Matié 27 - Kebu go dore go herua 1978

Ké gol Jésu ’yang nai tumu Pilat

¹ Dang joguddu coalala gemdong ga tibé Kumu mam dang gemong ga Juib kagé, ké yau ca nyané kual go deddé Jésu.

² Ké saddiei, ké ’yang nai tumu Pilat go ddo ca.

Maré go Judas koi

³ Kiddin ga Judas go ba ai Jésu gangeldi lé ba sol ca kandia kaidé kual go temai cai na, ddi pédé gusin bagen, ddi jogang laré go doarna to subu lé ’yé bogé gemdong ga tibé Kumu kang gemdong ga bedang.

⁴ Ddi yégé wa: ’Enung bu go geddang maré, ’enung la isinwa. Ama ké jogu yei wa: Kua dalenia wa ga? Na kual goin ’enda.

⁵ Judas wujé laré go doarna lé duro kulu go yaué go Kumu koi, ddi ddé gusi ’yé, kardené ddi bé gangé tumoi deddu gusi.

⁶ Gemdong ga tibé Kumu nyim laré lé, ké yé wa: So guana nar ca kondia bogé laré go main kain lé duro sundugu do a duro kulu go yaué go Kumu koi ’eno, cawa na laré go ké ba bi ca deddé temai.

⁷ Kardené ké nyan kual kebegé pena, ké kel go gaddé bbaserong yagé goi ca ’embang kalang ga kergé kené.

⁸ Na ca ma, ké té kiddin la, yagé go kebar bera labegé.

⁹ Kual lé la ca ser to kual go Jérémi go cogelé kebu go Kumu koi ba yei: Ké nyim laré go doarna to subu. (Na laré go ga Israél ba nyan kebegé pena cai ca keleiang.)

¹⁰ Ké kel go gaddé bbaserong yagé goi main Bagulong ba yengang kain.

Jésu ’ere’ tumu Pilat

¹¹ Jésu ’eré tumu go ddo ca, ddi ’engeri yé wa: Ji alang kelma go Juib kogé ga? Jésu jogu yei wa: Main ji ba yang kain.

¹² Kardené kiddin ga gemdong ga tibé Kumu dang gemdong ga bedang ba si kual cai na, ddi debegé kual cainé pena ’eno.

¹³ Kardené Pilat ’engeri wa: Ji ja kual mam go ké wa soinyang nai cain kua ’eno ga?

¹⁴ Ama Jésu jigaiang kual cainé pena ’eno, go ddo ca sol kagelokemo bbani ’eno.

Ké kaidé kual ca Jésu ca deddei

¹⁵ Duro soré go kederé cindi goni goni kau, na hada do go ddo ca toi, ca bogé kema go gerngang pena dang, na ddi go kalang ba ddari.

¹⁶ A duro wolé lé na, kema go gusondi ba té nain wo kené pena a duro gerngang, ddi go ké ba tei Jésu Barabas.

¹⁷ Pilat sai ’enger kalang ga yaué combu wa: Keng dar ca ’enung begagenga wang ga? Jésu go Barabas laba, Jésu go ké ba tei Krist ga?

¹⁸ Cawa ddi sol carara ca kandia bi Jésu na ca ddengi.

¹⁹ Kiddin ga Pilat dang jomé ca pogu a duro bedang dé na, tamdi gi kema gusi yei wa: Kema go geddang lé kua na, ji loi henga pena ’eno, cawa labegé soindo lé kua na, ’enung gel cin combu duro soné cai.

²⁰ Gemdong ga tibé Kumu dang gemdong ga bedang si kalang ga yaué combu segeldé ca kandia ulaia ca Barabas bua, kandi deddu Jésu bu’.

²¹ Go ddo ca ’engergé wa: A duro kalang ga sua lé kua na, ’enung begagenga wang dang ga? Ké jogu yei wa: Begania Barabas.

