MAKTUB DO PAUL TOI DO BA GIO GUSU GA ROM 11 - Kebu go dore go herua 1978

Kumu kainya ga Israél cong ’eno

¹ ’Enung go ’engeré dé, Kumu kain kalang gai cong ga? Na main kain ’eno bering, cawa ’enung banga go Israél bua, ’enunga Abraham moindi go to moin go Bénjamin koi bu’.

² Kumu kainya kalang gai ga ddi ba pargé tumu din cong ’eno, keng sol kual go Eli koi go ké ba pasu duro cidab do Kumu toi kiddin ga ddi ba olang meregdé ca ga Israél tumu Kumu, ddi yé wa:

³ Bagulong, ké deddu kalang gain ga cogelé kebu bua, ké dosié dandang doin do tibé bu’, ’enung banga jo pena, ké wa darang ca deddung bu’.

⁴ Ama Kumu jogu yeia mena ga? ’Enung magu kalang gang wo kené dubu jurgum, ké ga ba pia gomdigé tumu kula go Baal ’eno.

⁵ A duro saman do cakcak kua kau, kalang ga pena wo kené ga Kumu ba pargé ca olum doi.

⁶ Ddi parga ca olum doi, na ca gié gogé go lo ’eno, nia kain ’eno na, olum do Kumu toi na do cindi ’eno.

⁷ Na ya mena ga? Henga ga Israél ba dargé na, ké waiegé ’eno, ama ké ga Kumu ba pargé na, ké waigé, kané ga ba wa ’eno na, ké sela kual lé toi ’eno.

⁸ Main cidab do Kumu toi ba yang waldong wang kain, Kumu belé ’eremé gogé mader, ddi nargé ca kandia da solang cindegé ’eno bua, ca kandia jomang gésemégé ’eno bu’ bera labegé.

⁹ Dabid kau yé main kain bu’: Dda do gogé bel cendong ga ’yomegé, Ca kandia aserang duro kual go kaidé.

¹⁰ Dda cindegé lebudu ca ké solé kiddin ’eno bua, Ji menjurda céngeigé waindo waindo bu’.

¹¹ ’Enung go ’enger dé, aserong go Juib kogé na goang cindegé bering ga? Na main kain ’eno, ama na ca wané dogé ma, kalang ga toigé ddang wai minyé, ca dda ga Juib la ddéngé dang nagé.

¹² Delinya nia wai busu ca wané do ga Juib togé na, kalang ga toigé ddang wai busu ca aserong gogé bu’, ama kiddin ga ké nia jogu wai minyé na, busu dogé da ddi wal.

Minyé go kalang ga toigé ddang kogé

¹³ Cakcak kua na, ’enung wa yogenga keng ga toigeng ddang kual, ’enunga paja go gié ca kalang ga toigé ddang, gusung mowung ca gié guang.

¹⁴ ’Enung dar ca belé kalndeng ca ké le ddéngi ca ga pena waia minyé.

¹⁵ Kiddin ga Kumu ba kaingé cong na, ddi dai kalang duro delinya labia dang nai, kiddin ga ddia ’yégé na, ddia léga mena ga? Ddia bigé jomé goang cindegé main kalang ga ba belé a duro ga maré kain.

¹⁶ Ké nia bi Kumu wo go tumu jua na, toi do jo kau na koi bu’, ké nia bi Kumu sia gaserei na, kéliei na kai bu’.

¹⁷ Ga Israél mainya sia go tabur go gulong go ké ba sederé kéliei ga pena cong kain, ji go toin ddang na, ji mainya sia go tabur go cong keliai go ké ba sergi ca ’yobi baimei kain, cakcak kua ji wa malganga cuwer go taber go gulong koi.

¹⁸ Na ca ma ddo ji doré kelié ga ké ba sederégé cong kel ’eno, ji pedé gusinya cawa ga? Na jia wa kojé gaseré ’eno, ama gasara wa kojein.

¹⁹ Ama jia yeng wa: Ké sederé kelié conga ca ’yobang baimégé.

²⁰ Na cindi, ké sederégé conga ca ké bu cindi ’eno, ji wo baiméga ca ji ba bu cindi, ama ji la angal, ddo ji pedé gusin ’eno, golgo ji la muro.

²¹ Cawa Kumu nia maga ga Juib gang ga kelei ga tumu ’eno na, ddi go magein ’eno bu’.

²² Kual lé gelna olum dang kual go kaidé go homi go Kumu koi, ddi kaidé kual go homi ca ké ga ba aserong ama ddi lein olum, na gad ji jima duro olum doi, nia kain ’eno na, ddia serin cong main kelia go pena kain.

²³ Ga Juib nia ddé térin dogé lé cong na, ddia jogu ’yobegé main go tumu kain, cawa Kumu danga dono ca ’yobegé herua ddang com.

²⁴ Ji go toin ddang, jia kelia go tabur go cong koi go ké ba sergin ’yobin ca tabur go gulong, na ca debé goin ’eno. Ga Juib, ka tabur go gulong keliei ga tumu, ca jogé ’yobegé ca sia go tabur go tumu herua ddang na, huma ’eno.

Kumu da minyé ga Israél

²⁵ Karmeng, ’enung dar ca keng sela kual go cindi go mendem lé kua toi ca ddo keng pedé gusugeng dang narua dogeng ’eno, ga Israél ga pena bbala solé kual lé toi ’eno, ama kual la lé main kain bera ca kalang ga toigé ddang wa minyé jua.

²⁶ Ka minyé ga Israél mam main cidab do Kumu toi ba yang waldong wang kain: Go minyé da sai a Sion, Ddia tor isinwa do Jakob moinderei togé mam,

²⁷ Kua, kebu go doré go ’enunga dorang nagé, Kiddin ga ’enunga tor isinwa dogé cong.

²⁸ Na sol ca ga Juib kain Nô do Ddari do Kumu toi cong, ka Kumu kai ga tebena, ama ddara caigeng. Nia ca paré na, Kumu kederei ’yégé ca moinderégé.

²⁹ Cawa Kumu go jogé ’yo henga ga ddi ba bigé kalin ’eno bua, ké ga ddi ba tégé na, ddi go kelangé ’erem goi caigé ’eno bu’.

³⁰ Tumu na, keng kain kual go Kumu koi cong, ama cakcak kua na, Kumu sol nyageigeng ca ga Juib ba ja kual goi ’eno.

³¹ Main kain na, cakcak kua ké kain Kumu cong ca Kumu sol nyageigé main ddi ba solang nyageigeng kain bu’.

³² Cawa Kumu ’yom kalang mam ca wané dogé ca ddia solé nyageigé mam.

Gemyai do Kumu toi

³³ Lainyong go Kumu koi na nain, narua doi dang solé goi na ddigé, na wanga bbalé ca doré kual goi lé toi ga? Na wanga bbalé ca solé kual go ddi ba nyani lé toi ga?

³⁴ Main cidab do Kumu toi ba yang waldong Wang kain: Na wanga solé ’eremé go Bagulong koi ga? Na wanga bbalé ca géjei ga?

³⁵ Na wanga bbalé boi henga tumu jua, Ca kondia jiga bi baiméné ga?

³⁶ Ca wa henga mam saga a gusi, ddia debé henga mam, ké jima cai bu’. Hormo na Kumu toi waindo waindo bera kuddum.