Matié 4 - Kebu go dore go herua 1978

Gesaué go Jésu koi

¹ Kardené Habé gol Jésu ’yang nai duro gada ca Sidan gesauai.

² Teba to poddin dang soindo to poddin na, ddi da do ’eno, kardené kurang lei.

³ Sidan ’yé gusi, ddi yei wa: Ji nia Kumu Kurandi na, ji yai keddang lé kua ddi bel wo.

⁴ Ama Jésu jogu yei wa: Cidab do Kumu toi yé waldong wang, to yé wa: Kema bbal jomang cindi ca wo mera ’eno, ama na ca kual goni goni go Kumu ba yei.

⁵ Kardené Sidan ’yang nai duro gulong go gumu go arin carara, ddi si ’eré ca kulu go yaué go Kumu koi cai do ciléngé dang.

⁶ Ddi yei wa: Ji nia Kumu Kurandi na, debuang gusin dugo cawa cidab do Kumu toi yé waldong wang: Kumu da bigé kangiyong gai so ca kual goin, Ka ’yein kebegé dang, Ca ddo tebain duyé ca keddang ’eno.

⁷ Jésu jogu yei wa: Cidab do Kumu toi kau yé waldong wang: Ddo ji gesaué Bagulong Kumu goin ’eno.

⁸ Kardené Sidan goli ddang com ’yang nai ca kubung go dang hung. Ddi geli leu do delinya toa dang lainyong goa mam.

⁹ Ddi yei wa: Ji nia poi gomdin tumang melawung na, ’enunga bin dang nagé kua mam.

¹⁰ Kardené Jésu yei wa: Sa ni cong Sidan, cawa cidab do Kumu toi yé waldong wang: Ji melaua Bagulong Kumu goin, ji laia ddi gié go gianduai mera.

¹¹ Kardené Sidan ddei. Kangiyong ga Kumu kai ’yé gusu Jésu, ké jégéni.

Jésu osum lo gié goi a Galali

¹² Kiddin ga Jésu ba jé kandia debu Jâ duro gerngang na, ddi sai ’yé Galali.

¹³ Ddi jima Nasarat ’eno, ama ddi ’yé jomé a Kapernom, na gulong go gumu go a kebu tagu do Galali ca gesong ga Sabulon kang Naptali.

¹⁴ Ddi lé main kainya ca ser to kual go Esai go cogelé kebu go Kumu koi ba yé:

¹⁵ Gesong ga Sabulon dang gesong ga Naptali, Kebu tagu dang gesong ga a ca kurai go Jurdé, Galali do kalang ga toigé ddang,

¹⁶ Kalang ga jomé duro delem, Ké sol arinwa do tungu, Ké ga jomé ca gesong ga tunu do temai toa na, Arinwa andong gusugé.

¹⁷ A kiddin lé na, Jésu osum doré kual, ddi yé wa: Ga bega kebegeng cawa Leu do dang ni jia ’yoab.

Jésu té kalang ga ’uré poddin

¹⁸ Kiddin ga Jésu wa oré kebu gung go tagu do Galali na, ddi sol kalang sua, ka karmé, ké wa ’uré, na Simon go ké ba tei Piér kang kermi André. Ké wa bogé lau dogé cin tagu.

¹⁹ Jésu yégé wa: Ga kubangang, ’enunga belegeng ga ’yomé kalang.

²⁰ Kobegépadda ké ddé lau dogé, ké kobi.

²¹ Kardené ddi ’yé tumu, ddi sol kalang ga ddang sua, ka karmé, na Jak kang Jâ, ka Sébedé karndi. Ké wo duro kuburo kang ga baigé Sébedé. Ké wa nyané lau dogé, Jésu tégé.

²² Kobegépadda ké ddé kuburo gogé dang baigé, ké kobi.

²³ Jésu dal ca gesong ga Galali mam, ddi gel kalang duro kuluyong ga yaué ga Juib kagé. Ddi dor Nô do Ddari do Leu toa, ddi bigé kalang labia a duro hoamya dogé doni doni do cindo kaindo kaindo mam.

²⁴ Kual goi aju ca gesong ga Siri mam. Ké gulgai kalang gang hoamya cindo kaindo kaindo bua, dang kalang gang hoamya do gelé cin sergin bua, dang kalang gang habé ga isini bua, dang kalang ga suagé bua, dang kalang ga sayu bu’. Ddi bigé labia.

²⁵ Kalang ga yaué combu ga ba sai a Galali kobi dang kalang ga a duro gulong go gemdong moac bua, kang kalang ga Jorsalém bua, kang kalang ga Judé bua, kang kalang ga jomé ca gesong ga ca kurai go Jurdé bu’.