MAKTUB DO PAUL TOI DO BA GIO GUSU GA ROM 6 - Kebu go dore go herua 1978

Maré a gusu isinwa, jomé goang cindi a gusu Jésu Krist

¹ Na ya mena ga? Na da jom duro isinwa ca wai do Kumu toi wura nain ga?

² Na main kain ’eno, na ga ba ma duro isinwa na, na sai jogu jomang cindena duro isinwa mena ga?

³ Keng sela ca na mam ga ké ba desana daiang Jésu Krist na, ké desana ca na daia dang nai pena duro maré goi ’eno ga?

⁴ Na ca ma, na ma daiang nai bua, ké ’embana daiang nai a gusu desé bu’, cawa main Krist ba belang cindi a duro ga maré dang dono do Ba go hormo toi kain na, na da jomang cin ga herua main kain bu’.

⁵ Cawa na nia daiang nai duro maré goi pena na, na da daiang nai duro belé goi goang cindi a duro ga maré main kain bu’.

⁶ Na sol ca ké bbobel kema guana go tumu ca sia go adegelé daiang Krist ca ké tunya gusuna go isinwa lé kua cong, ca ddo na jomgé goiyong ga isinwa ka com ’eno.

⁷ Cawa kema go ba ma na, ddi nuroddu a kuaba isinwa ’enda

⁸ Na nia ma daiang Krist na, na bu cindi ca na da jomang cindena daiang nai bu’.

⁹ Na sol ca Kumu belé Krist dang cindi a duro ga maré, ddi go jogé maré ddang com ’eno bua, maré dang dono cai ’eno bering bu’.

¹⁰ Kiddin ga ddi ba ma na, ddi ma ca isinwa cai pena mera, ama jomé goi goang cindi cakcak kua na, ddi jomang cindia ca Kumu.

¹¹ Ga sela gusugeng main ga maré kain a gusu isinwa, ama keng danga cindeng ca Kumu a gusu Jésu Krist.

¹² Na ca ma, ga ddo isinwa do termala ca gusugeng go maré lé kua, ca keng kobé tabelang doi do isini ’eno.

¹³ Henga ga gurum gusugeng kai na, ddo keng aié pena loang gié go isini go isinwa kua ’eno, ama ga bi Kumu gusugeng main kalang ga belang cindegé a duro ga maré kain, ga bu gusugeng mam ca lo gié goi go geddang.

¹⁴ Cawa isinwa go ddo termala caigeng gad ’eno, ca keng wa to so dugo ’eno, ama keng wa to wai do Kumu toi.

Goiyong ga geddang kai

¹⁵ Na mena ga? Na da lé isinwa ca na wa to so dugo ’eno, ama ca na wa to wai do Kumu toi ga? Na main kain ’eno bering.

¹⁶ Keng sol ca kema go kenga jé kual goi ca lo gié goi na, keng bela goiyong gai ca keng ba jé kual goi. Keng joa kual go isinwa kua go oregeng duro maré laba, keng joa kual go bogeng jomé goang cindegeng go geddang tumu Kumu ga?

¹⁷ Ama na lei Kumu désé cawa tumu kenga goiyong ga isinwa ka, ama cakcak kua na, keng wa kobé gelé go keng ba jé dang ddainya pena.

¹⁸ Kumu torgeng a duro isinwa, keng bela goiyong ga geddang kai.

¹⁹ Enung yegeng kual main kainya ca todero do gusugeng toi, tumu na, keng bu gusugeng mam goiyong ga lo gié go ddisin kua, dang isinwa do gendei bu’, ama cakcak kua ga bu gusugeng mam goiyong ga lo gié go geddang kai, ca keng jima arin carara.

²⁰ Kiddin ga kenga goiyong ga isinwa ka na, kenga goiyong ga geddang kai ’eno.

²¹ Gié gogeng go keng ba lei tumu, go keng wa solei ddia go dasi cakcak kua na, keng waia wa cai ga? Gié lé ’yang nagenga duro maré.

²² Ama cakcak kua ké torgeng a duro isinwa, keng la gié go Kumu koi, keng wa oré duro jomé goang cindegeng go arin carara, to do karé na, jomé goang cindegeng bera kuddum.

²³ Cawa boié go isinwa na maré, ama bo kalin do Kumu toi na jomé goang cin bera kuddum a gusu Bagulondena Jésu Krist.