Pilipié 3 - Kebu go dore go herua 1978

Jomé go geddang go cindi tumu Kumu

¹ Karmeng, cakcak kua na, dda gusugeng mowegeng ca Bagulong. Ca jogé yogeng kual go ’enung ba pasugeng dang nai tumu na, go hoamang ’eno, ama na ddar caigeng.

² Ga lageng angalang kalang ga lo henga ga isini, ka gaié, ka kalang ga wadelé henga ga pena gusu kema gusi cong.

³ Na na, na kalang ga ba wai walé go mandeli do cindi, na ké ’eno, cawa na lé gié go Kumu koi danga Habé gai. Na pidé gusuna danga Jésu Krist, na déngé gusuna danga henga ga gusuna ’eno.

⁴ ’Enung bang kau bbal ca déngé gusung dang henga ga gusung. Kema go pena nia ’erem wa, ddia déngé gusiang lak do henga ga gusi na, ’enung ddia ddo.

⁵ Kiddin ga ’enungang wolé margem na, ké walung mandeli. Ca wo guang na, ’enunga go Israél, a to moin go Bénjamin koi, ’enunga kié go gulong go Hébero, a ca magé go so go Juib kogé na, ’enunga Parisié.

⁶ Ca ddéngi na, ’enung gel yaué go Kumu koi cindi. Ca belé geddang a gusu magé go so na, ’enunga basé kual cang.

⁷ Henga lé ’enung solgé mainya cageda duang kain, ama cakcak kua na, ’enung solga main henga ga kalin kain ca Krist.

⁸ Na ca henga lé kua mera ’eno, ama ’enung sol henga mam mainya henga ga kalin kain, ca ’enung solé Bagulong Jésu Krist ddar. Ca kondi na, ’enung ddé henga cong mam, ’enung solgé mainya henga ga saré bogé ca gubu kain ca ’enung waié Krist bua,

⁹ ca ’enung daié penang nai bu’. ’Enung yegeng waldong wang ca ’enung belé geddang tumoi ca magé go so ’eno. ’Enung belé geddang tumoi, na ca bo cindi guang ca Krist. Geddang lé saga a gusu Kumu ca ké ga ba bu cindi cai.

¹⁰ Henga mam ga ’enung ba dargé na, ’enung dar ca solé Krist, dang dono doi do ddi ba belang cindi a duro ga maré, ’enung dar ca daiang nai duro gelé goi go cin, ca ’enung belé main nai kain duro maré goi bua,

¹¹ dang tugoié ca ’enung bang da belang cindi a duro ga maré bu’.

Geré go karé to gula

¹² ’Enung ’erem ca ’enung ger kara gula ’eno dé bua, ’enung belu bbalé kerab ’eno bu’. Ama ’enung gau gusung ca oré tumu tumu ca waié boié guang, cawa Jésu Krist ’yeng ca gié goi.

¹³ Karmeng, ’enung ’erem ca ’enung ’ya boié guang ’eno dé, ama ’enung lé henga pena, ’enung giobu henga ga ba hal, ’enung gau gusunga ca henga ga tumang.

¹⁴ ’Enung gera ca karé to gula ca ’yo boié guang go Kumu ba teng cai a dang ca Jésu Krist.

¹⁵ Na mam ga ba bbal kalang ga gemdong ga Kumu kai na, dda na jomegeng dang ’eremé lé kua. Kalang ga pena a duroigeng nia ’erem kaindigé kua na, Kumu da gelgeng kual lé toi arin carara.

¹⁶ Ama na kain mera ’eno, dda na oregeng ddar duro giyong go na ba kubugai bera labegé.

¹⁷ Karmeng, keng mam ga ’yugelang main ni ba lang kain. Ké ga wa ’yogelé main kain lé na, ga selagé ddara.

¹⁸ Main ’enung ba yegengang tumu kai, ’enung wa jogé yegeng cakcak kua com dang ’elé, ga pena wo kené combu ga oré goga tebena dang maré go Krist koi go ca sia go adegelé.

¹⁹ To do karé na, ka basong cawa Kumu gogé na kederégé. Ké peda gusugé dang wané do dasi, ké ’erema ca henga ga delinya ka mera.

²⁰ Ama na karang ga gulong go a dang ni kai, ddi go da saga a dang na, na wa ameia ddi ’yeu ’yeu, na Bagulong Jésu Krist go ba minyana.

²¹ Ddi da belé gusuna go todero lé kua, main gusi go hormo kain, dang dono doi do ddi ba so henga mam a toi dugo.