1 Korintus 12 - En Taar Weru a nunuwu' é Tontemboan

En andumoro' ing kamang aitambér i Roh Le'nas

¹ Poo-poow, intarépé' icasalé'ku kumua andumoro' ing kamang sé aitambér i Roh Le'nas. Icasalé'ku kailekan iow ang karapi im butul sé andumoro' in itu.

² Kata'néiané' miow an tutuw iow ra'ipé' makatuus si Amang Kasuruan, kamu kinatawéran wo icawali a sé opo-opo' wowo'.

³ Ampa'paano in itu, musti kailekan iow sapaoka si tou paakinen i Roh i Amang Kasuruan, sia ra'ica kawisa kumua in tana'i, “Kinutuko si Yesus!” Taniitu ka'i ra'ica wana mandé esake' tou e ro'na kumua “Si Yesus itu Kasuruan” sa sia ra'ica pakaakinen i Roh Le'nas.

⁴ Membam-balinaan eng kamang aitambér i Roh Le'nas, taan em pakasa itu aiwéé i esa Roh.

⁵ Wo membam-balinaan em pakaselewir a si Casuruan, taan si Casuruan paselewiran wayake' in esa.

⁶ Wo ka'i membam-balinaan em pakatawoi si tawoien asi Amang Kasuruan owo, taan wayake' in esa si Amang Kasuruan si méé mai ing kawooan a sé tou en tumawoi in itu.

⁷ Kita esa wo si esa winéano mai kamang aitambér i Roh e méma' sapa sé awéan en torona a sé pakasa in tou.

⁸ A si esa tou winéanai kamang aitambér i Roh e manuwu' mapaké ing kapinteran asi Amang Kasuruan owo. Wo a si Roh meputé ka'i, sé tou walina winéanai kamang aitambér i Roh e manuwu' mapaké ing keli eng kakailekan.

⁹ Winéan ka'i i Roh kamang aitambér a si esa tou e mauli-ulit maéman a si Yesus Kristus. Wo si Roh meputé ka'i méé mai kamang aitambér en sumama' sé tou walina.

¹⁰ Wo a si tou walina winéanai i Roh, kamang aitambér e mengaéma' ing kakaya'kaan, a sé tou walina winéan-Na mai kamang aitambér eng kumua in Taar i Amang Kasuruan. A sé tou walina ka'i winéan-Na mai kamang aitambér e makailek si wisa en taar aicua i Roh i Amang Kasuruan wo si wisa en aicua i roh léwo'. Awéan ka'i sé winéan-Na mai kamang aitambér e maroma' i nunuwu' i roh, wo sé walina ka'i winéan-Na mai kamang aitambér e makawoo in tumutur ing kaangéan i nunuwu' i roh itu.

¹¹ Pakasa en itu niéma' i Roh Le'nas si wayake' in esa wo si meputé. Si esa wo si esa tou winéan-Na mai kamang aitambér sé membam-balinaan kumiit ing kasalé'an i Roh.

Kelian anggota taan esa owak

¹² Si Kristus ro'na yandé tanu in owak. En owak wayake' in esa taan sé an owak kelian. Pakasa sé an owak itu membam-balinaan taan en owak wayake' in esa.

¹³ Taniitu ka'i kita im baya, mandé ka'i kita tou Yahudi kuma'pa tou ra'ica Yahudi, ata kuma'pa tou ra'ica pakakawasan é tou walina, kita im baya nibaptis i Roh Le'nas si meputé, wosama' kita émaan esa owak. Wo kita im baya ka'i sumangkumo mai ing kamang a si Roh Le'nas si makaleke-lekep itu.

¹⁴ Ampa'paan en owak itu wayake' in esa, taan sé an owak kelian.

¹⁵ Sa kéndo' woo eng kécéi ro'na rumoma', “Yaku ra'ica kama, anaé aku ra'ica icauntep an owak,” en itu ra'ica tumuru' sapaoka eng kécéi ra'ica cauntep sé an owak.

¹⁶ Sa kéndo' woo en lunteng ro'na rumoma', “Yaku ra'ica weren, anaé aku ra'ica cauntep an owak,” en itu ra'ica tumuru' sapaoka en lunteng ra'ica sé an owak.

¹⁷ Sa en owak mawereno waya, tumambisa kita ro'na luminga? Kuma'pa sa pakasa en owakta imaluntengo, tambisa kita ro'na mou?

¹⁸ Taan si esa wo si esa sé an owak winéano i Amang Kasuruan tampa an owak, kumiit ing kasalé'an-Na.

¹⁹ Sa kéndoon en owak itu mamualio waya kécéi kuma'pa mamualio waya kama, en ulitna in itu ra'ica owak.

²⁰ Wutul kelian membam-balinaan sé an owak, taan en owak wayake' in esa.

²¹ Anaé, em beren ra'ica toro kumua asi kama, “Yaku ra'ica maperlu ico.” Taniitu ka'i en do'kos ra'ica toro kumua a si kécéi, “Yaku ra'ica maperlu ico.”

²² Taan en ulitna sé an owak em pawerotenta ra'ica keter, sia itu uli-ulit paperlunta.

²³ Wo sé an owak em pawerotenta ra'ica wana wééna, sia itu pawéanta wééna i lumébé mai. Wo sé an owak sé ra'ica patus parékén, sia pawéanta rékén sumama-sama'.

²⁴ Wo sé an owak sé kaséréano loor, ra'io talos pawéanta rékén. Tinu'tulo i Amang Kasuruan en owakta tanu siitu akar sé an untep in owak sé ra'ica talos em bééna, winéan wééna i lumébé mai.

²⁵ Wo in taniitu sé an owakta itu ra'ica wana eng katerian, aweso taré séra membém-béan rékén esa wo sé walina.

²⁶ Anaé, sa esaan sé an owak mawendu, pakasa sé an owak itu ka'i kumiit mawendu. Sa esaan sé an owak makéré rarayoan, pakasa sé an owak ka'i maarui.

²⁷ Kamu im baya tanu owak i Kristus wo icamuo si esa wo si esa sé an owak-Na itu.

²⁸ An jamaat, awéan piraan tou sé aitantuo i Amang Kasuruan mamuali: kataré ruru'du'an, karua nabi, katelu guru. Wo ka'i winéanai kamang tatambér e maéma' sé kakaya'kaan, in sumama' sé tou, tumawang sé tou sé perlu tawangen, mamuali kikiiten wo ka'i maroma' a membam-balinaan nunuwu' i roh.

²⁹ Anaé, ra'ica pakasa ai séra mamuali ruru'du'an i Yesus, wo ra'ica pakasa tou mamuali nabi sé makua in taar i Amang Kasuruan wo ra'ica pakasa sé tou mamuali guru e masusui. Ra'ica pakasa winéanai kamang tatambér mengaéma' ing kakaya'kaan,

³⁰ kuma'pa sumama' sé tou, kuma'pa maroma' membam-balinaan nunuwu' i roh, kuma'pa tumutur eng kaangéan i nunuwu' i roh itu.

³¹ Ampa'paan in itu, rumaméjio mauli-ulit wosama' e Roh i Amang Kasuruan méé mai ing kamang tatambér si uli-ulit awéan wééna ai camu. Intarépé' icuaku oka ai camu en lalan lumoo-loor torona miow.