Kasuruan. Ampa'paan si tou makua i nunuwu' i Amang Kasuruan en lébépé' awéan katoronaan wopé'taré si tou maroma' mapaké i nunuwu' i Roh si ra'ica kaangéan é jamaat. Taan sa si tou maroma' mapaké i nunuwu' i Roh wo ituturna sapa eng kaangéan i nunuwu' itu, en itu awéan katoronaan a sé jamaat.

⁶ Anaé é poo-poow, sa aku maai ai camu wo maroma' mapaké i nunuwu' i roh, en itu ra'ica wana en toronana ai camu. Lébé awéan torona sa aku makua i nunuwu' sapa si aicua i Amang Kasuruan a yaku kuma'pa eng kakailekan andumoro' i Amang Kasuruan, kuma'pa kumua in abar asi Amang Kasuruan owo, kuma'pa sumusui icamu.

⁷ Yandéku mai im pakakas i musik sé ra'ica nimu'kuran, tanumai peloit wo kecapi. Sa sengon kuma'pa téngén é tou wo ra'ica makiit wutul i not ing kakantaren, tumambisa sé tou malinga ro'na makailek ing kakantaren itu?

⁸ Awéan andéan walina ka'i tana'i: sa en terompét sinengo ra'ica metu'tul en téngéna, ra'- ica wana suraro tumu'tul in owak e mangé merang.

⁹ Taniitu ka'i kamu, sé maroma' mapaké i nunuwu' i Roh. Sa sé nunuwu'mu itu ra'ica kaangéan, tantu ra'ica kaangéan é tou walina sapa em pakua miow. Sé ipakua miow itu ra'ica wana en toronana, tanuoka maroma' an deges.

¹⁰ Awéan kelian nunuwu' asi cayo'baan anio'. Taan ra'ica wana mandé esake' nunuwu' sé ra'ica makaanu ing kaangéanna.

¹¹ Sa awéan tou maroma' ai cita wo ra'ica kaangéanta e nunuwuun ipakuana, tantu icuana kita tou manangkéi, taniitu ka'i sia, tantu icuata sia tou manangkéi.

¹² Tanu siituo ka'i kamu in esa, kamu irumaméjio makéré ing kamang tatambér i Roh Le'nas. Taan eng kumataré-taré kamu musti rumaméji maké ing kamang tatambér itu e méé ing kaketeran im paémanen a sé jamaat.

¹³ Ampa'paan in ituo, si tou maroma' mapaké i nunuwu' i Roh, sia musti sumombayang a si Amang Kasuruan wosama' sia ro'na tambéranai ing kamang makua ing kaangéan i nunuwu' i Roh itu.

¹⁴ Ampa'paan sa aku masombayang mapaké i nunuwu' i roh, e rohku ulit masombayang, taan e ngaasku ra'ica icumiit.

¹⁵ Anaé, sapa si musti émaanku? Si anio' en émaanku: Yaku ro'na sumombayang a rohku owo maké nunuwu' i Roh, wo ka'i aku ro'na sumombayang maké i nunuwuun si ro'na kaangéan i ngaasku. Wo aku ro'na kumantar a rohku owo, wo ro'na kumantar maké i nunuwuun a ngaasku owo.

¹⁶ Ampa'paan sa kamu kumua makapulu'sama' a si Amang Kasuruan asalo mapaké i nunuwu' i roh a roh miow in esa, wo sé tou am bitu ra'ica makailek ing kaangéan i nunuwu' i roh miow itu, tantu ra'ica kiim éra kumua ‘ulit’ ampa'paan ra'ica kailekan éra eng kaangéan sé ipakua miow.

¹⁷ Mandé ka'i en sombayang makua i makapulu'sama' a si Amang Kasuruan sé aicua miow itu loor keli, taan sé pakua miow itu ra'ica méé kaketeran am paémanen éra ampa'paan sé pengakua miow ra'ica kaangéan éra.

¹⁸ Yaku kumua makapulu'sama' a si Amang Kasuruan, ampa'paan pendamenku in esa aku lumébémai wo icamu im baya mengaroma' i nunuwu' i Roh.

¹⁹ Taan am pali'usan i maapo' a si Amang Kasuruan, casalé'ku keli makua lima nuwu' sé ro'na ka- angéan é tou, wotaré mapaké mariwu-riwu nuwu' a nunuwu' i Roh. Lébé icasalé'ku taniitu wosama' ro'na susuianku sé tou.

²⁰ Poo-poow! Tioo em pakawerot iow tanuoka sé toyaangé' teké', wo mamualio toyaang teké' andumoro' ing kaléwo'an. Taan em pakawerot iow musti mamuali tanu in tou wangkoo.

²¹ Ang Kitap Le'nas aipatic in tana'i, “Icua-Ku oka a sé tou-Ku maké sé tou manangkéi sé mapaké i nunuwu' é tou imanangkéi, mandé in taniitu sé tou-Ku ra'ica kiim luminga Yaku. Si anioo en Taar i Casuruan.”

