Matié 28 - Kebu go dore go herua 1978

Belé go Jésu koiang cindi a duro ga maré

¹ Kara wolé go jurgum a duro wolé go tumu dang joguddu coalala na, Maram do Magdala dang Maram do pena, ké ’yé ca solé kemgané.

² Kobipadda gesong gigié nain bbani ’eno, cawa kangito go Bagulong koi gesingu a dang, ddi hengddé keddang durdiné, ddi jom cai.

³ Dambei piyong biddid biddid main wulainyé kain bua, badigé gai béré teréc main masem kain bu’.

⁴ Kalang ga magé kemgané lé, lé muro dang ’yoré nain bbani ’eno, ké ji main ga maré kain.

⁵ Kangito go Bagulong koi lé yégé kandu wa: Ga lo muro ’eno, ’enung sol ca keng wa dara Jésu go ké ba bbobeli ca sia go adegelé.

⁶ Ddi wo ’eno ba, cawa ddi belang cindi a duro ga maré main ddi kené ba yegengang tumu kain. Ga ’eragengang sela kiddin ga ddi ba woi kené.

⁷ ’Erageng kala, keng ’yé yogé anjama gai, ddi belang cindi a duro ga maré, ddi tol na tumoigeng a Galali, keng da soli a kuani kené, sela ’enung yegeng ’enda.

⁸ Ké boi gusugé kala cab ddé kemgané lé, ké lé muro nain kang gusu mowa bu’, ké gerang nô lé ’yé yogé anjama ga Jésu kai.

⁹ Kobegépadda Jésu jimyégé, ddi yégé wa: Legeng waigi. Ké ’yé gusi ’yom gondi, ké melaui.

¹⁰ Kardené Jésu yégé wa: Ga lo muro ’eno, ga ’erageng, keng yégé karmeng ca ké ’era ni Galali, ka solung a kua ni.

Kual go ga magé kemgané kogé

¹¹ Kiddin ga ké wa oré a giyong dé na, asengeriyong ga pena ga ba magu kemgané lé ’yé duro gulong go gumu. Ké yégé gemdong ga tibé Kumu henga ga ba lé mam.

¹² Gemdong ga tibé Kumu kang gemdong ga bedang yau nyan kual kebegé pena. Ké bigé asengeriyong laré combu.

¹³ Ké yégé wa: Ga yageng waldong wang ca anjama gai ’yang soindo, ké koii kiddin ga kengang kung.

¹⁴ Go ddo ca nia jé kual lé na, nia bedei kalong. Ni da minyegeng a kebu kual mam.

¹⁵ Asengeriyong ai laré lé, ké lé main ké ba géjegang kain. Kual lé kua ajé duro ga Juib bera labegé.

Jésu gel gusi cin anjama gai

¹⁶ Anjama ga maoc ca pena lé ’yé Galali ca kubung go Jésu ba gelgang nai lé.

¹⁷ Kiddin ga ké ba soli na, ké melaui, ama ga pena a duroigé danga ’eremé sua sua.

¹⁸ Jésu ’yé gusugé, ddi yégé wa: Ké bung dono ca Leu do dang ni, dang do dugo mam.

¹⁹ Na ca ma, ga ’erageng duro delinya mam, keng belé kalang ga toigé mam anjama gang, ga desegé to kang dang Bain Kumu gusondi bua, dang go Kurondi bua, dang go Habé gai bu’.

²⁰ Ga gelegé ca ké maga henga mam ga ’enung ba segengang nagé, sela ’enung wo kenang nageng waindo waindo bera delinya toa do karé gula.