MAKTUB DO PAUL TOI DO BA GIO GUSU GA ROM 8 - Kebu go dore go herua 1978

Jomé goang cindena daiang Habé ga Kumu kai

¹ Ama ké ga ba daiang Jésu Krist na, cakcak kua kual go kaidé wo ’eno caigé.

² Cawa so go Habé ga Kumu kai kogé go boana jomé goang cindena daiang Jésu Krist na, belang talagai a duro so go isinwa koa dang go maré koi bu’.

³ Kumu lé henga ga so go Mois koi ba bbala logé ’eno, cawa ’eremé go gusu koi belei todero. Kiddin ga ddi ba gigu Kurondi go pena kiddi kiddi na, ddi kaida kual ca isinwa do gusu toi. Ddi ’eranga gusi gené main kalang ga lo isinwa kogé kain ca aié isinwa cong.

⁴ Kumu lé main kainya ca na la henga ga Habé ga Kumu kai ba dargé, ca na ga ba kain ’eremé go gusu koi cong na, na belé bbal ca lo henga ga so go geddang ba dargé.

⁵ Ké ga lo henga ga ’eremé go gusu koi na, ké la henga ga gusu ba dargé, ama ké ga lo henga ga Habé ga Kumu kai kagé na, ké la henga ga Habé ga Kumu kai ba dargé.

⁶ Ké ga lo henga ga ’eremé go gusu ba dargé na, ké ’erganga maré caigé, ama ké ga lo henga ga Habé ga Kumu kai ba dargé na, ka jomang cindegé dang jalua juam.

⁷ Cawa ké ga lo henga ga ’eremé go gusu koi na, ka tebenang Kumu, cawa ké maga so go Kumu koi ’eno, ké bbala ’eno bu’.

⁸ Ké ga lo henga ga ’eremé go gusu koi na, ké go mowoi Kumu gusi ’eno.

⁹ Ama keng la ’eremé go gusu koi ’eno, ama keng la henga ga Habé ga Kumu kai ba dargé, cawa Habé ga Kumu kai jom wo duro ddaindegeng. Ddi goang Habé ga Krist kai ’eno na, ddia koi ’eno.

¹⁰ Krist nia duro ddaindegeng na, gusugeng da ma ca isinwa, ama kenga jomang cindegeng ca Habé ga Kumu kai cawa keng bela geddang tumu Kumu.

¹¹ Habé ga Kumu kai ga ba belé Jésu dang cindi a duro ga maré nia jom duro ddaindegeng na, ddi go ba belé Jésu dang cindi a duro ga maré, da bu gusugeng go maré jomé goang cindi ca Habé ga Kumu kai ga ba jom wo duro ddaindegeng.

¹² Karmeng, na ca ma, gad wo caina, ama na ca henga ga ’eremé go gusuna ba dargé na, na logé ’eno.

¹³ Cawa keng nia la henga ga ’eremé go gusugeng ba dargé na, kenga ma, keng nia deddu gié go gusugeng koi cong na, kenga jomang cindegeng ca Habé.

¹⁴ Cawa ké mam ga Habé ga Kumu kai wa bogegé na, ka Kumu karndi.

¹⁵ Cawa Habé ga keng ba yégé na, na Habé ga belegeng goiyong ca keng jogé lo muro ddang com ’eno, ama na Habé ga belegeng Kumu karndi ga na tega Kumu Ba.

¹⁶ Habé ga Kumu kai dang habeina jé gusugé ca na Kumu karndi.

¹⁷ Na karndi, na ca ma na da di deba do Kumu toi dang kalang gai ga ddi ba dorgé kebu, na nia wai gelé go cin ca Krist na, na da ’yé do deba dang nai duro hormo doi.

Na da wai hormo

¹⁸ ’Enung sol ca gelé go cin go wa loana duro saman do cakcak kua na, go bbalang hormo do Kumu da gelnang na ’eno.

¹⁹ Cawa delinya mam wa amé dang tabelang ca kiddin ga Kumu da gel karndi waldong wang.

