Hiprus 1 - North Tanna

Kristo təmol əp Uhgɨn kəm itat

¹ Aupən ikɨn, Uhgɨn təmatən nəghatən rəhan, məto təmatələhəu əm e səpag kəm tɨpɨtat mɨn e nian tepət ne suatɨp pɨsɨn pɨsɨn mɨn.

² Məto roiu əh, kɨnotegu-pən e namnun nian, kən tɨnatəghat ətuatɨp əm kəm kitat e Nətɨn, itəm in təmɨləs-ipər məmə otərəmərə e nautə rafin rəha tata rəhan. Kən e Nətɨn əh, in təmol natɨmnat rafin e nətueintən.

³ Nətɨ Uhgɨn in nəhag-əhagən rəha nəwɨrən ne nəsanənən rəha Uhgɨn. In təməru ətuatɨp rəhan tata e natɨmnat rafin. In tatəmɨk ətain natɨmnat rafin e nəsanənən rəha nəghatən rəhan. Nian in təmɨmɨs rəkɨs məmə otafəl rəkɨs rəhatat nolən rat mɨn, kən in tatəpələh e rəhn matɨp kig, ikɨn rəha nepətən ne nɨsiaiiən, e nego e neai.

Nətɨ Uhgɨn u, in ilɨs taprəkɨs-in nagelo mɨn

⁴ Tol nəhlan, Uhgɨn təmɨləs-ipər rəkɨs Nətɨn u, kən in ilɨs taprəkɨs-in nagelo mɨn, tahmen-pən məmə nərɨg u itəm Uhgɨn təmos-ipən kəm in, in ilɨs pɨk taprəkɨs-in nərgɨlat rafin.

⁵ Uhgɨn təməsən agɨn-əhən kəm nagelo kit rəhan məmə, “Ik nətɨk. Roiu enuwa rəham tata ətuatɨp.” Məto in təməghat nulan kəm Iesu. Kən Uhgɨn təməsən agɨn-əhən kəm nagelo kit məmə, “Io tata rəham, kən ik onəkuwa nətɨk.” Məto in təməghat nəhlan kəm Iesu.

⁶ Məto e nian Uhgɨn tahl-ipa Nətɨn itəm təmaupən maiir tuwa e nətueintən, kən in tən məmə, “Pəs rəhak rafin nagelo mɨn, nɨpɨnəgɨlat taru nɨsɨp e nɨsiaiiən, motənwiwi in.”

⁷ Nian Uhgɨn tatəghat-in nagelo mɨn, in tatən məmə, “Io emol rəhak nagelo mɨn ilat kotahmen e nɨmətag itəm tətan ikɨn mɨn rafin, matol rəhak wək. Ilat iolwək mɨn rəhak, tahmen e nɨgəm.”

⁸ Məto təmatəghat-in Nətɨn kən matən məmə, “Uhgɨn, rəham nərəmərəən otətatɨg lilɨn, namnun tɨkə. Kən nətuatɨpən in nəlnal rəha nərəmərəən rəham.

⁹ Ik nəmolkeike əm nətuatɨpən kən metəhau nolən eko-eko mɨn. Tol nəhlan, io u, rəham ətuatɨp Uhgɨn, io emələhəu aupən ik, kən ik ilɨs e ik mɨn neen. Kən emol-pən oel e rəhm-kapə, tatəgətun məmə ik kig, matol nɨkim tagien taprəkɨs-in ik mɨn neen.”

¹⁰ Kən Uhgɨn tatən-ipən mɨn kəm in məmə, “Iərəmərə, e nətuounən, ik nəmol nətueintən u, mol in təskasɨk. Kən e nelməm atɨp əm, ik nəmol natɨmnat rafin itəm kotatɨg e neai.

¹¹ Natɨmnat mɨn u rafin, ilat okəpanotɨkə, ilat okotoas tahmen e nɨməhan itəm təməmnəmɨt, məto ik nətatɨg lilɨn əm.

¹² Ik onakaiu-aiu ilat, tahmen əm məmə etəmim təmaiuaiu rəhan nɨməhan. Ik onakəuhlin natɨmnat mɨn u, tahmen e etəmim təmɨkɨs rəhan nɨməhan, məmə in otətəut-in in pɨsɨn. Məto ik, nəkətatɨg lilɨn əm nulan, kən okol nəsɨmɨsən nian kit.”

¹³ Uhgɨn təməsən-ipən agɨn-əhən kəm nagelo kit rəhan məmə, “Ik əpələh e rəhak matɨp, ikɨn rəha nepətən ne nɨsiaiiən, kən matəsahgin. Pəs io ekos-iəhau rəham tɨkɨmɨr mɨn, mol ilat kotahmen e nɨməhan kit itəm nateguafəl nelkəm lan.”

¹⁴ Məto nagelo mɨn, ilat iolwək mɨn əm. Nagelo mɨn, ilat narmɨn mɨn itəm Uhgɨn təmahl-ipa məmə okoatehm netəmim itəm okotos nəmegəhən ron.