MAKTUB DO PAUL TOI DO BA GIO GUSU GA ROM 9 - Kebu go dore go herua 1978

Kumu kang kalang gai ga ddi ba pargé

¹ ’Enung ya cindi, ’enunga go Krist koi, ’enung ya poi ’eno, ’enung sol ca ’enung ya cindi cawa Habé ga Kumu kai wa gelang kual a duro ddaindung.

² ’Enung la nyagé dang kederé homdé waindo waindo.

³ ’Enung dar ca Kumu bbesung gusinyang cong dang Krist ca karmeng dang kalndeng waia busu.

⁴ Ka Israél moinderei, Kumu belégé karndi, ddi bigé hormo doi bua, ddi dorgé kebu goi bua, ddi bigé so bua, ddi gelgé melaué bua, ddi boigé toara bu’.

⁵ Ka to moin ga gemdong ga tumu kagé, ké wo Krist main kema kain a to moin gogé bu’. Dda na debainya Kumu go ddo henga mam waindo waindo bera kuddum. Amin.

⁶ ’Enung yogeng ca kebu go doré go Kumu koi bega gusu ’eno, cawa to moin go Israél koi na, na Israél ga cindi mam ’eno.

⁷ To moin go Abraham koi na, na karndi ga cindi mam ’eno, cawa Kumu yé Abraham wa: Ka ddoginya Isak moinderei ca kandia moinderein mera.

⁸ To do poré, karang ga ké ba wogé a gusu ’eremé go gusu koi na, ka karang ga Kumu kai ’eno, ka ddoginya karang ga ké ba wogé ca kebu go doré go Kumu koi ca kandia moinderei ga cindi mera.

⁹ Cawa Kumu boi toara, ddi yé wa: Dang ddegelé go kerab na, ’enung da jiga, Sara ddain da wo kié.

¹⁰ Na main kain mera ’eno, Rebéka karndo ga sua na, baiga pena, na moindena Isak.

¹¹ Ama Kumu nyan kual ca paré kalang, paré goi na ca henga ga kederei ba dargé, na ca gié go lo ’eno, Kumu gel waldong wang ca paré goia jima geddang.

¹² Kiddin ga Rebéka ba wa karang lé ’eno dé bua, main ké la henga ga ddari dang ga isini ’eno dé bu’ na, Kumu ya wa: Go gumu da lei go wusin gié.

¹³ Main cidab do Kumu toi ba yang waldong wang kain: Kedereng ’yé Jakob, ama ’enung kain Esau.

¹⁴ Na ya mena ga? Kumu na geddang ’eno ga? Na main kain ’eno bering.

¹⁵ Cawa ddi yei Mois wa: Kema go ’enung ba dar ca solé nyagei na, ’enung da sol nyagei, kema go ’enung ba dar ca loi olum na, ’enung da lei olum.

¹⁶ Henga la ga kema kederei ba dargang dono doi ’eno, ama na ca olum do Kumu toi.

¹⁷ A duro cidab do Kumu toi na, Kumu yei kelma go Ejibté go ké ba tei Paron waldong wang: ’Enung sin termala ca gelé dono duang gusin ca kalang sela gusondung a duro delinya mam.

¹⁸ Kema go Kumu ba dari na, ddi sol nyagei ama kema go ddi ba dari na, ddi belei ddaindi osu bu’.

Mainyé dang solé nyagé do Kumu toi

¹⁹ Ji go ’engerang laiga, nia main kain ma, Kumu si kual ca kalanga cawa ga? Na wanga go bbalé gagei ca henga ga kederei ba dargé ga?

²⁰ Hai, ji kema, jia wang go mainyé kualang Kumu ga? Bbasang bbal ca yoi bagulondi go gaddei wa: Ji gaddung main kainya cawa ga?

²¹ Go gaddé bbal ca lo henga ga kederei ba dargé dang gunyung goi. Dang gunyung go pena lé na, ddi bbal gaddé bbasang go gumu dang bbasang go wusin.

²² Keng dar ca yoa mena ca Kumu ga? Ddi dar ca gelé mainyé doi ca ké sela dono doi, na ca ma ddi ’yom ddaindi gag dang mainyé doi ca ké ga ddi bbal ca basegé cong.

²³ Ddi dar ca gelé hormo doi do lainyong caina cawa ddi sol nyageina, ddi parna tumu din ca boana hormo doi.

²⁴ Cawa na kalang ga ddi ba tana lé, na a duro ga Juib mera ’eno, ama a duro kalang ga toigé ddang bu’.

²⁵ Main ddi ba yang waldong wang a duro cidab do Osé toi kain: Ké ga tumua kalang gang ’eno na, ’enunga tega kalang gang. Kalang ga kedereng ba ’yagé ’eno na, ’enunga tega kalang ga kedereng ba ’yégé.

²⁶ Kiddin ga ké ba yégé wa: Kenga kalang gang ’eno na, A kiddin lé na, ka tega Kumu go jomang cindi karndi.

²⁷ Esai pasu kual ca kalang ga Israél, ddi yé wa: Kalang ga Israél nia cumba main kelai go a kebu kurai go gumu go ddoaga kain kau na, ga bbani a duroiga go minyé mera.

²⁸ Cawa Bagulong da kaidé kual ca delinya dang dono doi kala.

²⁹ Main Esai ba yang tumu din kain: Bagulong go dono mam nia dda moinderana ga pena ’eno na, Na nia belé main Sodom kain bua, Na nia belé gené main Gomora kain bu’.

Israél kang Nô do Ddari

³⁰ Na ya mena ga? Kalang ga toigé ddang ga ba dara belé geddang tumu Kumu ’eno kau, ké belé geddang tumu Kumu ca bo cindi.

³¹ Ama kalang ga Israél ga ba dar so ca ka belé geddang tumu Kumu na, ké wa a gusu so lé ’eno.

³² Ké wa ’eno cawa ga? Cawa ké dara bo cindi ca mowoi Kumu gusi ’eno, Ké ’erem ca loa gié, ama gondigé dégé ca keddang go aseré kiddin.

³³ Main cidab do Kumu toi ba yang kain: Sela, ’enung si keddang go aseré kiddin a Sion. Na keddang go aseré kalang, Ama kema goni goni goa bu cindi cai na, dasi go loi ’eno.