MAKTUB DO PAUL TOI DO BA GIO GUSU GA ROM 13 - Kebu go dore go herua 1978

Ga jageng ga ddo ca kual gogé

¹ Dda kema goni goni kau ja kual go kalang ga ddo ca kogé, dono do ddo ca doni doni kau saga a gusu Kumu, cawa Kumu na boi go ddo ca dono lé.

² Main kain na, kema goni goni goa kain go ddo ca kual goi na, ddi kainya kual go Kumu koi bu’. Kalang ga kainyé kual go main kain lé na, ké ’erganga kual go kaidé caigé.

³ Cawa kalang ga lo henga ga isinwa na, ké leia muro. Ji dar ca lo go ddo ca muro ’eno ga? La henga ga ddari, main kain na, ga ddo ca da pedein.

⁴ Cawa ddi la gié go Kumu ba bi ca jégenein. Ama ji nia lé henga ga isini na, la muro, cawa ddianga dono ca kaidé kual cain bua, ddi la gié go Kumu koi ca gelé mainyé do Kumu toi gusu ddi go lo isinwa.

⁵ Na ca ma, ga jageng ga ddo ca kual gogé, na ca mainyé do Kumu toi mera ’eno, ama ca kual go duro ddaindegeng bu’.

⁶ Na ca ma, ga begeng hogé, cawa kiddin ga ga ddo ca ba lé gié lé kain na, ké la gié go Kumu ba bigé.

⁷ Kema goni goni kau, ga bi henga gai, ddi go ’yo hogé na, ga bi hogé goi. Ddi go hogé henga ga duro gulong ka, ga bi bu’. Ddi go bbal ca keng lei muro na, ga meri, ddi go bbal bo hormo kau, ga bi hormo bu’.

Dda kederein ’ya mondin

⁸ Jomegeng dang tugula do kema pena toi caigeng ’eno, ama ga jimageng danga tugula do go kederé ’yo toi dang gusugeng. Ddi go kederei ba ’yé kamdi na, ddi magua so mam.

⁹ Kua na so lé, ji lo béli ’eno bua, ji deddé temai ’eno bua, ji koié ’eno bua, ji lo tabelang ’eno bu’. So go ddang goni goni mam kau, ké daia duro so lé kua pena: Dda kederein ’ya mondin main gusin kain bu’.

¹⁰ Kema goni goni goang kederé ’yo na, ddi go lo mondi isinwa ’eno, ddi goang kederé ’yo na, ddi la ca so lé mam.

Nyanageng gusugeng ca orang go Krist koi

¹¹ Ga lageng main kainya cawa keng sol saman do cakcak kua. Keng lebu a to kung dang cawa kiddin bbal, cakcak kua minyé caga ’yoabang nana, ddi wolé go na ba bu cindi.

¹² Soindo wa karé ’enda, kiddin jia ’yoab ca wolé, dda na kainyé gié go lo duro delem cong, dda na sogeng henga ga arinyi gusuna ca worinyang kembel.

¹³ Ga ’ernageng dang duro ddingar main kalang ga orang teba kain, ddo keng lo gendei ’eno bua, ga koiegeng dang céré ’eno bua, ga lo béli ’eno bua, ga lo podelo ’eno bua, ga bojegeng ’eno bua, ga logeng ddéngi ’eno bu’.

¹⁴ Ama ga segeng Bagulong Jésu Krist gusugeng, ddo keng ’eremang tabelang do gusu toi ’eno.