MAKTUB DO PAUL TOI DO BA GIO GUSU GA ROM 15 - Kebu go dore go herua 1978

La henga ca mowoi mondin gusi

¹ Na gang dono duro bo cindi na, na ddar na jégené ga todero duro todero dogé. Ddo na logeng henga ca mowa gusuna mera ’eno.

² Dda kema goni goni kau la henga ga mowoi mondi gusi ca jégenei, ca ddi ’era tumu tumu duro bo cindi.

³ Cawa Krist la henga ga mowoi ddi bang gusi mera ’eno, na main kain ’eno, ama na main cidab do Kumu toi ba yang waldong wang kain: Kalang ga ba nyangdin na, nyangdé gogé ba cang.

⁴ Kual go ké ba pasi tumu duro cidab do Kumu toi mam na, ké pasia ca gelena ca na jimang tugoié bua, dang ’yomé go ddainya bua, ca na ’er gag ca kual go cidab do Kumu toi kua bu’.

⁵ Dda Kumu go bo ’yomé go ddainya ca keng ’er gag na, ddi jomang labia duro gusugeng ca lo main Jésu Krist ba lang kain kerab.

⁶ Ca keng mam kebegeng jima pena ca debainyé Kumu go Bagulongena Jésu Krist bai.

Nô do Ddari ca kalang mam

⁷ Ga ’ya gusugeng main Krist ba ’yegengang kain ca hormo do Kumu toi.

⁸ Cawa ’enung yegenga waldong wang: Krist belé go gié go Juib kogé ca ser to kebu go doré go Kumu koi go ddi ba dor moinderégé ca ddia Kumu go geddang.

⁹ Ddi ’erga ca kalang ga toigé ddang debainya Kumu ca olum doi bu’, main cidab do Kumu toi ba yang waldong wang kain: Na ca ma ’enung da debeinyin duro kalang ga toigé ddang, ’Enung da dé kera go debainyé gusondin.

¹⁰ Cidab do Kumu toi yé waldong wang com: Kalang ga toigé ddang, dda gusugeng mouageng dang kalang ga Kumu ba pargé.

¹¹ Ddi jogu yégé com: Keng kalang ga toigé ddang mam, ga debainyageng Bagulong. Dda kalang mam debainyai.

¹² Esai yé main kain bu’. To moin go Jésé koi da ’erga, Ddi da di termala ca kalang ga toigé ddang. Ka si tugoié gogé cai.

¹³ Dda Kumu go so kalang tugoié na, ddi bugeng gusu mowang jalua juam a gusu bo cindi go kengang na, ca tugoié gogeng wa dono a gusu Habé ga Kumu kai.

Paul danga dono do pasé main ddi ba darang kain

¹⁴ Karmeng, ’enung sol carara ca keng danga ’olum combu bua, dang solé combu bbal ca géjé gusugeng bu’.

¹⁵ Ama ’enung pasugeng kual duro maktub duanga basé muro ca hénogeng ca kual go keng ba jei. ’Enung pasua ca wai do Kumu toi do ddi ba lang nang.

¹⁶ ’Enunga go gié go Jésu Krist koi ca kalang ga toigé ddang. ’Enung lé gié go tibé Kumu ca doré Nô do Ddari do Kumu toi, ca kalang ga toigé ddang bel henga ga tibé ga mowé Kumu gusi, cawa ké belé arin carara a gusu Habé ga Kumu kai.

¹⁷ ’Enung bbal pidé gusung ca gié guang ca Kumu ca ’enunga pena dang Jésu Krist.

¹⁸ Cawa ’enung nia dar ca yo kual ca henga ga pena na, ’enung yé kuala ca henga ga Krist ba légé gusung mera, ca orangang kalang ga toigé ddang ca ké ja kual go Kumu koi ca kual go yo bua, dang gié go lo bu’.

¹⁹ Kiddin ga ’enung ba dal kiddin mam na, ’enung dor Nô do Ddari do Jésu Krist toi waldong wang a Jorsalem bera gesong ga Ileri, ’enung doara danga henga ga gelé bua, dang gié go dono go kagelokemo bua, dang dono do Habé togé bu’.

²⁰ Ama ’enung dar ca doré Nô do Ddari a kiddin ga ké ba ja kual go Krist koi ’eno dé, cawa ddo ’enung gaddé ca kulu toi do kema go ddang ba dei ’eno.

²¹ Main cidab do Kumu toi ba yang waldong wang kain: Ké ga ké ba yagé kual goi ’eno na, ka soli, Ké ga ba ja kual ’eno na, ka sol kual lé toi.

Paul yé ca ddia da ’yé Rom

²² Kua, na kual go ba narung wolé combu ca oré gusugeng.

²³ Ama cakcak kua na, gié guang go a ca gesong lé ka ’enda. Dang ddegelé combu ’enung dar ca oré gusugeng.

²⁴ Kiddin ga ’enunga ca oré Espanyé na, ’enung da solgeng. ’Enung da jomang nageng sam, kardené ’enung da wai jégené a gusugeng ca orang ca gesong lé.

²⁵ Ama cakcak kua na, ’enung dar ca oré Jorsalem ca jégené kalang ga Kumu kai ga a kuani.

²⁶ Cawa kalang ga Krist kai ga a Masadon dang ga Akai, ké nyan kual ca yaué kalin ca bo kalang ga Kumu kai ga nyagé ga a Jorsalem.

²⁷ Ké gang nyana kual lang gusugé. Ama na ddar ké jégena ga nyagé lé, cawa ga Juib ga Krist kai ga a Jorsalem gosin busu dogé do Habé togé gusu kalang ga toigé ddang, na ca ma, na ddar ca kalang ga toigé ddang jégenagé dang henga gagé ga ké ba waigé.

²⁸ Kiddin ga ’enunga ka gié go bogé henga ga ké ba yaugé lé na, ’enung da ’yé gusugeng kiddin ga ’enung wa halé ca oré Espanyé.

²⁹ ’Enung sol kiddin ga ’enunga ’yeni gusugeng na, ’enunga ’yenianga busu do Krist toi combu.

³⁰ Ama karmeng, kua na henga ga ’enung wa olgengang Bagulondena Jésu Krist gusondi, dang kederé ’yo ga Habé kagé, ga wurinyageng kembel daiang nang dang olé go meregdé tumu Kumu cang.

³¹ Ga ulageng ca ’enung minyu a kuaba kalang ga basé bo cindi ga a Judé, ca kalang ga Kumu kai ga a Jorsalem da wa jégené go ’enung wa orang bogé dang gusu mowa.

³² Kumu nia dar main kain na, ’enung da waigeng dang gusu mowa combu bua, ’enung da bé gelalé duroigeng bu’.

³³ Kumu go bo jalua juam, ddi jimang nageng mam. Amin.