Pilipié 1 - Kebu go dore go herua 1978

Waigi do Paul toi

¹ Na ’enung Paul, niang Timoté ga gié ga Jésu Krist kai, ni pasu maktub lé kua ca kalang ga Kumu kai mam ga a Pilip ga bo cindi ca Jésu Krist bua, dang gemdong ga gelé yaué go Kumu koi bua, dang gemdong ga jégené gié bu’.

² Dda Baina Kumu dang Bagulong Jésu Krist, ké lageng waiang jalua juam.

Olé go Paul koi ca kalang ga Krist kai ga a Pilip

³ ’Enung lei Kumu désé caigeng mam, a kiddin gani gani ga ’enung wa ’eremang nageng.

⁴ A kiddin gani gani mam ga ’enung wa olé caigeng na, ’enung olanga gusu mowa.

⁵ Ca jégené gogeng go keng ba jégeneng duro gié go doré Nô do Ddari, dang tumu din bera cakcak kua.

⁶ ’Enung sol carara ca Kumu go ba osum lo gié go ddariang nageng na, ddi da lei bera wolé go Jésu Krist koi.

⁷ Na geddang ’enung ’erem caigeng main kain mam. ’Enung ’eremang nageng a duro ddaindung, cawa keng mam daiang nang duro gié go Kumu ba bung, kau kiddin ga ’enung wo duro gerngang, kau ’enung kalin, keng magu Nô do Ddari ddar.

⁸ Kiddin ga ’enung ba yegeng wa: Kedereng ’yegeng mam dang kederé ’yo ga Jésu Krist kai na, Kumu sol ca ’enung ya cindi.

⁹ Sela, kua na olé guang gusu Kumu caigeng, ’enung ola ca kederé ’yo gageng, ké wora tumu tumu duro solé go to go cindi mam.

¹⁰ Ca keng bbala ca paré henga ga ddari bua, ca keng bel arinya carara ga basé kual caigeng duro wolé go Krist koi bu’.

¹¹ Ca dda keng bbala duro gié go geddang go Jésu Krist koi ca boi Kumu hormo dang debainyé.

’Enung jomang cindung na ca Krist

¹² Karmeng, ’enung dar ca keng sela henga ga ba leng na, jégen Nô do Ddari ca oré tumu tumu.

¹³ Asengeriyong ga magé geru go kelma go gumu koi, dang kalang ga ddang mam, ké sol ca ’enung wo duro gerngang ca Krist.

¹⁴ ’Yomé guang go duro gerngang na, bigé karmé combu dono duro Bagulong ca ké dura kual go Kumu koi ’era tumu tumu basé muro.

¹⁵ Cindi, ga pena a duroigé dor nô do Krist toi danga ddéngi dang bojé, ama ga pena dorang ddainya do ddari.

¹⁶ Ké langa kederé ’yo, cawa ké sol Kumu bung gié go doré kual cong a ca Nô do Ddari.

¹⁷ Ga pena dor Nô do Krist toi danga babé go coderé kalang, ké ’erema ca ka suang gelé go cin cang com a duro gerngang.

¹⁸ ’Eremé gogé nia go ddari kau go isini na, na kalin, cawa gusu henga mam Nô do Krist toi ca doré ora tumu tumu, na ca ma gusung mowung, cindi gusung mowung waindo waindo.

¹⁹ Cawa ’enung sol ca olé gogeng, dang jégené go Habé ga Jésu Krist kai kogé na, ka beng dang a duro gerngang.

²⁰ Ca tugoié guang na, ’enung dar nain ca kalang sela Krist a gusung waindo waindo basé muro, kau ’enungang cindung, kau ’enung nia mara, dasi go loang ’eno.

²¹ Cawa jomé goang cindung na, na ca Krist, maré na cageda duang.

²² Ama ’enung nia jimang cindung dang gusung na, ’enung ca lo gié go ddari com, ama ’enung sela henga ga paré ’eno.

²³ ’Enung danga bangdié duro henga ga sua lé kua, ’enung dar ca oré jomang Krist, na golgo.

²⁴ Ama na ddar ’enung jomang cindung caigeng bu’.

²⁵ ’Enung sol main kain carara, ’enung nia jimang nageng na, keng mam da wai jégené go oré tumu tumu dang gusu mowa duro bo cindi.

²⁶ Kiddin ga ’enunga jiga gusugeng ddang com na, keng da lé gusu mowa combu duro Jésu Krist cang.

²⁷ Dda oré gogeng ’era kerab dang Nô do Ddari do Krist toi, main kain na, ’enung nia ’era selageng, kau ’enung nia ’era ’eno na, ’enung da jé ca keng ’eré osu gag dang ’eremé pena bua, keng wurinyang ddainya pena duro bo cindi ca Nô do Ddari bu’.

²⁸ Ddo keng yoré muro ca kalang gageng ga tebena ’eno, kua da gelgé ca ka ga basong, ama ca keng na, kua da gelgé ca keng wa duro giyong go minyé go ba saga a gusu Kumu.

²⁹ Cawa Kumu pargeng ca kenga la gié go Krist koi, na ca bo go cindi gusi mera ’eno, ama ca keng wai gelé go cin cai bu’.

³⁰ Cakcak kua na, keng wa worinyé kembel daiang nang, na kembel go keng ba soli gusung go ’enung wo duroi cakcak kua, main keng ba wa jomang kain.