Matié 7 - Kebu go dore go herua 1978

Kaidé kual ca kamdegeng ’eno

¹ Ddo keng kaidé kual ca kamdegeng ’eno ca ddo Kumu kaidé kual caigeng ’eno.

² Cawa Kumu da kaidé kual caigeng main keng ba kaidé kual ca kamdegeng kain. So go keng wa kaidé kual dang nai ca kandegeng na, Kumu da kaidé kual caigeng dang nai bu’.

³ Cawa ma ji wa solé busu do hoddemé togé a tî kermin ga? Ji sela sia moana go wo a tindin ’eno ga?

⁴ Mena ma ji yé kermin wa: Ddang aié busu do hoddemé togé a tindin cong, sela jiang sia go moana go a tindin ’eno ga?

⁵ Ji go babé, ji dura sia moana go a tindin jua, kardené ji sai sol kiddin ddar carara ca aié busu do hoddemé togé a tî kermin dé.

⁶ Ddo keng bogé gaié henga ga arin carara ’eno, cawa ké da jogu yidiyogeng. Ddo keng dibé moin dogeng do béré tumu kosiyong, ’eno, ca ddo ké ddodera gondigé ’eno.

Ga ’ulageng bua, ga darageng bua, ga ddegageng tumo do kebu kulu bu’

⁷ Ga ’ulageng ka bugeng, ga darageng keng wai, ga ddegageng tumo do kebu kulu ka hangegeng.

⁸ Cawa kema goni goni goa ol na, ka bi, kema goni goni goa dar na, ddia wai, kema goni goni goa ddagu tumo do kebu kulu na, ka hangi.

⁹ Na wang a duroigeng go kurondi nia oli ca wo ma, ddi sai bi keddang ga?

¹⁰ Ddi nia oli ca gusa ma, ddia bia kumbulo ga?

¹¹ Keng ga isindong bbad, keng sol henga ga ddaderong ca bo karndegeng kalin bu’ ma, danga Baigeng go a dang ga? Ddia bigé ké ga wo olei henga ga ddaderong ga ddo cong.

¹² Henga ga keng ba dar ca kalanga lageng na, keng lagé kalanga main main kain bu’. So go Mois koi dang cidab go ga cogelé kebu go Kumu koi togé ya main kain.

Gulong kibi go toal

¹³ Ga andegang gulong kibi go toal cawa gulong kibi dang giyong go oré basang na, ka wol, ké huma ’eno, kalang combu andonga kené.

¹⁴ Ama gulong kibi go toal dang giyong go oré duro ga jomé goang cin ma, na doju bbani ’eno, kalang ga waigé na, ka bbani mera.

Sia kang wo goi

¹⁵ Ga lageng angalang ga cogelé kebu go Kumu koi go poi. Ké ’erga gusugeng gene mainya gamgé kain, ama a duro ddaindigé na, ka bagomso ga mainyé.

¹⁶ Kenga solga ca gié gogé. Ké ar sur a ca tasi ’eno bua, ké ar tuagiang ca dalin kuin ’eno bu’.

¹⁷ Sia go ddari na, wo goi kau ddar bu’, ama sia go isini na, wo goi kau isin bu’.

¹⁸ Sia go ddari dang dono do wo isin ’eno, sia go isin dang dono do wo ddar ’eno bu’.

¹⁹ Sia goni goni goa wa ddara ’eno na, ké seri dibi cin tua.

²⁰ Main kain na, kenga sol ga cogelé kebu go Kumu koi ga poia ca gié gogé.

’Enung selageng ’eno bering

²¹ Ké ga toagang Bagulong, Bagulong na, ka go andong duro Leu do dang ni mam ’eno. Ama na go lo henga ga Bang go jomé a dang ni kederei ba darégé mera.

²² Kiddin ga wolé le caga na, kalang combu da yeng wa: Bagulong Bagulong, ni dor kual go Kumu koi danga gusondin bua, ni tai habé ga ddisin cong danga gusondin bua, ni lé gié go dono go kagelokemo danga gusondin bu’ ’eno ga?

²³ Kardené ’enunga yégé waldong wang: Keng kalang ga lo isinwa, ’enung selageng ca pena ’eno bering, ’erageng ni cong cigad.

Kuluyong sua

²⁴ Na ca ma kema goni goni go wa jo kual guang go ’enung wa yoi ma, ddi lé gié cainé na, ddi mainya kema go nari go ba boi kulu goi ca kubung kain.

²⁵ Kang hongu bua, kurai piyong bua, kal durong nain bu’, ama kulu lé tusang ’eno, cawa ké dé toia ca kubung.

²⁶ Kema goni goni go wa jo kual guang go ’enung wa ’yoi, ama ddi la gié cainé ’eno na, ddi mainya kema go mader go ba boi kulu goi ca kelai kain.

²⁷ Kang hongu bua, kurai piyong bua, kal durong nain bu’, ama kulu lé tusang dugo, toasang goi na gumu rem bbani ’eno.

Dono do Jésu toi

²⁸ Kiddin ga Jésu ba yégé kual lé na, kalang ga yaué combu sol kagelokemo ca gelé goi.

²⁹ Cawa ddi gelegé mainya kalang gagé ga gelé so kain ’eno, ama ddi gelganga dono.