Matié 24 - Kebu go dore go herua 1978

Jésu yé kual tumu jua ca kulu go yaué go Kumu koi ddainya da tusong

¹ Jésu andong dong a duro kulu go yaué go Kumu koi. Kiddin ga ddi wa oré na, anjama gai ’yé gusi ca gelei kulu go yaué go Kumu koi gaddé goi.

² Kardené Jésu jogu yégé wa: Keng sol henga lé kua mam ga? ’Enung wa yogenga cindi waldong wang: Keddang go ké da ddei ca mengai go basé tosé dugo wo ’eno, ka tosia dugo mam.

Gelé go cin go da ’erga tumu delinya toa do karé

³ Jésu jom ca kubung goang taber. Anjama gai ’yé gusi kaindigé, ké ’engeri wa: Ji yani dé, kiddin ga henga lé da lé ga? dang henga ga geleni jogang goin, dang delinya tua do karé na, na wa ga?

⁴ Jésu jogu yégé wa: Lageng angal, ddo kema pena kaiyegeng ’eno.

⁵ Cawa kalang combu da ’ergang gusondang, ka yé wa: ’Enunga Krist. Ka kai kalang combu.

⁶ Kiddin ga kenga jé gendei do worinyé kembel do ’yoab, dang nô do worinyé kembel go has, ddo keng lo muro ’eno, na gad henga lé da lé, ama na delinya toa do karé ’eno dé.

⁷ Kalang ga pena da worinyé kembelang kalang ga ddang bua, leu do pena da worinyé kembelang leu do ddang bu’. Bagedara da lé kalang bua, gesong da gigié ca gesong kaindigé kaindigé bu’.

⁸ Henga lé kua mam mainya gelé go cin go tumu go tama do wa daré ca wo kua kain.

⁹ Kardené ka begeng kuaba kalang ca kandia gelgeng cindegeng bua, kandia deddegeng bu’. Kalang mam da kaingeng ca kuandang.

¹⁰ A kiddin lé na, kalang combu da ddé bo cindi cong, ka kembé gusugé bua, ka kain gusugé bu’.

¹¹ Ga cogelé kebu go Kumu koi go poi combu da sai, ka kai kalang combu.

¹² Isinwa da wéré nain bera kederé ’yoi ga kalang combu kagé da belé jal ddeng ddeng.

¹³ Ama kema goni goni goa ’yom gusi bera to do karé gula na, ddia minyé.

¹⁴ Ka dor Nô do Ddari do Leu tua, duro delinya mam ca hendé gusu kalang mam. Kardené to do karé sai ’erga dé.

Henga ga ddisin nain

¹⁵ Kenga sol ddi go ké ba tei henga ga ddisin, ga ddi go Daniél go cogelé kebu go Kumu koi ba yé kual goi, ddia ’eré duro kiddin ga arin carara. (Kema goni goni go ddoginyé kual lé na, ddai ddi sela toi ddara.)

¹⁶ Kardené ké ga a Judé na, dda ké ger ’era ca kubung go gemdong.

¹⁷ Kema go a ca kulu goi dang na, ddo ddi gesinyé dugo ca nyimé henga gai a duro kulu goi ’eno.

¹⁸ Kema go a duro yagé na, ddoi ddi jogé gulong ca nyimé badigé gai ga gumu ’eno.

¹⁹ Kandu ga kurong dang ké ga bogé karang kobin a duro wolé na, na bagen.

²⁰ Ga ulageng Kumu ca ddo geré lé waiegeng dang turboi kau duro wolé go jurgum ’eno.

²¹ Cawa a duro wolé lé na, gelé go cin go gumu go ddo mam de lé. Dang delinya toa do so din bera labegé na, gelé go cin go main kain lé la ca pena ’eno bering.

²² Kumu nia jiga wolé lé ddoginyé ’yoab ’eno na, kema pena ni go minyé ’eno, ama ddi jiga wolé lé ddoginyé goi yoaba ca kalang ga ddi ba pargé ca gusi.

²³ Kardené kema nia yegeng wa: Sela Krist wo ké ba, kau wigani kua, ga bogeng cindi ca kual lé ’eno.

²⁴ Cawa Krist ga poi dang ga cogelé kebu go Kumu koi ga poi da sai, ka lé henga ga gelé ga gumu bua, ka lé gié go dono go kagelokemo bu’, nia ané ’eno kau, ké ca kaié kalang ga Kumu ba pargé.

²⁵ Sela, ga lageng angal cawa ’enung yegeng kual tumu ka’.

