MAKTUB DO PAUL TOI DO BA GIO GUSU GA ROM 3 - Kebu go dore go herua 1978

¹ Ga Juib ddi kalang ga toigé ddang ga? Walé go mandeli danga jégené ga?

² Ké ddiang henga combu cawa Kumu biga ga Juib kual goi tumu jua.

³ Na ya mena ga? Kalang ga pena a duroigé nia geddang ’eno kau na, Kumu da ddé geddang goi cong ca ké ba belé isinwa ga?

⁴ Na main kain ’eno, kema goni goni nia belu go poi kau, na gad Kumu jomanga kual goi go cindi, main cidab do Kumu toi ba yang waldong wang kain: Na gad ké sol ca jia geddang ca kual goin go yo, Ké nia kaidé kual cain kau, jia ddigé.

⁵ Ama isinwa duana nia gel geddang do Kumu toi dong na, na ya mena ga? Kumu nia kaidé kual caina, ddia geddang ’eno ga? (’Enung yé kual mainya kalang kain.)

⁶ Na main kain ’eno, Kumu nia geddang ’eno na, ddia bbal kaidé kual ca delinya mena ga?

⁷ Ama poi doang nia gel Kumu kual goi go cindi dang hormo doi waldong wang na, ké kaidé kual cang main ’enunga kema go isini kainya cawa ga?

⁸ Ni wia kain na, na logeng henga ga isini ca dda ddarua gel dong ’eno ga? Kalang ga pena yé kual go isini cang, ké yé wa: ’Enunga dor kual main kain. Kumu da kaidé kual ca kalang lé bbal ca wané dogé.

Kema go geddang wo ’eno

⁹ Na mena ga? Na ga Juib, na ddia kalang ga toigé ddang ga? Na main kain ’eno. ’Enung yogeng ka, ga Juib dang kalang ga toigé ddang mam wa to isinwa dugo.

¹⁰ Cidab do Kumu toi yé waldong wang: Kema go geddang wo ’eno, kau pena wo ’eno,

¹¹ Kema go solé kual toi pena wo ’eno bua, Kema go daré Kumu pena wo ’eno bu’.

¹² Kalang mam suguddong hasang Kumu, Ké kaiyong to gusugé pena. Kema go lo henga ga ddari pena wo ’eno.

¹³ Tumoigé mainya umbung go ’embé temai goang hangang kain bua, Kelendigé ya kual go babé bua, Kual go andong a kebegé mainya mainyé do kumbulo toi kain bu’,

¹⁴ Kebegé wonanga bbesé dang kual go ddainyi.

¹⁵ Ca deddé temai na, ké gera kala,

¹⁶ Kiddin gani gani ga ka hal kené na, Ké dda toanyang dang kederé ’endua.

¹⁷ Ké sela giyong go jalua juam ’eno,

¹⁸ Ké muru Kumu ’eno bu’.

¹⁹ Na sol ca kual go so go Kumu koi ba yei mam. Ddi yéga ké ga ba jom to so dugo ca ddo kema pena soang toi ’eno bua, ca kalang a duro delinya mam jom wa to kual go kaidé go Kumu koi bu’.

²⁰ Cawa kema pena go belé geddang tumu Kumu ca magé go so na, wo ’eno. So go Kumu koi gel kema isinwa doi mera.

Kumu minyé kalang

²¹ Cakcak kua Kumu gelna giyong go ddi ba belana geddang tumoi, na a gusu so ’eno, so go Kumu koi dang ga cogelé kebu go Kumu koi ba yé kual goi.

²² Kumu belé kalang geddang ca bo cindi gogé ca Jésu Krist. Ddi lé kalang ga bo cindi ca Krist mam na main kain, cawa kalang mam na pena tumu Kumu.

²³ Cawa kalang mam la isinwa, ké wiang hormo do Kumu toi.

²⁴ Ca olum do Kumu toi na, ddi belegé geddang kalin ca Jésu Krist go ba torgé.

²⁵ Kumu belé Jésu Krist sandega do tibé dang kebardi. Krist bbal burogé kalang ga bo cindi cai isinwa dogé. Kumu lé main kainya ca gelé geddang doi waldong wang. Ddi ’yom gusi tumu din, ddi sol isinwa do kalang togé semgen.

²⁶ Ama a duro saman do cakcak kua na, ddi gel waldong wang ca ddi belé kalang geddang, ddi dar ca ddi jomé geddang bua, ddi dar ca kalang ga bo cindi ca Jésu bel geddang mam bu’.

²⁷ Henga ga ddang ga kalang pedé gusugé dang nagé wo kené ga? Henga pena ja ’eno, na ca wa ga? Na ca ké ba magu so ga? Na main kain ’eno, ama na ca bo cindi.

²⁸ Cawa na sol ca kema belé geddang tumu Kumu na ca bo cindi, na ca magé go so ’eno.

²⁹ Kumu na Kumu go Juib kogé mera laba, ddia Kumu go kalang ga toigé ddang kogé bu’ ga? Cindi ddia Kumu go kalang ga toigé ddang kogé bu’.

³⁰ Cawa Kumu wo kené pena mera. Ddi belé ga Juib geddang ca bo cindi gogé bua, ddi belé kalang ga toigé ddang geddang ca bo cindi gogé main kain bu’.

³¹ Henga lé kua gelna ca bo cindi toinya so cong mam ga? Na main kain ’eno, na bu soa dono do nain bbad com.