Pilimon 1 - Kebu go dore go herua 1978

Waigi do Paul toi

¹ Na ’enung Paul go duro gerngang ca Jésu Krist dang kermena Timoté. ’Enung pasu maktub lé kua gusin ji Pilimon, ji bajandini dang mondini go gié,

² dang yaué go Kumu koi go wa yaué a tain, dang temdina Apia, dang Akip mondini go worinyé kembel.

³ Dda Baina Kumu dang Bagulong Jésu Krist lageng waiang jalua juam.

Kederé ’yo dang bo cindi ga Pilimon kai

⁴ Kermeng Pilimon, ’enung wa ’eramang nain waindo waindo duro olé guang. ’Enung lei Kumu guang désé,

⁵ cawa ’enung jé nô do kederé ’yo gain ca kalang ga Kumu kai mam, dang bo cindi goin ca Bagulong Jésu.

⁶ ’Enung ol Kumu ca dandang do ba daina ca bo cindi na, to bin solé goang duro ca henga ga ddari mam ga nang nagé ca Krist.

⁷ Kermeng, kederé ’yo gain na, mowung gusung bbani ’eno bua, bung dono ca oré tumu tumu bu’, cawa ji jal kalang ga Kumu kai ddaindigé mam.

Paul ol ca Onésim

⁸ Ca Krist na, ’enung bbal ca ’yoin ca ji la henga ga ’enung ba sin.

⁹ Ama ’enung ’erem ca na golgo go ’enung olinyang kederé ’yo. ’Enung Paul go hali, cakcak kua ’enung wo duro gerngang ca Jésu Krist.

¹⁰ ’Enung olin ca Onésim, ddia kurandang go Krist koi, cawa ’enung belé baia ca ’enung ba belei go Krist koi a duro gerngang kua.

¹¹ Tumu na, ddi jégenain ’eno, ama cakcak kua ddi bbal ca jégenein dang ’enung bu’.

¹² Cakcak kua na, ’enung jogi ni gusin, ddi mainya ’enung bang kain.

¹³ Jomé guang go a duro gerngang ca Nô do Ddari na, ’enung dar nain ca ddia jima gusung ca ddi jégenang main nain kain.

¹⁴ ’Enung dar ca lo henga pena dang macang bbal ’eno, na ddar ji jé jua, ’enung dar ca soin lo henga ga ddari dang dono ’eno, ama ’enung dar ca ji la henga ga kederein ba dar lo.

¹⁵ Ama Onésim ddagein sam ca ddia jogu jomang nain bering laiga.

¹⁶ Cakcak kua na, ddi guiang mera ’eno, ama ddi ddi guiang cawa ddia kermana go kederé ’yo go Krist koi. Gusung mowung cai, ama gusin da mowin nain ddi kuang, cawa kederein da yei ca ddia guiang goin bua, ca ddia kermin ca Bagulong bu’.

¹⁷ Ji nia solung main mondin go gié kain na, ji ’yai rés main nang kain.

¹⁸ Ddi nia lein wané, kau tugula do laré toi nia wo cai kau na, ji geso main na wo cang kain.

¹⁹ ’Enung Paul na pasein kual lé dang kuabang ca ’enung da boiin (ama tugula do keudin toa do wo cang na, ’enung heneinya ca ’eno).

²⁰ ’I kermeng, ’enung olin ca ji lang henga lé ca kederé ’yo ga Bagulong kai, dda ji jala ddaindung ca jia kermeng go Krist koi.

²¹ ’Enung wa pasein kual lé kua na, ’enung sol carara ca jia lé henga ga ’enung wa olein caigé, ’enung sol ca jia légé ddi cainé com.

²² Kardené ji nyana kulu go kergé cang, cawa Kumu nia jé olé goin na, ’enunga ’yé ni gusin.

Labia do karé

²³ Epapras goang nang a duro gerngang ca Jésu Krist lein labia.

²⁴ Kamdung ga gié Mark, dang Aristak, dang Demas, dang Luk lein labia bu’.

²⁵ Dda wai do Baglong Jésu Krist toi jimang nain.