²² Anaé tana'i: Sa awéan tou tinambéranai ing kamang maroma' mapaké i nunuwu' i roh, en itu tanu tuus ing kawasa i Amang Kasuruan a sé tou sé ra'ica maéman, ra'ica a sé tou maéman. Taan awéan tou tinambéranai ing kamang makua i nunuwu' i Amang Kasuruan, en itu tanu tuus ing kawasa i Amang Kasuruan a sé tou maéman, ra'ica a sé tou sé ra'ica maéman.

²³ Anaé, sa pakasa sé jamaat mali'usai mewali-wali esa wo si esa tou sé maroma' mapaké i nunuwu' i roh, wo muntepai ka'i sé tou ra'ica maéman kuma'pa sé tou ra'ica makailek andumoro' ing kamang tatambér i Amang Kasuruan, tantu cua éra kamu itu tou sé malicokoo e ngaas.

²⁴ Taan sa kamu im baya sé an jamaat ang karoro'an makua in taar i Amang Kasuruan wo muntepai sé tou ra'ica maéman kuma'pa ra'ica makailek andumoro' ing kamang tatambér i Amang Kasuruan wo linganna waya sé ipakua miow, niéma'tao si tou itu manesel ing kamesé-meséaan an aténa wo pawerotenna sia patus makéré ukuman.

²⁵ Sé pakaenepna an untep in aténa kaséréan oka sa, akar iko'kosna en owakna wo kumundu maapo' a si Amang Kasuruan wo kumua, “Ulit! Si Amang Kasuruan an uner iow.”

En atoran am pali'usan é jamaat

²⁶ Anaé é poo-poow, sapa eng kaangéan im pakasa in itu? An tutuw iow mali'us mewali-wali i maapo', awéan sé tou makantar ing kakantaren marayo si Amang Kasuruan, awéan sé tou masusui, awéan sé tou makua i nunuwu' i Amang Kasuruan, awéan sé tou maroma' mapaké i nunuwu' i roh, wo awéan ka'i sé matutur ing kaangéan i nunuwu' i roh itu. Musti émaan iow pakasa en itu en sumusui wo torona ing kalooran iow im baya.

²⁷ Wo sa awéan tou maroma' mapaké i nunuwu' i roh, lébé loor sa wayake' in dua kuma'pa ra'ica lumébé in telu tou e maroma' wo ra'ica toro ka'i mewali-wali manuwu', taan musti maesa-esa maroma'. Wo musti awéan ka'i esa tou matutur ing kaangéan sé ipakua éra itu.

²⁸ Taan sa ra'ica wana tou e ro'na kumua ing ka- angéan i nunuwu' i roh itu, aweso taré si tou maroma' i nunuwu' i roh itu menes, am pali'usan an jamaat itu. Séra ro'na rumoma' i nunuwu' i roh itu a si Amang Kasuruan, an untepke' in até éra in esa.

²⁹ Taniitu ka'i wo sé nabi, lébé loor wayake' in dua kuma'pa telu tou ai séra eng kumua in taar i Amang Kasuruan wo sé tou walina oka manilai sapa em ipakua éra itu.

³⁰ Taan sa awéan esa tou ang karoro'an i makalukut am bitu tumarépé'anke'mai pinapaturu'an eng kumua i nunuwu' i Amang Kasuruan, si tou ang karoro'an maroma' musti mento' owo maroma'.

³¹ Wo in taniitu, kamu im baya si esa wo si esa ro'na kumua i nunuwu' i Amang Kasuruan wosama' pakasa en tou an jamaat ro'na susuian wo em paémanen éra ka'i makaketer.

³² Sé tou winéanai kamang tatambér mamuali nabi, séra ro'na kumawasa in owak wo kumawasa sé iparoma' éra.

³³ Ampa'paan si Amang Kasuruan ra'ica masalé' ing kalicokoan, taan en icasalé'-Na kaeluran.

³⁴ Meputé sé pengaémaan é tou le'nas am pakasa in jamaat, si wéwéné makapeneso mio' an tutuw i mali'us mewali-wali wo sé jamaat i maapo'. Séra ra'ica winéan kaloasan e rumoma'. Séra musti kumuru' in owak, tanu si aipatic an ukum Torat.

³⁵ Sa séra masalé' makailek in sapa-sapake', musti wuéien éra a si penanaan éra am balé. Ampa'paan kalawiin keli sa sé wéwéné manuwu' tutuw éra am paapo'an.

³⁶ Paweroten iow réén en Taar i Amang Kasuruan mai ai camu owo? Kuma'pa ai camuke' réén en Taar i Amang Kasuruan itu ipakua-kua? Tantu ra'ica.

³⁷ Sa awéan tou makapendam makaanu ing kamang tatambér mamuali nabi kuma'pa tatambér walina i Roh, musti kakailekanna sapaoka sé aipaticku anio' uli-ulit perénta i Apo' Yesus.

³⁸ Taan sa awéan sé ra'ica kiim tumerima sapa sé ipakuaku anio', sia ka'i ra'io sangali wéan iow rékén.

³⁹ Ampa'paano in itu é poo-poowku, rumaméjio mauli-ulit wosama' kamu ro'na tambéranai ing kamang makua i nunuwu' i Amang Kasuruan, wo tioo pengapéron sé tou tinambéranai ing kamang maroma' i nunuwu' i roh.

⁴⁰ Taan an tutuw kamu maapo', eluren iow sumama-sama' pakasa en itu, oréoka malicoko.