²² Pilat ’engergé wa: ’Enung lang Jésu go ké ba tei Krist la mena ga? Ké mam jogu yei wa: Bbubelai ca sia go adegelé,

²³ Pilat ’engergé wa: Henga ga ddi ba légé ga isini na wa ga? Ama ké mam osum soi tumoigé osu, ké yé wa: Bbubelai ca sia go adegelé.

²⁴ Kiddin ga Pilat ba sol ca ddia bbala naregé ’eno ca kual na da sai dang gendei na, ddi ai kang pel kalndi tumo kalang ga yaué combu mam, ddi yégé wa: Gusunga turodu, ’enunga waldong cegad dang deddé go kema lé koi, na kual gogeng.

²⁵ Kalang ga yaué combu jogu yei wa: Deddé go kema lé koi na, dda ’yergu doi ’imaniang karndini mam.

²⁶ Kardené Pilat sai bégé Barabas dang, ddi té Jésu dang belau, ddi bigang nai ca kandia bbubulai ca sia go adegelé.

Asengeriyong lé Jésu bbojo

²⁷ Asengeriyong ga Pilat kai gol Jésu ’yang nai duro geru go ta go ddo ca, asengeriyong lé mam yau gusi lurei dugu.

²⁸ Ké dor badigé gai cong, ké si badigé ga yilé gusi.

²⁹ Kardené ké temdei gundu go tasi kembei cai, ké bi ddor a kobi go barua, kardené ké osum poi gomdigé tumoi dugo, ké lei bbojo, ké yei wa: Kelma go Juib kogé, ni lein waigi na.

³⁰ Ké tibei kalu gusi bua, ké boddu ddor do kobi lé, ké sombu cai dang nai.

³¹ Kiddin ga ké ba lei bboju ka na, ké dor badigé lé gusi cong, ké jogu si badigé gai gusi. Ké goli ’yang nai ca bbobelai ca sia go adegelé.

Ké bbobel Jésu ca sia go adegelé

³² Kiddin ga ké ba andong dong na, ké wai kema go Serén go ké ba tei Simon, ké ’yomiang dono ca kondia aia sia go adegelé go Jésu koi.

³³ Ké ’yé kiddin ga ké ba tégé Golgota, to do poré: na kiddin ga ca do ’isé.

³⁴ Ké bi sur kangndo wainyang ddainya ca konda sa, ama kiddin ga ddi ba dobegé na, ddi kaingé cong.

³⁵ Kardené ké bbobeli ca sia go adegelé. Ké si garmé ca gosindé gusugé badigé gai.

³⁶ Kardené ké jom dugo ca magei.

³⁷ Ké pasu kual go ké ba kembeiang nai, ké si gusu sia go adegelé a cai dang, ké pasu wa: Kua, na Jésu kelma go Juib kogé.

³⁸ Ké bbobel kalang ga gané sua ca sia go adegelé dur Jésu, pena ca kobi go barua bua, pena ca kobi go masa bu’.

³⁹ Kalang ga halé a kiddin lé na, ké té caigé, ké nyangdei.

⁴⁰ Ké yei wa: Na ji go ba dar ca dosé kulu go yaué go Kumu koi dugo, kardené jia da gaddiang wolé subu, ji nia Kumu Kurondi na, minyu gusin, ji gesinyang ca sia go adegelé dugo.

⁴¹ Gemdong ga tibé Kumu dang kalang ga gelé so go Kumu koi dang kalang ga gemdong lei bbojo main kain bu’, ké yei wa:

⁴² Ddi minyé kalang ga ddang, ama ddi bbala minyé gusi ’eno. Ddia kelma go Israél kogé ’eno ga? Ddi nia gesinyang ca sia go adegelé dugo cakcak kua na, na da bu cindi cai.

⁴³ Ddi si ddaindi ca Kumu, ddi yé waldong wang, ddia Kumu Kurondi, nia main kain na, dda Kumu minyi cakcak kua dé.

⁴⁴ Kalang ga gané sua ga ké ba bbobelégé ca sia go adegelé durdi lé na, ké nyangdiei main kain bu’.

