MAKTUB DO PAUL TOI DO BA GIO GUSU GA ROM 5 - Kebu go dore go herua 1978

Jalua juam dang Kumu

¹ Cawa na belé geddang tumu Kumu na ca bo cindi na, cakcak kua nanga jalua juam dang Kumu ca Bagulondena Jésu Krist.

² Na bbal ca oré gusu wai do Kumu toi do na ba ’eré dura kua, na ca Jésu a gusu bo cindi. Nanga gusu mowa ca na da wai hormo do Kumu toi.

³ Na main kain mera ’eno, nanga gusu mowa a duro gelé go cin cawa na sol gelé cin bena ’yomé go ddainya.

⁴ ’Yomé go ddainya bena ’eré go gegerag bua, ’eré go gegerag bena tugoié bu’.

⁵ Tugoié go melana gusuna ’eno, cawa Kumu bena kederé ’yo gai a duro ddaindena, a gusu Habé gai ga arin carara ga ddi ba benang nagé.

⁶ Cawa kiddin ga nang dono ’eno dé na, Krist ma ca kalang ga isindong a duro kiddin ga Kumu ba sigé kerab.

⁷ Ca kema mara ca kema go geddang na, na doju bbani ’eno. Kema go pena da ’yom ddaindi ca ddia maré ca kema go ddari laiga.

⁸ Ama Kumu gelna kederé ’yo gai waldong wang, cawa kiddin ga na kalang ga isindong dé na, Krist ma ca kondina.

⁹ Cakcak kua na, na belé geddang tumu Kumu ca Jésu kebardi, na ca ma na da minyé a duro mainyé do Kumu toi.

¹⁰ Tumu na ga tebena dang Kumu, ama ddi daina labia dang nai ca maré go Kurondi koi. Ca na ba dai labia dang nai cakcak kua na, ddia minyana ca Kurondi jomé goi goang cindi.

¹¹ Na kain mera ’eno, nanga gusu mowa dang Kumu ca Bagulondena Jésu Krist, ddi go ba daina labia dang Kumu cakcak kua.

Adam kang Krist

¹² Isinwa ’andegang duro delinya na ca kema go ké ba tei Adam pena mera, maré ’erga ca isinwa lé, na ca ma, maré jia deba do kalang togé mam, ca kalang mam la isinwa.

¹³ Kiddin ga Kumu bi Mois so ’eno dé na, isinwa wo kené duro delinya tumu din, ama Kumu dduginya isinwa ca kalang ’eno, cawa so wo ’eno.

¹⁴ Adam kain kual go Kumu ba yei cong, ama a duro saman do Adam toi bera ’erga saman do Mois toi na, kalang ga ba la isinwa do main Adam toi kain kau, maré di termala caigé. Adam na kual go kera ca ddi go da ’erga

¹⁵ Ama wané do Adam toi lé, dda wai do Kumu toi ’eno, cindi na sol ca kalang combu ma ca wané do kema go pena lé toi, ama wai do Kumu toi, dang kalin doi do ddi ba bégé kalang combu a gusu kema go pena Jésu Krist na nain, ddi wal.

¹⁶ Wai do Kumu toi do kalin mainya isinwa do Adam toi lé kain ’eno. Kual go kaidé ’erga ca isinwa do Adam toi lé, ama ca wai do kalin do Kumu toi na, ddi dor isinwa do nain caina cong.

¹⁷ Cindi, maré di termala ca wané do kema go pena lé toi, ama ca Jésu Krist pena na, na wai henga ddi mam. Ké mam ga ba ’yé wai do Kumu toi do nain dang kalin doi do belé geddang tumoi na, ka jom di termala dang Krist.

¹⁸ Cawa main kual go kaidé ba ’erga ca kalang mam ca wané do Adam pena toi kain na, ca gié go geddang go Jésu Krist pena koi na, ddi tor kalang mam a duro kual go kaidé ca kandia jimang cindegé main kain bu’.

¹⁹ Ca kual go kainyé go kema go pena koi ma, kalang combu belé kalang ga isindong, ca kema go pena go jo kual na, kalang combu belé geddang tumu Kumu bu’.

²⁰ Kumu bu so ca wané belu nain, ama a kiddin ga isinwa ba belé nain na, wai do Kumu toi kau belé nain ddi bu’.

²¹ Ca maré ma, isinwa diang termala kua bua, ca belé go geddang ma, wai do Kumu toi do boagana duro jomé goang cindena bera kuddum, diang termala kua main kain bu’, ca Bagulondena Jésu Krist.