MAKTUB DO PAUL TOI DO BA GIO GUSU GA ROM 10 - Kebu go dore go herua 1978

¹ Karmeng henga ga ’enung wa daregé dang ddaindung pena, ga ’enung wa olé Kumu caigé na, na ca ga Juib waia minyé.

² ’Enung yé waldong wang ca kanga tabelang ca Kumu, ama ca tabelang dogé kau na, ké sela kual lé toi arin carara ’eno.

³ Ama ké sela kual go Kumu belé kalang geddang tumoi lé toi ’eno, ké dar ca belé geddang ca gié gogé goang macaigé, ké kain kual go Kumu koi go belé kalang geddang cong.

⁴ Cawa Krist na to do karé do so go Mois koi, ca kema goni goni goa bu cindi na, ddi belu geddang tumu Kumu.

Minyé na ca kema goni goni goa bu cindi ca Bagulong

⁵ Kua, na kual go Mois ba pasi ca belé geddang tumu Kumu ca kobé so, ddi yé wa: Kema goni goni goa kobu so lé na, ddia jomang cindi cai.

⁶ Ama kua na kual go ddi ba yei ca belé go geddang tumu Kumu ca bo cindi: Ddo ji yo wa, na wanga no naié dang ga? (To do poré, na ca gesinyang Krist dugo.)

⁷ Ddo keng yo wa: Na wanga go gesinyé a to gesong dugo ga? (To do poré na ca golang Jésu a duro ga maré.)

⁸ Mois ya mena ga? Ddi yé main kain: Kual na ’yoabang nain, a kibin dang ddaindin bu’, kua na kual go na wa dorei go bo cindi lé.

⁹ Ji nia yang kibin tumu kalang waldong wang Jésu na Bagulong bua, ji nia bu cindi a duro ddaindin ca Kumu beleiang cindi a duro ga maré bu’ na, jia minyé.

¹⁰ Cawa kema nia bu cindi a duro ddaindi na, Kumu da belei geddang tumoi, kema nia yang kibi waldong wang na, Kumu da minyei bu’.

¹¹ Cidab do Kumu toi yé waldong wang: Kema goni goni goa bu cindi cai na, dasé go loi ’eno.

¹² Cawa Kumu sol ga Juib kang kalang ga toigé ddang na pena tumoi, ké mam Bagulondiga pena, na ddi go bogé ké ga oloi mam henga ga ddari.

¹³ Cawa main cidab do Kumu toi ba yang waldong wang kain, kema goni goni goa té Bagulong gusondi na, ddia minyé.

¹⁴ Ama ké nia bu cindi cai ’eno na, ka olia mena ga? Ké nia ja kual goi ’eno na, ka bu cindi cai mena ga?

¹⁵ Kema nia gi kalang ’eno na, ka dor kual mena ga? Main cidab do Kumu toi ba yé waldong wang kain. Ca solé ké ga orang dang Nô do Ddari na, ddar bbani ’eno.

¹⁶ Ama kalang mam ’ya Nô do Ddari lé ’eno, cawa Esai ’engeri wa: Bagulong, na wanga bo cindi ca kual go ni ba dori ga?

¹⁷ Cawa ké bu cindi na ca kual go jo, kual go ké ba dorgang nai na, na kual go Krist koi.

¹⁸ ’Enung go ’engeré dé, ké ja kual go doré lé ’eno ga? Ama ké jé main cidab do Kumu toi ba yang waldong wang kain: Ké jé noigé duro delinya mam, Kual gogé ’yé ca gesong bera delinya to do karé.

¹⁹ ’Enung go ’engeré ddang com dé, kalang ga Israél solé kual lé toi ’eno ga? Sela Mois yé main kain: ’Enung da segeng lo ddéngi ca kalang ga toigé ddang. ’Enung da segeng lo mainyé ca kalang ga basé solé.

²⁰ Esai yé kual basé muro waldong wang: Ké ga ba darang ’eno na, ké waiyung, Ké ga ba darang ’eno na, ’enung gel gusung cindegé.

²¹ Ama ddi yé ca ga Israél wa: ’Enung tar kalndung gusu ké ga basé jo kual dang ga mainyé kual dang joguddu bera teba ka.