Pilipié 2 - Kebu go dore go herua 1978

Debé ca dugo go Krist koi dang gemyai doi

¹ Bo cindi gogeng ca Krist belgeng dono ’eno dé ga? Kederé ’yo gai jala ddaindegeng ’eno dé ga? Keng la dandang dang Habé ga Kumu kai ’eno dé ga? Keng la waiang olum dang gusugeng ’eno dé ga?

² ’Enung olgeng ca keng daia pena dang kederé ’yo gageng ga pena, dang ’eremé gogeng go duro ddaindegeng go pena ca dda gusung muang.

³ Ddo keng lo henga pena dang macaigeng ’eno bua, dang pidé go gusugeng ’eno bu’, ama debu caigeng dugo to gusugeng, ddo kané ’eremé ca ka ddi kamdigé ’eno.

⁴ Ama ddo kema pena daré henga ca gusi ddi bang mera ’eno, ama ddai ddi ’erem ca kamdi kané bu’.

⁵ Dda ’eremé gogeng ’era kerab main go Jésu Krist koi kain.

⁶ Tumu din na, ddianga ’eremé go Kumu koi waindo waindo, Ama ddi ’erem ca jomé main Kumu kain dang dono ’eno.

⁷ Ama a duro ’eremé goi na, ddi kain ’eremé go jomé main Kumu kain cong, Ddi ai ’eremé go guiang koi bua, Ddi belé gusi main kalang kain bua, ddi gené main kema kain bu’.

⁸ Ddi ’yé debé ga cai dugo, maré goi gelna waldong wang ca ddi debu caia dugo bera ddi ma ca sia go adegelé,

⁹ Na ca ma Kumu aii dang si ca kiddin ga ddo mam, Ddi bi gusong go ddo ca gusong kané mam.

¹⁰ Na ca ma, kalang ga dang, dang kalang ga ca gesong, dang kalang ga to gesong, ké mam da poi gomdigé tumu Jésu ca bo gusondi hormo.

¹¹ Kalang mam da yé wa: Jésu Krist na Bagulong ca hormo do Ba Kumu toi.

Ga piang main arinwa do delinya tua kain

¹² Kajanderndeng, kiddin ga ’enung wo kené dang nageng na, keng debu caigeng to kual guang waindo waindo, ama cakcak kua kiddin ga ’enung wo ’eno dang nageng kau, keng debu caigeng to kual guang ddi cainé com. Ga lageng gié go minyé gogeng koi dang muro dang yoré.

¹³ Cawa Kumu la gié goi duro ddaindegeng waindo waindo, ca keng bbala ca daré lo main ddi ba darang kain.

¹⁴ Ga lageng henga mam basé sudené dang mainyé kual.

¹⁵ Ga jimageng arin carara basé kual caigeng, dang Kumu karndi ga basé wané a duro kalang ga poi dang ga isindong a duro delinya lé kua. Dda keng piong duroigé biddid biddid main desiddiyong ga dang kain.

¹⁶ Keng yagé kual goang cindi, keng nia la main kain na, ’enung da pedegeng duro wolé go Krist koi, kua da gelgeng ca gié guang mam go ’enung ba ’yom gusung osu pejag lei na, ddi bega gusu ’eno.

¹⁷ Ké nia bé kebardung dugo main sandega do tibé kain ca bo cindi gogeng tumu Kumu na, gusung da wowung bua, gusugeng da mowegeng bu’.

¹⁸ Main kain na, keng kau da lé gusu mowa dang nang bu’.

Timoté kang Apaprodit

¹⁹ Bagulong Jésu nia dar na, sam dé ma, ’enung da giéni Timoté gusugeng. Kiddin ga ’enung nia jé nó dogeng a kibi na, ddaindeng da jalung.

²⁰ Na ddia daié ’eremé goi dang nang mera ca jégenegeng, cindi ddi da jégenegeng bu’.

²¹ Kalang ga ddang mam ’erema ca henga gagé, ké ’erem ca henga ga Jésu Krist kai ’eno.

²² Keng gang sol carara hendé do Timoté toi do ca gié goi go geddang go ddi lang nang, main kurong kang bai kain a duro gié go doré Nô do Ddari.

²³ Kiddin ga ’enunga sol henga ga ka lang nang na, ’enung da gii gusugeng.

²⁴ Ama ’enung sol carara gusu Bagulong, sam dé ma ’enung da ’yé gusugeng ca solegeng bu’.

²⁵ ’Enung ’erem ca gigeng ni kermena Apaprodit, mengang go gié, dang go worinyé, ddi go keng ba gigengang nai ca jégenang ca henga ga ba wiong.

²⁶ Ddi dar nain ca ddia solegeng mam, ama ddiang ’erem nain ca keng ba jé na hoamya lei.

²⁷ Cindi hoamya lei ’yoabang maré, ama Kumu sol nyagei, na cai mera ’eno, ama na cang bu’, ca ddo kedereng hoamang ddang com ’eno.

²⁸ Na ca ma, ’enung boi gusung kala ca giegeng dang nai ni, kiddin ga kenga soli na, gusugeng da mougeng ddang com, ’enung kau kedereng go hoamang nain ’eno.

²⁹ Ga ’yaiang gusu mowa nain duro Bagulong main kermegeng kain. Kalang ga main nai lé kain na, ga bigé hormo.

³⁰ Cawa ddi ji ’yoab ca maré ca gié go Krist koi. Ddi ’eremang gusi ’eno, ca jégenang dang jégené go keng nia bbal jégenang dang nai ’eno.