²⁶ Kema nia yegeng wa: Selageng, ddi wigani duro gada, ga oregeng kené ’eno, kau kema nia yegeng wa: Selageng, ddi wosu wo ké ba kau, ga bogeng cindi ca kual lé ’eno.

²⁷ Main wulainya ba wulainyang a dang, a toiné bera ’yé cainé kain, jogang go Kema Kurondi koi na main kain bu’.

²⁸ Kiddin ga gaia wo kené na, tonu yauda kené bu’.

Jogang go Kema Kurondi koi

²⁹ Kara gelé go cin a duro wolé lé padda na, teba da belé delem bua, kederé da ’en ’eno bu’. Désiddiyong da bega dugo bua, dono do dang da gigié bu’.

³⁰ Kardené henga ga gelé ga Kema Kurondi kai da gelgu a dang. Kalang cindegé kaindigé kaindigé a duro delinya mam, ka ’elé dang tubu go cindegé, ka sol Kema Kurondi wa orang ca meddaliyong ga dang, dang dono dang hormo nain.

³¹ Ddia gigu kangiyong gai, ka lom tura do yo nain. Ka yau kalang gai ga paré a delinya temdo do poddinyang mam.

Gelé go tuagiang kua

³² Ga selageng gelé go ca kual go tuagiang kua toi. Kalia nia cibu habela bu’ na, keng sol ca kebu kal jia ’yoab.

³³ Kiddin ga kenga sol henga lé kua mam na, keng sela ca orang goi ji ’yoab, ddi ’eré wa tumu gulong ’enda’.

³⁴ ’Enung wa yogenga cindi waldong wang: Kalang gang cindegé ga cakcak lé kua na, ké go maré mam ’eno, henga la go lo jua.

³⁵ Dang kang delinya da hal cong, ama kual guang go halé cong ’eno bering.

Na Kumu pena solé to do karé mera

³⁶ Kema pena solé wolé lé dang kiddin lé orang gogé ’eno, kau kangiyong ga dang, kau Kurong bang, na Ba pena mera solé.

³⁷ Main ké ba lang duro saman do Noé toi kain, kiddin ga Kema Kurondi da ’erga na, da la main kain rés bu’.

³⁸ Main ké ba lang tumu kang ga poiang wa kain, kalang lé di bua, ké si bua, ké ’yé gusugé bua, ké bu karndigé ’yo bu’, bera wolé go Noé andong duro kuburo go gumu.

³⁹ Ké sela toi ’eno, bera kang ga poiang wa yégé demaségé cong mam. Kema Kurondi orang goi dain da gena main kain rés bu’.

⁴⁰ A kiddin lé na, kalang sua da ’eré duro yagé, ka ai pena bua, ka ddé pena bu’.

⁴¹ Kandu sua da ’eré kebu golin ca ’yo, ka ai pena bua, ka ddé pena bu’.

⁴² Na ca ma ga jimageng ’yoal ’yoal, keng sela wolé go Bagulondegeng da ’erga kené ’eno.

⁴³ Keng sol ca gulong bagulondi nia sela kiddin ga koié da ’erga kené dang soindo na, ddia ni go woia kung ca ddo koié andong tai ’eno.

⁴⁴ Na ca ma ga nyana gusugeng ddara cawa kiddin ga keng nia ’erem ’eno na, Kema Kurondi da ’erga.

Go gié go geddang dang go geddang ’eno

⁴⁵ Na wang go gié go geddang dang go nari ga? Na ddi go bagulondi ba si gié ca kondia gusinya kamdi ga gié do gogé dang kiddin kerab.

⁴⁶ Go gié lé Bagulondi nia jiga waii duro gié lé main kain kerab na, ddianga gusu mowa.

⁴⁷ ’Enung wa yogenga cindi waldong wang: Go gié lé Bagulondi da si ca henga gai mam.

⁴⁸ Ama go gié lé nia go isini na, ddia yé gusi wa: Bagulondang lé la liling basé orang kala.

⁴⁹ Ddia sai ca togé kamdi ga gié, ddi di, ddi si daiang kalang ga koié céré.

⁵⁰ Kardené go gié lé bagulondi da ’erga duro wolé go ddi wa amei kené ’eno bua, dang kiddin ga ddi ba sela ’eno bu’.

⁵¹ Ddia kaidé kual go gumu cai bua, ddia gosinyi duro kalang ga babé bu’. A kiddin lé na, ddia ’elé bua, ddia yidié kégei bu’.