²⁰ Delinya aserong belé henga ga kalin gag na ca kederé daré ga ’eno, ama na ca daré go Kumu koi, main kain kau na, tugoié wo kené.

²¹ Cawa wolé go pena na, Kumu da por delinya a to dono do ba toinya so duro gianduai, ca to ja duro talagai do hormo do Kumu karndi togé.

²² Cakcak kua na sol ca delinya mam wa ulé, main ulé go tama do wa daré ca wo kua kain.

²³ Na delinya mera ’eno, ama danga na ga Kumu ba bena Habé gai kalin tumu jua main henga ga ’ijibé kain, na wa ulé duro ddaindena ca amang Kumu ca ddi belna karndi bua, ddi tura gusuna lé kua main kain bu’.

²⁴ Cawa na wai minyé, ama na danga tugoié dé. Na wanga tugoié henga ga ddi ba solgang cindi ga? Henga ga kema ba solgang cindi na, ddi go tugoiégé ’eno.

²⁵ Ama na nia wa tugoia henga ga na ba selageng cindena ’eno na, na ’yomé ddaindena ca amé henga lé.

²⁶ Habé wa jégenéna ca todero doana main kain bu’, cawa na sela olé go main ddi ba darang kain ’eno, ama Habé gang gusugé wa olé Kumu caina dang ulé go na bbal ca yo kual goi dang ’eno.

²⁷ Kumu go solé kalang ddaindigé na, sol henga ga Habé wa daré ca olegé, cawa Habé wa olé ca kalang ga Kumu kai main Kumu ba darang kain.

²⁸ Na sol ca Kumu wa lo gié dang henga mam ca ddara ca ké ga kederégé ba ’yei, na ké ga ddi ba tégé ca lo henga ga kederei ba dargé.

²⁹ Cawa kalang ga Kumu ba pargé tumu din na, ddi gabega ca kandia belu gené main Kurondia belu go tumu a duro karmé ga combi.

³⁰ Kalang ga Kumu ba gabegé tumu din na, ddi tégé bua, kalang ga ddi ba tégé na, ddi belegé geddang tumoi bua, kalang ga ddi ba belegé geddang tumoi na, ddi bigé hormo doi bu’.

Kederé ’yo ga Kumu kai na ga gumu

³¹ Na ya mena ddang com ga? Kumu nia dang nana na, na wanga bbalé lo tebenang nana ga?

³² Kurondi bang go guad guad kau, ddi naranang nai ’eno, ama ddi bigi caina mam, main kain na ddi go boana henga mam daiang Kurondi lé bu’ ’eno ga?

³³ Na wanga go kimbé kalang ga Kumu ba pargé ga? Kema pena wo ’eno, cawa Kumu yé waldong wang, ddia dor kual caigé cong ’enda.

³⁴ Na wanga go kaidé kual caigé ga? Kema pena wo ’eno, cawa Jésu ma, ké beleiang cindi a duro ga maré bua, ddi jom wo ca Kumu kobi go barua bua, ddi wa olei caina bu’.

³⁵ Na wanga go guasinyana dang kederé ’yo ga Krist kai ga? Homé kau nyagé, kau gelé go cin, kau bagedara, kau gandela, kau kebu temai, kau maré bbal guasinyana ga?

³⁶ Main cidab do Kumu toi ba yang waldong wang kain: Na cain ma, ké wa deddeni dang joguddu bera teba karé gua, Ké wa loni main gamgé ga ké ba nyimgé ca oré wadelégé kain.

³⁷ Ama ca Kumu kederei ba ’yana na, na ddi ca henga lé kua mam.

³⁸ Cawa ’enung sol duro ddaindung ca henga pena ga bbalé guasinyana dang kederé ’yo gai wo ’eno, kau maré, kau jomé goang cindena, kau kangiyong, kau ga ddo ca dang dono do habé ga isini togé, kau henga ga cakcak kua, kau henga ga wa orang.

³⁹ Kau dono do dang, kau dono do duro delinya, kau henga ga Kumu ba debegé gani gani, ké go bbalé ca guasinyana dang kederé ’yo ga Kumu ba lang nana dang Bagulondena Jésu Krist ’eno bering.