Maré go Jésu koi

⁴⁵ Kiddin ga teba ba ’eré duro gulong ddar na, delem lebu gesong mam bera teba ca do borndo.

⁴⁶ Teba ca do borndo na, Jésu tang noi do osi pong: Eli, Eli lama sabaktani? To do poré, Kumu guang, Kumu guang, ji ddeng conga cawa ga?

⁴⁷ Kalang ga pena ga ’eré a kiddin lé na, ké jé. Ké yé wa: Ddi wa toga Eli.

⁴⁸ Go pena geré kobipadda ai bergem debo cin kang ga tasi, ddi so kebo nalu, kardené ddi bi ca kandia sa.

⁴⁹ Ama ga pena yé wa: Dda jang, na solegeng dé, Eli da ’erge ca minyei laiga.

⁵⁰ Jésu dor nôlang noi do osi, kardené kibi lebu.

⁵¹ A kiddin lé kerab na, badigé ga dersél do a duro kulu go yaué go Kumu koi sagong a dang duroiné ddar, bera bé toiné dugo bac, gesong gigié bua, keddang kaidong bu’.

⁵² Kalang ga Kumu kai ga ba ma combu, kemgané gagé hangdiyong, ké belé a duro ga maré dang cindegé.

⁵³ Kiddin ga Jésu ba belang cindi a duro ga maré na, kardené ké andiyong dong, ké ’yé duro gulong go arin carara, kalang combu solgé.

⁵⁴ Kiddin ga gumu go asengeriyong ga magé Jésu ba sol gesong gigié gogé, dang henga ga ba lé mam na, muro légé bbani ’eno, ké yé wa: Cindi kema la Kumu Kurondi.

⁵⁵ Kandu combu ’eré waldong has ca solé. Na ké ga koboiang a Galali ca jégeniang gié.

⁵⁶ Maram do Magdala wo duroigé bua, Maram do Jak kang Josép ’yoigé bua, Sébedé karndi ’yoigé bu’.

’Embé go Jésu koi

⁵⁷ Kiddin ga teba ba ka na, kema go lainyong go ké ba tei Josép go a gulong go gumu go Arimaté ’erga, ddia anjama go Jésu koi bu’.

⁵⁸ Ddi ’yé gusu Pilat. Ddi ’engeri ca Jésu temaidi. Kardené Pilat yégé kandia bi Josép Jésu temaidi.

⁵⁹ Josép ai temaidi, ddi temdeiang badigé ga béré ga herua.

⁶⁰ Ddi dibi duro ’umbung goi go herua go ddi ba paii duro keddang ca gusi, kardené ddi hengddu keddang go gumu ca lebang ’umbung lé kibi. Kardené ddi ’yé.

⁶¹ Maram do Magdala dang Maram do pena kang jomé dur kemgané lé.

Ké magu kemgané

⁶² Waindo, to do poré na wolé go kara wolé go nyané henga ga ca wolé go jurgum na, gemdong ga tibé Kumu dang ga Parisié, ké ’yé yaué ta Pilat.

⁶³ Ké yei wa: Kelma, ni ’erem ca kema lé kual goi go poi go ddi ba yei kiddin ga ddiang cindi, ddi yé wa: Wolé subu ’enung da belang cindung a duro ga maré.

⁶⁴ Ji si kalang maga kemgané péddéddé bera wolé subu, ca ddo anjama gai oré koiei ma, kardené ké yo wa: Kondia belang cindi a duro ga maré. Ké nia lé main kain na, kual go poi go karu da ddi go tumu com.

⁶⁵ Pilat yégé wa: Sela asengeriyong ga maga kiddin wo kené, ga nyimgé, keng ’yang nage magé kemgané lé main keng ba darang kain.

⁶⁶ Ké ’yé, ké lebu kemgané lé kebegé dang keddang ddar, ké si genjer ca keddang lé bua, ké si asengeriyong ca kandia maga kemgané lé bu’.